Genesisi 41:1-57
41 Pa sure po makore maviri, Faro wakarota akaima mu mbhiripiri mo Murambo wa Niro.
2 Mu murambo umu, maibuda n’gombe nomwe jokaji, jakaseja* jonuna. Ijona jaihava ndhonvhe yo* mumbhiripiri mo Murambo wa Niro.
3 Sure ko kubuda n’gombe iji, mu murambo wa Niro makabudazve n’gombe nomwe jainga jakashata no kuonda maningi. Ijona jakaima mumbhiripiri mo murambomo phedo no n’gombe jo kununa jiya.
4 Tevere n’gombe jo kuonda jiyani jakatanga kuha n’gombe jokuseja* no kununa. Paainga ecirota izvi, Faro wakavhurumuka.
5 Iyena wakavatazve worota hope jimweni. Wakarota musonjoti* munomwe yakakura, no kuseja.* Musonjoti iyi yakabuda mu zonje rimwero.
6 Sure kwazvo kwakabudazve musonjoti* munomwe, yakatetepa, yofota ngo kuvhunguzwa ngo mbhepo yo kumavhazuva.
7 Musonjoti* munomwe yo kutetepa iya, yakamija musonjoti yo kuseja* yokura. Paainga ecirota izvi, Faro wakavhurumuka.
8 Comangwanani Faro wakaneseka maningi mu mwoyo make. Ngo kudaro, iyena wakadanija vapiri vo masaramuso vo mu Ejipita no vazivi vese kuti vadurujire hope iji. Asi apana na umwe waikwanisa kudurujira hope iji kuna Faro.
9 Ngo kudaro, mutungamiriri wo vaperekeri wakavhunja Faro kudari: “Ndiri kudekeca zvishaishi zvangu nyamasi.
10 Imwimwi mambo Faro makanyangajwa maningi ngo pamusoro pedu itusu vashandiri venyu; inini no mutungamiriri wo vabiki. Ngo kudaro, imwimwi makaenda kotifungira panyumba yo mutungamiriri wo vangwariri.
11 Perapo, inini no mutungamiriri wo vabiki, takarota hope. Asi hope iji jaireva zviro zvakasiyana.
12 Pakati pedu painga no mufana umweni wo Muhebheru. Iyena wainga mushandiri wo mutungamiriri wo vangwariri. Patakamuverengera hope jedu, iyena wakadurujira zvainanga hope imwe nga imwe.
13 Zvaakadurujiraro ndizvona zvakazoitika kamare. Inini ndakahwirijihwa pa basa rangu, asi mudoni wangu wakakohomehwa pa mutanda.”
14 Faro wakadanijisa Josefa vomuvhisa mu kadheya* ngo kukasika. Josefa wakagunda ndevhu, wocinja nguvo jake, perapo woenda ka Faro.
15 Faro wakavhunja Josefa kudari: “Inini ndakarota hope. Asi apana na umwe hake anokwanisa kujidurujira. Ndakazwa ngo pamusoro pako kuti ukaverengehwa hope, iwewe unokwanisa kujidurujira.”
16 Ngo kudaro, Josefa wakadavira Faro kudari: “Ndini ani inini! Ndi Mwari anonanga ngo pamusoro po kugara kwenyu ushoni.”
17 Faro wakavhunja Josefa kudari: “Inini ndakarota ndakaima mu mbhiripiri mo Murambo wa Niro.
18 Mu murambo umu makabuda n’gome nomwe jakapunda no kuseja.* Ijona jaihava ndhonvhe yainga* mu mbhiripiri mo murambo uwu.
19 Tevere, makabudazve n’gombe nomwe jokaji, jakaonda no kushata maningi. Inini ndainga ndicizivi kumbovona n’gombe jakaondesa kudaro mu nyika yo Ejipita ino.
20 N’gombe jokuonda jiya joshata, jakatanga kuha n’gombe jokutanga jiya jaingaya jakapunda.
21 Asi pajakapera kuha n’gombe jo kupunda jiyani, ijona jakaenderera mberi jakaonda maningi, inga zvajainga jakaita pakutanga. Apanazve waikwanisa kuzvivona kuti ijona japera kuha n’gombe jimweni. Ngo kudaro, inini ndakavhurumuka.
22 “Pasure pazvo, inini ndakarota musonjoti* munomwe yakakura no kuseja* yainga yakamera pa zonje rimwe basi.
23 Pakabudazve musonjoti* munomwe jainga jakatetepa no kufota ngo kuvhunguzwa ngo mbhepo yo kumavhazuva.
24 Tevere musonjoti* yo kutetepa iyani yakatanga kumija musonjoti yaingaya yakapunda. Perapo inini ndakajiverengera vapiri vo masaramuso. Asi apana na umwe wavo waikwanisa kundidurujira.”
25 Josefa wakavhunja Faro kudari: “Hope mbiri iji ndijona jondhojo. Jinoreva ciro cimwe. Mwari wo cokwadi, ari kuvhunja imwimwi zvaari kuda kuzoita.
26 N’gombe nomwe jakapunda jiri kuimirira makore manomwe. Ndizvona zvondhozvo no musonjoti* munomwe yakaseja.* Inoimiriravo makore manomwe. Hope mbiri iji ndijona jondhojo. Jinoreva ciro cimwe.
27 N’gombe nomwe jakaonda no kushata jakazobudaya pasure po n’gombe jo kupunda, jinoimirira makore manomwe. Musonjoti* munomwe jainga jicina zviro jofota ngo kuvhunguzwa ngo mbhepo yo kumavhazuva, jinoimirira makore manomwe o njara aizotevera.
28 Ndizvona zvandaingaya ndananga mambo: Mwari wo cokwadi ari kumutatija Zvaari kuda kuzoita.
29 “Kunozova no makore manomwe okuti Ejipita yese inonga yakazara ngo zviro zvokuha.
30 Asi pasure po makore aya, panozotevera makore manomwe amweni o njara. Zviro zvese zvokuha zviri mu Ejipita muno, zvinozokanganika. Mu Ejipita mwese munozoitika njara huru.
31 Zvokuha zvakawanda zvinonga zvakaunganijwa mu nyika muno, zvinozokanganika ngo pamusoro po njara inozoteveraro. Ngokuti, njara iyi inonga iri njara icikaiti.
32 Mwari wo cokwadi wamurotesa ruviri shwiro iyi, ngokuti wapera kuironga shwiroyo. Ngo kudaro, Mwari wo cokwadi anozozviita ngo kukasika.
33 “Waro imwimwi mambo Faro, munodikana kugaja mundhu ano uzivi no kungwara, kuti avonerere nyika ino yese yo Ejipita.
34 Mambo Faro, itanyi ciri cese wari uno. Gajanyi vandhu vanozovonerera nyika ino. Imwimwi munodikana kuunganija mututu umwe pa mututu mushanu wo zviro zvinorimwa, pa mukuvo wo makore manomwe o kuivha maningi saja.
35 Ivona ngavaunganije zvokuha zvinozoivha mu makore manomwe o kuivhisa ari kuteverari. Ngavaunganije mbeu jese vecitungamirihwa ndimwi mambo Faro. Ivona ngavavige zvokuha izvi mu madhorobha ese.
36 Zvokuha izvi ngazviite mbuva* inozoshandiswa pa makore manomwe o njara inozoviyari. Kuti njara iyi itame kupeja vandhu vese vo mu Ejipita muno.”
37 Faro no vashandiri vake vese vakadakarira maningi zano iri.
38 Ngo kudaro, Faro wakavhunja vashandiri vake kudari: “Kunowanikazve mundhu umweni ano mujimu wa Mwari inga uwu here?”
39 Faro wakavhunja Josefa kudari: “Zvecivoneka kuti Mwari wakutatija zvese izvi, akuna mundhu umwenizve wakangwara, anouzivi kupinda iwewe.”
40 Iwewe ndiwe unozova mutungamiriri wo muzi wangu. Vandhu vangu vese vanozozwira zvaunonanga kamare. Waunopindhwa ndiyena, ndini basi ngokuti ndiri mambo.
41 Faro wakavhunja Josefa kudari: “Vonai! Ndiri kukugaja kuti utonge Ejipita yese.”
42 Faro wakavhisa mbhete* yake yaaisimira yo cigondiso woisimija Josefa. Wakamusimijazve nguvo jakaseja* no mudhariya* wo goridhi mu musipa make.
43 Cimwenizve, iyena wakamupakija mungoro* yakaseja* maningi yaainga nayo. Ivona vaifamba vecikhuwa* vecinanga kudari: “A·vrékh!”* Ngokuti iyena wainga agajwa kuti atungamirire nyika yo Ejipita yese.
44 Faro wakavhunjazve Josefa kudari: “Inini ndini Faro. Asi apana mundhu anodikana kuita ciri cese mu nyika yese yo Ejipita acizivi kutendehwa ndiwe.”
45 Pasure pa izvi, Faro wakadura Josefa zina ro kuti Zafenati-paneya. Perapo iyena wakamupa Asenati mwana wa Potifera, mupiri wo Oni* kuti aite mukaji wake. Kuvhira pondhopo, Josefa wakatanga kuvonerera Ejipita yese.
46 Josefa wainga ano 30 o makore paakaenda ka Faro mambo wo Ejipita.
Perapo iyena wakavha pamberi pa Faro wofamba nyikeyo yese yo Ejipita.
47 Mukati mo makore manomwe o kuivha zvokuha, nyika yo Ejipita yaiivha zvokuti izanyi muzovona.
48 Iyena wakatanga kuunganija zvokuha mu makore manomwe o kuivha aya mu nyika yo Ejipita. Josefa wakaunganija zvokuha izvi mu madhorobha ese. Mu dhorobha rimwe nga rimwe iyena waiunganija zvokuha zvairimwa mu ndharaundhemo.
49 Josefa wakaenderera mberi eciunganija zvokuha zvakawanda maningi inga musanga wo mujombe. Ivona vakaguma pa kuregera kuzviverenga ngo kuti azvicaiverengekepi.
50 Acito aguma makore o njara, Josefa no mukaji wake Asenati mwana wa Potifera, mupiri wo Oni,* vakabara vana vaviri.
51 Josefa wakadura dangwe rake zina rokuti Manase.* Ngokuti iyena wainanga kudari: “Mwari wandiita kuti ndikanganwe matambujiko angu ese no mbhuri ya babangu.”
52 Wocipiri iyena wakamudura zina ro kuti Efraimi.* Ngokuti wainanga kudari: “Mwari wakandiita kuti ndibare mu nyika yo matambujiko angu.”
53 Perapo, makore manomwe o kuivha ko zvokuha mu nyika yo Ejipita akapera.
54 Makore manomwe o njara akatanga. Inga zvaingaya zvakananga Josefa kamare. Mu nyika jese makaita njara. Asi nyika yese yo Ejipita yainga ino zvokuha.
55 Pejisire, nyika yese yo Ejipita yakazotanga kutambujika ngo njara. Ngo kudaro, vandhu vese vakatanga kucemera* Faro, vecipsaka zvokuha. Asi Faro waivhunja Vaejipita vese kudari: “Endanyi ka Josefa. Itanyi zvese zvaanomuvhunjaro.”
56 Njara yakaenderera mberi pasi pese. Ngo kudaro, Josefa wakatanga kufunungura mwese maaingaya akaunganija zvokuha, ecizvitengesera Vaejipita. Ngokuti njara yainga yanyanya maningi mu nyika yese yo Ejipita.
57 Kunja kwa izvi vandhu vo pasi pese vaienda ku Ejipita kotenga zvokuha na Josefa. Ngokuti njara yainga yandhandhanika pasi pese.
Masoko o Pasi
^ Kana: “kunyara.”
^ Kana: “maushwa o.”
^ Kana: “kunyara.”
^ Bumbu.
^ Kana: “yokunyara.”
^ Bumbu.
^ Bumbu.
^ Kana: “kunyara.”
^ Gama ngo Gama: “rindi.”
^ Kana: “jonyara.”
^ Kana: “maushwa ainga.”
^ Bumbu.
^ Kana: “yonyara.”
^ Bumbu.
^ Bumbu.
^ Bumbu.
^ Kana: “yakanyara.”
^ Bumbu.
^ Zvokuha.
^ Kana: “aneri.”
^ Kana: “jakanyara.”
^ Kana: “muzororo.”
^ Kana: “mukareta.”
^ Kana: “yakanyara.”
^ Kana: “vacimima.”
^ Gama iri kangaije rinoshandiswa pa kudanija vandhu vamweni kuti vareremeje mundhu ari wese.
^ Kana kuti, Heriyoporisi.
^ Kana kuti, Heriyoporisi.
^ Zina iri rinoreva kuti “Anoita kuti Ukanganwe.”
^ Zina iri rinoreva kuti “Kuwanda Zvakapethwa Ruviri.”
^ Kana: “kuririra.”
