“Nikneki xio Columbia kanin kichiuaj grabaciones, ompa Nueva York, para titlakuikas uan kuali kichiuaskej grabación. Amo ikaj xikilui”.

Itlamian 1913, tokni Charles Taze Russell okinauati William Mockridge ma kichiua nin tekitl. a Se tlakuikali tlen itoka “The Sweet By-and-By” (“El día sin igual” nesi itech se amochtlakuikal ika español tlen kipiaj iTlaixpantijkauan Jehová) okichijkej grabaciones ika discos de 78 revoluciones sejse minuto. Satepan, William okimatki motekitiltiskia itech “Foto-Drama de la Creación”, itech non tlamauisol okinpiaya videos, tlaixkopinalmej tlen okinchijchijkej itech cristal uan tokniuan okinchijkej grabaciones tlen otlajtoayaj itech Biblia uan noijki itech tlakuikalmej. “Foto-Drama” okiski enero 1914 ompa Nueva York.

Grabación tlen okichi William noijki opouiaya itech 50 discos tlen okintlaliayaj itech gramófonos ijkuak okitlaliayaj “Foto-Drama” ika tlajtoli inglés. Nochi tlatsotsonali tlen omotekitilti itech “Foto-Drama” okichijkej akinmej amo omomachtiayaj Biblia. Pero seki tlakuikalmej ken tlen otlakuikak William otetlakejkej ma kichiuilikan grabación. Seki tlakuikalmej yokatkaj, pero letra san okikixtijkej itech amochtlakuikal Himnario de la Aurora del Milenio ika inglés.

ITlaixpantijkauan Jehová miak xiuitl otlakuikayaj tlen oksekimej okijkuiloayaj, pero okipatiliayaj ijkuak amo omouikaya iuan tlen tlamachtia Biblia.

Se neskayotl, se tlakuikali tlen kipia “Foto-Drama” itoka “Our King Is Marching On!” (“¡Aquí está nuestro rey!”, ijkon ken kajki itech amochtlakuikal Himnario de la Aurora del Milenio ika español), nin san okiyektlalijkej uan okikixtijkej itech tlakuikali “The Battle Hymn of the Republic” (El himno de batalla de la República). Nin himno ijkin peua: “Onikitak uits toTeko”. Pero akinmej omomachtiaya Biblia okipatilijkej letra uan ijkin okijtoaya: “Yinikita toTeko”. Ika nin okiteititijkej yejuan amo okineltokayaj Cristo amo tlanauatis san kanaj keski xiuitl, okachi kuali, uejkauas (Mateo 24:3).

Itech 1966 okiski amochtlakuikal tlen itoka: “Cantando y acompañándose con música en su corazón”. Itech nin amochtlakuikal omochijchikajkej ayakmo kitlaliliskej tlakuikalmej tlen oksekimej okinchijchiuayaj noso tlen inmiaxka tlaneltokalismej. Itech non xiuitl iTlaixpantijkauan Jehová okitlalijkej se orquesta para ma kinchiuakan 119 tlakuikalmej. Tokniuan okintlaliayaj tlakuikalmej itech intlanechikol uan noijki okinkakiayaj ijkuak okatkaj inkalijtik.

Itech 2009 iTlaixpantijkauan Jehová okikixtijkej se amochtlakuikal tlen itoka Ma tiktlakuikilikan Jehová. Noijki okichijkej ika coro uan orquesta ika miakej tlajtolmej. Itech 2013, opejki kinchiuaj videos kanin tlakuikaj para konemej. Se itoka Nimotlatlaujtis kan niyetos. Sejse metstli kinkixtiaj sapanoa miakej itech jw.org.

Miakej kintlasojkamatij ninmej tlakuikalmej. Se siuatl tlen itoka Julie, okijkuilo nin itech amochtlakuikal Ma tiktlakuikilikan Jehová: “¡Yankuikej tlakuikalmej sapanoa kualtsitsintin! Ijkuak nika noselti, nikinkaki tlen kiteititiaj ken nimomachilia. Ninmej nechpaleuiaj ma nikita axkan okachi kuali nimouika iuan Jehová. Axkan okachi nikneki niktekichiuilis Jehová”.

Heather kinpia ome ikoneuan, se kipia chikome xiuitl uan okse chiknaui xiuitl, kijtoa tlakuikali Nimotlatlaujtis kan niyetos oajsik itech inyolo konemej. Kijtoa: “Axkan motlatlaujtiaj pero amo san ijkuak meuaj noso ijkuak touan katej, kichiuaj ijkuak yejuan kinekij motlapouiskej iuan Jehová”.