TLAMACHTIL 04
¿Akin toTajtsin Dios?
Yimiak xiuitl miakej kinueyichiuaj dioses pero Biblia kijtoua kajki san se toTajtsin Dios tlen melauak ueyititok (2 Crónicas 2:5). ¿Akin ye uan tleka san ye ueyititok uan amo dioses tlen oksekimej kinueyichiuaj? Itech nin tlamachtil tikitas tlen kineki toTajtsin Dios xikmati.
1. ¿Ken itoka toTajtsin Dios uan ken tikmatij ye kineki matikmatikan itoka?
Ika Biblia ye techmatiltia ken itoka. Ye techiluia: “Ne niJehová. Ijkon notoka” (xiktlajtolti Isaías 42:5, 8). Sekimej ixtlamatkej kijtouaj tokayotl Jehová ika hebreo kijtosneki “Ye kichiua mamochiua”. Jehová kineki matikmatikan ken itoka (Éxodo 3:15). ¿Ken tikmatij? Porque ye okichi makijkuilokan itoka kanaj 7,000 veces itech Biblia. a Itoka Jehová “akin melauak toTajtsin Dios ompa iluikak uan nikan tlaltikpak” (Deuteronomio 4:39).
2. ¿Ken techpaleuia Biblia matikixmatikan Jehová?
Biblia kijtoua katej dioses tlen oksekimej kinueyichiuaj pero san Jehová akin melauak toTajtsin Dios. ¿Tleka ijkon tikijtouaj? Porque Jehová ye akin ‘okachi Ueyititok ipan nochi tlaltikpak’ (xiktlajtolti Salmo 83:18). Ye sapanoua chikauak non kijtosneki uelis kichiuas nochi tlen ye kineki. Noijki ye okichijchi nochi “tlen onka” ompa iluikak uan okseki tlamantli tlen onka nikan tlaltikpak (Apocalipsis 4:8, 11). Jehová nochipa kajki uan amo keman ixpoliuis (Salmo 90:2).
MATIMOMACHTIKAN
Tikitaskej tleka san toTajtsin Dios kinamiki itoka. Noijki tikitaskej ken techmatiltia itoka uan tleka kineki matikmatikan.
3. Tlatlamantli kinotsaj toTajtsin Dios pero kipia san se itoka
Ikaj uelis tlatlamantli kitokayotiskej pero kipia san se itoka, xikitakan VIDEO uan satepan xikitakan tlen namechmachtia.
-
¿Tleka se tlamantli kijtosneki ikaj kinotsaskej “tlakatl” uan okse tlamantli kijtosneki kinotsaskej ika itoka?
Biblia kijtoua miakej kinueyichiuaj dioses noso oksekimej. Xiktlajtoltikan Salmo 136:1-3 uan satepan xikitakan tlen namechmachtia.
-
¿Akin melauak toTajtsin Dios?
4. Jehová kineki xikixmati itoka uan ijkon xiknotsa
¿Ken tikmatij Jehová kineki xikixmati itoka? Xikitakan VIDEO uan satepan xikitakan tlen namechmachtia.
-
¿Tleka timokuayejyekoua Jehová kineki matikixmatikan itoka?
Jehová kineki matiknotsakan ika itoka. Xiktlajtoltikan Romanos 10:13 uan satepan xikitakan tlen namechmachtia.
-
¿Tleka moneki matiknotsakan toTajtsin Dios ika itoka?
-
¿Ken timomachilia ijkuak ikaj mitsnotsa ika motoka?
-
¿Ken momachilia toTajtsin Dios ijkuak tiknotsaj ika itoka?
5. Jehová kineki iuan ximouika
Se siuatl tlen oneski ompa Camboya uan itoka Soten, okijto miak ipati tikmatiskej itoka toTajtsin Dios. Xikitakan VIDEO uan satepan xikitakan tlen namechmachtia.
-
Ijkon ken otikitakej itech video, ¿ken okipaleui Soten ijkuak okimatki itoka toTajtsin Dios?
Tla tiknekij ikaj iuan timouikaskej, achto moneki tikmatiskej itoka. Xiktlajtoltikan Santiago 4:8a uan satepan xikitakan tlen namechmachtia.
-
¿Tlen kineki Jehová xikchiua?
-
¿Tikneltoka mitspaleuis timouikas iuan toTajtsin Dios tla tiknotsa ika itoka? ¿Tleka ijkon tikijtoua?
SEKIMEJ KIJTOUAJ: “Onka san se Dios, ikinon uelis tiknotsaskej san ken tiknekiskej”.
-
¿Tikneltoka toTajtsin Dios itoka Jehová?
-
¿Ken uelis tikinyekiluis oksekimej toTajtsin Dios kineki matiknotsakan ika itoka?
XIKILNAMIKTO
Akin melauak toTajtsin Dios itoka Jehová. Ye kineki matikmatikan itoka uan ijkon matiknotsakan para uelis iuan timouikaskej.
Matikojpauikan
-
¿Tleka Jehová amo ijkon ken oksekimej dioses tlen miakej kinueyichiuaj?
-
¿Tleka moneki tiknotsaskej toTajtsin Dios ika itoka?
-
¿Kineki Jehová iuan ximouika? ¿Ken tikmati?
NIN NOIJKI MITSPAKTIS
Ximomachti makuili tlamantli tlen kiteititia melauak kajki toTajtsin Dios.
“¿Melauak kajki Dios?” (Nin tlamachtil kajki itech jw.org/ncx)
Xikita tleka uelis tikijtoskej toTajtsin Dios yokatka uan nochipa yetos.
“¿Akin okichijchi toTajtsin Dios?” (Akin Tetlapouijtok, 1 de agosto 2014)
Xikita tleka uelis tiknotsaskej toTajtsin Dios ika itoka maski amo tikmatij ken okitenkixtiayaj achto.
¿Uelis tiknotsaskej toTajtsin Dios san ken tiknekiskej? Xikita tleka tikijtouaj toTajtsin Dios kipia itoka.
“¿Kipia tlatlamantli itoka toTajtsin Dios?” (Nin tlamachtil kajki itech jw.org/ncx)
a Itech Amatlajkuilol tlen mitspaleuis timomachtis iTlajtol toTajtsin Dios tlaxelol 1, tikajsis tlen kijtosneki itoka toTajtsin Dios uan tleka itech seki Biblias amo ijkuilitok.
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
