Genesisi 34:1-31
34 Dhaina mwana wa Jakobe waakabara na Reya, kazinji waiyenda kobungaija* no vasikane vo munyikemo.
2 Shekemi mwana wa Amori, Muhivhi, dhodha ro munyikeyo, paakavona Dhaina, wakamutora ngo hasha, womujipa.
3 Shekemi wainga acikadizve kusiyana na Dhaina mwana wa Jakobe. Iyena wakamuda, perapo womuvhunjirira.
4 Pejisire, Shekemi wakavhunja Amori baba wake kuti: “Ndipsakirenyi musikane uwo kuti aite mukaji wangu.”
5 Jakobe paakazwa kuti Shekemi wasvipisa Dhaina, vana vake vainga vari kumahavo. Ngo kudaro, Jakobe wakaenderera mberi akanyararisa mbhera vana vake vaviye.
6 Pakufamba ko nguva, Amori baba wa Shekemi vakaenda kobhuya na Jakobe.
7 Asi vana va Jakobe povakazvizwa, vakaenda kanyi ngo kukasika. Ivona vakahwajihwa, vonyangajwa maningi ngokuti iyena wainga apseruja Iziraeri ngo kuvatana no mwana wa Jakobe. Zviro izvi azvicaidikanepi kuithwa.
8 Amori wakabhuya navo eciti: “Mwana wangu Shekemi ari kuda maningi mwana wenyu. Tapota, mupekejenyi kuti aite mukaji wake.
9 Ngatiite citenderano co kurovorerana.* Tipekejenyi vasikane venyu, itusu timupekejevo vasikane vedu.
10 Garanyi na itusu, mungakheta pamunoda kugara mu nyika muno. Garanyi, muite nyagoso jenyu mukhupuke.”*
11 Shekemi wakananga kudari kuna babake Dhaina no hama jake: “Ndiitirenyivo unyasha, inini ndinozoita ciri cese camunozondikumbira.
12 Imwimwi ndikumbirenyi mare yamunodaro no zvipo zvamunoda. Inini ndinozomupekeja ciri cese camunondikumbiraro. Candinoda basi, musikane uwu kuti aite mukaji wangu.”
13 Vana va Jakobe vakadavira Shekemi na baba wake vanodanijwa kuti Amori ngo njira yo kuvacengejera ngokuti iyena wainga asvipisa hambzaji yavo Dhaina.
14 Ivona vakavadavira kudari: “Itusu atizoiti zviro zvakadaro, atizopekeji hambzaji yedu mwanarume acizivi kusokwa,* ngokuti zviro izvi zvinotipseruja.
15 Itusu tinozomutendera kudari mukaita izvi: Munodikana kuita inga ndusu, mosoka* vanarume venyu vese.
16 Itusu tinozomupa vasikane vedu, imwimwi motipa vasikane venyu. Perapo, tinozogara tese, tova vandhu vamwe.
17 Asi kudari mukatama kutizwira, motama kusokwa,* itusu tinozotora musikane wedu topinda.”
18 Zvovakanangari zvakadakajisa Amori na Shekemi mwana wa Amori.
19 Shekemi aazivi kunonoka kuita zvaakakumbihwaro, ngokuti iyena waida maningi Dhaina mwana wa Jakobe. Iyena waireremejwa ngo vandhu vese vo pamuzi pa baba wake.
20 Ngo kudaro, Amori na Shekemi vakaenda pa musuvo wo dhorobha, vovhunja vanarume vese kuti:
21 “Vandhu avo vanoda kuita runyararo na itusu, ivona vangatogara munyika muno veciita nyagoso yavo, ngokuti nyika iyi yakakura maningi zvokuti ivona vanotokwana kugaravo muno. Itusu tingarovora vasikane vavo, ivona vecirovoravo vedu.
22 Ivona vanozotendera kugara munyika muno tova vandhu vamwe, kudari tikatendera kuita zviro izvi: kuti vanarume vese vasokwe,* ngokuti ivona vakasokwavo.*
23 Tikadaro atizogari utaka zviro zvavo zvese no mushambi javo? Waro ngatitendere zvavanodaro kuti tigare naivona.”
24 Vandhu vese vaibuda kunja ngo musuvo wo dhorobha rake, vaizwa zvaiverekethwa ndi Amori no mwana wake Shekemi. Vanarume vese vakasokwa,* vese vaibuda ngo musuvo wo dhorobha iri.
25 Asi pa njiku yocitatu, vanarume vese vacazwa kuhwajihwa, vana vaviri va Jakobe, Simiyoni na Revhi hama ja Dhaina, umwe na umwe wavo wakatora banga, vonghwina mu dhorobha rainga ricikazivi kujivirihwa. Vouraya vanarume vese.
26 Ivona vakauraya Amori no mwana wake Shekemi ngo banga. Perapo, vakatora Dhaina ku muzi wa Shekemi vopinda naye.
27 Vana vamweni va Jakobe, vakaviya vokhanda vanarume vese vakafa, votora zviro zvese zvomudhorobhemo, ngokuti vainga vasvipisa hambzaji yavo.
28 Ivona vakatora mavhuta, n’gombe no mbongoyo javo no zvese zvainga zviri mudhorobha no zvainga kumahavo.
29 Ivona vakatora zvese zvovainga nazvo, vana vavo no vakaji vavo. Votorazve zviro zvese zvainga zviri mumba.
30 Ngo kudaro, Jakobe wakavhunja Simiyoni na Revhi kudari: “Imwimwi mandiviisira dambujiko guru, mondiita kuti ndizondhwe ngo vandhu vese vanogara munyika ino, Vakhanani no Vaperezi. Itusu tiri vashoma. Zvokadi kamare ivona vanozobatana pamwepo vondihwisa. Inini ndinozourawa kamare, inini no muzi wangu wese.”
31 Ivona vakati: “Ivona vaizviitirenyi kuti hambzaji yedu iite inga hure?”
Masoko o Pasi
^ Kana: “kovona.”
^ Kana: “mutingatori.”
^ Kana: “muganye.”
^ Kana: “kucekwa suna.”
^ Kana: “moceka suna.”
^ Kana: “kucekwa suna.”
^ Kana: “vacekwe suna.”
^ Kana: “vakacekwavo suna.”
^ Kana: “vakacekwa suna.”
