Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Jehová mitstlatlaujtia iuan ximokuepa

 TLAXELOL 2

Tlen techtekipachoa: “Nochipa timotekipachojtokeh”

Tlen techtekipachoa: “Nochipa timotekipachojtokeh”

“Maski otikpiayaj 25 xiuitl otimonamiktijkej, nonamik uan ne otimokajkajkej inmixpan tekiuajkej. Tokoneuan ayakmo okinekiayaj momachtiskej Biblia. Uan opejki nimokokoa. Ik non, opejki sapanoa nimoyolkokoa. Onikmachili nochi onikpolo, ayakmo itlaj oniknekiaya nikchiuas. Satepan ayakmo onimonechikoaya uan ayakmo onitetlapouiaya.” (June)

TINOCHTIN uan noijki tiitekipanojkauan Jehová titlajyouiaj. Salmista otlajkuilo: “Sapanoa nimotekipachoa” (Salmo 94:19). Uan Jesús okijto itech saiktlami tonalmej yetoskia sapanoa oui tiktekichiuiliskej Jehová pampa nochi tlen uelis techtekipachos ken “tlan onka itech nin tlaltíkpaktli” (Lucas 21:34). ¿Mitstekipachoa pampa amo onka tomin, ikaj mokokoa noso tikpia seki ouijkayotl iuan mokalchanejkauan? ¿Ken uelis mitspaleuis Jehová?

“Weletílistli amo toaxka, yej wits de Dios”

Pampa tikxikoskej tlajyouilistli moneki ikaj ma techpaleui. Tlatitlanil Pablo okijto: “Maya nochipa timotekipachojtokeh [...], maya techtlamotla”, “nochipa timakisah”, pampa “maya tikpiah tlan techtekipachoa, ayik timosotlawah. [Uan] amo techpojpoloskeh”. ¿Akin techpaleuia? Biblia kijtoa: “N weletílistli amo toaxka, yej wits de Dios” (2 Corintios 4:7-9).

Ximokuayejyeko ken Jehová omitspaleui. ¿Tikilnamiki se tlamachtil kanin otikajsikamatki Jehová sapanoa mitstlasojtla? ¿Omochikauaya motlaneltokilis ijkuak otikintlapouiaya oksekimej itech tlen tikseliskej itech Xochitlali? Tonechikoluan uan tetlapouilistli techyolchikauaj pampa tikxikoskej nochi tlajyouilistli tlen techpanoa uan noijki techmaka yolseuilistli pampa ma tiktekichiuilikan Jehová ika pakilistli.

“Xikyejyekokan uan xikitakan Jehová yolkuali”

Jehová kineki ma tiktemokan achto Tekiuajkayotl uan nochipa ma tikpatioitakan teotekitl (Mateo 6:33; Lucas 13:24). Uelis ayakmo okachi tiktekichiuilia Jehová pampa timokokoa, noso mokalchanejkauan uan moyolikniuan amo kinekij xiktekichiuili. Noso uelis amo timonechikoa pampa tikpia miak tekitl. Ken tikpia miak tekitl uan amo timajxilia uelis sapanoa tisotlaua. Uan uelis timokuayejyekoa Jehová kineki xikchiua miak tlamantli.

Pero Jehová kajsikamati tlen tikmachilia uan amo mitsiluia xikchiua tlamantli tlen amo uelis tikchiuas. Ye kimati ijkuak techtekipachoa seki tlamantli, moneki ma pano seki kauitl pampa kuali timoyektlaliskej (Salmo 103:13, 14).

Ximokuayejyeko ken Jehová okimalui Elías. Se tonal nin teotlajtojki omomojti uan ocholo kanin tlauaki. ¿Tlen okichi Jehová? ¿Okijto itlaj amo kuali okichi? ¿Okinauati san niman ma mokuepa pampa uelis kichiuaskia tlen Jehová okinauati? Amo ijkon okichi. Ome uelta okititlanki se ángel pampa yolik ma kijxiti Elías uan ma kitlamaka. Pero 40 tonal satepan Elías ok omotekipachoaya. ¿Tlen okichi Jehová pampa kipaleuis? Achto, okititi uelis kimaluiskia. Ome, Jehová okiyolseui ijkuak yolik uan kuali okitlapoui. Uan noijki okilui amo iselti okatka, pampa  sapanoa miakej tlaltikpaktlakamej okiueyichiuayaj Jehová ika yolmelajkayotl. Ika nochi nin Elías omoyolchika pampa uelis oksepa uan ika miak chikaualistli tekitiskia ken teotlajtojki (1 Reyes 19:1-19). ¿Tikajsikamati? Ijkuak Elías sapanoa otlajyouijtoka Jehová okiknomatki uan amo okualanki. Axkan Jehová noijki ijkon kichiua. Motech motekipachoa ijkon ken omotekipacho itech teotlajtojki.

Amo xikijto achto okachi kuali otiktekichiuiliaya Jehová uan axkan ayakmo. Ijkuak ikaj akin motlaloa miak metstli amo motlaloa, amo san niman uelis kichiuas ken achto. Moneki yolik kichiuas seki tlamantli pampa okachi kipias chikaualistli uan tlaxikos. Noijki ijkon akinmej tikchiuaj ken Cristo: moneki tikchiuaskej seki tlamantli pampa tikchiuaskej tlen tiknekij (1 Corintios 9:24-27). ¿Yotimokuayejyeko itech seki tlamantli tlen uelis tikchiuas? ¿Uelis tikneki tias se nechikol? Xiktlajtlanili Jehová ma mitspaleui pampa tias se nechikol. Ijkuak okachi timoyolchikauas, tikitas ken Jehová sapanoa yolkuali (Salmo 34:8). Uan amo xikilkaua, maski san seki tlamantli tikchiuas pampa tikteititis melauak tiktlasojtla, Jehová kipatioita miak (Lucas 21:1-4).

Tlen Jehová techiluia ma tikchiuakan amo keman techsotlaua

Tlen notech omonekiaya

¿Ken Jehová okiyolchika tokni June? Tokni kijtoa: “Nochipa oniktlatlaujtiaya Jehová uan onikiluiaya ma nechpaleui. Se tonal nosiuamon onechilui itech noaltepe mochiuaskia se ueyi nechikol uan onikijto niaskia maski san se tonal. ¡Sapanoa kuali oksepa niyetos iuan ialtepe Jehová! Non ueyi nechikol sapanoa onechpaleui. Axkan oksepa niktekichiuilia Jehová uan sapanoa niyolpaki. Onikmatki moneki amo keman ma nimoxelo uan ma nikseli intlapaleuilis tokniuan. Niyolpaki nikmatis san niman onimokuepki iuan Jehová”.