Mabhaibheri mazinji okare, inga sandujo King James Version yo cingezi, inoshandisa gama rokuti “inferno” mu mavhesi amweni o bhaibheri. (Nduyo 16:10; Mabasa o Vapostori 2:27 a) Inga zviri kuvoneswari pa foto iyi, vandhu vazinji vanotenda kuti inferno indau yo muriro ucikajimi, inopisihwa vandhu vanoita zvakashata. Asi kureva kuti Bhaibheri rinojijisadi zvondhozvo?

Pa musoro uwu:

•  Inferno indau inotambujihwa vandhu kwenda no kwenda?

•  Muezaniso wa Jesu wo mwanarume mukhupuki na Razaru, unoda kunanagenyi?

•  Inferno inoimirira kuti mundhuwo aana ushamwari na Mwari?

•  Aripovo mundhu wakambovhiswa kuvha mu Inferno?

•  Mavhesi o Bhaibheri ngo pamusoro po inferno no Guva

•  Magama o Bhaibheri mu ndumi ro yakatahwa pakutanga

•  Ndhoroondho ngo pamusoro po inferno

 Haiwa. Magama o ndumi yokutanga akasansuja kuti “inferno” mu Mabhaibheri amweni okare (Cihebheru, “Sheori”; Cigiriki, “Haidhesi”) magama ese aya anonagira “Guva,” kana kuti, kufa kunoita vandhu vese. Bhaibheri rinokhombija kuti vandhu vari mu “Guva” avaripi penye, asi vakafa.

•   Vandhu vakafa avazwi ciri cese. Ivona avahwajihwi. “Amuna basa, nee thangwe, nee uzivi, nee kuziva, ku vaya vari mu inferno.” (Mucumaeri 9:10, Sandujo Douay-Rheims) Mu inferno amuwaniki vandhu vanocema ngo kutambujika. Kusiyapo izvo, Bhaibheri rinoti: “Vashati ngavapserujwe, ivona ngavanyarare mu guva [inferno, Douay-Rheims].”—Nduyo 31:17; Sandujo King James (30:18, Douay-Rheims); Nduyo 115:17.

•   Mwari wakananga kuti muviyo wokutama kuzwira ngo wokufa, haiwa wo kwenda koopiswa mu inferno. Mwari wakavhunja mwanarume wokutanga, Adhamu kuti iyena waizofa kudari akatama kuzwira. (Genesi 2:17) Mwari aazivi kumbobhuya zviri zvese ngo pamusoro po kupiswa mu inferno ngo muriro wo kwenda no kwenda. Tevere, Adhamu paakapera kushaisha, Mwari wakamuvhunja kuti ngo wapi waizova muviyo wakona: “Ngokuti uri bukuta, unozohwirirazve ku bukuta.” (Genesi 3:19) Iyena waizotama kuzovonekazve. Ngo kudaro, kudari Mwari waiendesa Adhamu koopiswa mu inferno ngo muriro, iyena waizozvinanga. Mwari aazivi kucinja muviyo jokutama kuzwira mutemo jake. Pa makore mazinji akazotevera, pasure po kushaisha kwa Adhamu, Mwari wakafemera mutari wo Bhaibheri kuti anange kudari: “Ngokuti mupocero wo cishaishi irufu.” (Varoma 6:23) Ngo kudaro, akucinazve muviyo umweni unonyisa uwu, “ngokuti mundhu wese anonga afa wapera kusujunuhwa mu cishaishi cake.”—Varoma 6:7.

•   Mu murangariro wa Mwari amuzivi kumbova no hwiru hwo kupisa mundhu kwenda no kwenda. (Jeremia 32:35) Murangariro wo kupisa mundhu auzwirani no zvinojijisa Bhaibheri kuti “Mwari i rudo.” (1 Johani 4:8) Iyena anoda kuti timunamate ngokuti tinomuda, haiwa ngokuti tinothya kupiswa kwenda no kwenda.—Mateu 22:36-38.

•   Vandhu vakanaka vakaenda mu inferno. Mu Mabhaibheri anoshandisa gama rokuti “inferno” anokhombija kuti vandhu vakagondeka, inga ndi Jakobe na Jobe, vaienda mu inferno. (Genesi 37:35; Jobe 14:13) Bhaibheri rinonanga kuti Jesu Kristu wakagaravo mu inferno kuvhira pa njiku yaakafa mbhera pa njiku yaakamuswa. (Mabasa o Vapostori 2:31, 32) Ngo kudaro, Mabhaibheri aya paanoshandisa gama rokuti “inferno” iwona ari kunangira mu Guva, b haiwa ndau imweni.

 Muezaniso uwu wakanangwari ndi Jesu unowanika pana Ruka 16:19-31. Muezaniso, ikuezanisira kunobesera kujijisa maitiro aushoni okuva mundhu wakanaka pamberi po vandhu na Mwari. Muezaniso wa Jesu o mwanarume mukhupuki na Razaru, asipi ciitiko cakaitikadi kamare. (Mateu 13:34) Kuti tizive zvizinji ngo ndava yo muezaniso uwu, vonanyi musoro unoti “Quem era o homem rico e Lázaro?”

 Haiwa. Jijiso yokuti vandhu vakafa vanoziva kuti avana ushwamwari na Mwari aizwiranyi no zvinonangwa ngo Bhaibheri. Bhaibheri rinonasa kujekesa kamare kuti vandhu vakafa apana no ciri cese haco cavanoziva.—Nduyo 146:3, 4; Mucumaeri 9:5.

 Hina. Bhaibheri rinonasa kujekesa kamare kuti kuno vandhu vapfumbamwe vakaenda mu Guva (gama rinosandujwa kuti “inferno” mu Mabhaibheri amweni) tevere vakazomuswa. c Nokwainga kuti vakaendadi mu inferno inopiswa vandhu, ivona vaizozvinanga no kuvhunjavo vamweni mugariro uri mondhomo. Zvinodakajisa ngo zvokuti apana na umwe hake wakambobhuya kuti ndainga ndecipsa kana kutonanga mugariro jimweni jinowanikemo. Ngenyi? Ngokuti Bhaiheri rinojijisa kuti ivona vainga vacikazwi ciri cese, ivona vainga vakaita inga “vakavata” hope jomajikira.—Johani 11:11-14; 1 Vakorinte 15:3-6.