Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Jehová mitstlatlaujtia iuan ximokuepa

 TLAXELOL 4

Ijkuak tikmachilia motlajtlakol: “Xinechchipaua itech notlajtlakol”

Ijkuak tikmachilia motlajtlakol: “Xinechchipaua itech notlajtlakol”

“Onechmakakej se tekitl tlen okichi okachi kuali ma yetokan nokalchanejkauan, pero opejki nikchiua seki tlamantli tlen amo moneki kichiuas se itekipanojka Jehová. Opejki niiluichiua ken tlaltikpaktlakamej, onimokalaki itech política uan opejki nio teopan. Opanok 40 xiuitl amo oniktekichiuiliaya Jehová. Ijkuak okachi onimouejkauaya onikneltokaya okachi oui nechtlapojpoluis. Uan nion ne amo onimotlapojpoluiaya, pampa onikmatiaya tlen melauak, pero onikpejpenki nikchiuas tlen amo kuali.” (Martha)

IJKUAK timokuayejyekoaj totlajtlakol, uelis sapanoa oui tikitaskej timokuepaskej. Se neskayotl, ueyi tekiua David sapanoa otlajyoui pampa okichi tlen amo kuali, ik non, okijto: “Ken itlaj tlen sapanoa etik, sapanoa etik pampa ne” (Salmo 38:4). Sekimej tokniuan sapanoa moyolkokoaj pampa kineltokaj Jehová amo keman kintlapojpoluis (2 Corintios 2:7). ¿Tikneltoka uejka tika itech Jehová pampa itlaj amo kuali otikchi? ¿Tikneltoka otikchi se ueyi tlajtlakoli uan Jehová amo mitstlapojpoluis? Ximoyolseui, Jehová kineki mitspaleuis.

“Ma tikyektlalikan ouijkayotl tlen tikpiaj”

Jehová nochipa kinselia akinmej moyolkuepaj. Uan kineki kinpaleuis. Itech neskayotl itech telpochtli tlen okauilti itomin, Jesús okijto nin telpochtli okiski itech ikalijtik pampa auilnemis, pero seki kauitl satepan okinek mokuepas. ¿Tlen opanok ijkuak omokuepki? “Iwa [telpochtli] ok wejka owalaya, ita okonitak iwa saikpanoa okiknoma. Omotlelo okinamikito, okinanawajtek iwa okiixtennamik.” (Lucas 15:11-20.) Jehová ken nin teta tlen sapanoa tetlasojtla uan teiknomati. ¿Tikneki iuan timotokis pero tikmachilia uejka tika? Xikneltoka ye mitschixtok ximoyolkuepa.

¿Tikneltoka sapanoa otitlajtlakolchi noso sapanoa amo kuali tlen otikchi uan Jehová amo keman mitstlapojpoluis? Ximokuayejyeko itech yoleualistli tlen ijkuilitok itech Isaías 1:18: “‘Xiualakan, axkan, uan ma tikyektlalikan ouijkayotl tlen tikpiaj,’ kijtoa Jehová. ‘Maski totlajtlakoluan yetoskej ken escarlata, mokuepaskej istakej ken nieve’”. Melauak, Jehová uelis kintlapojpoluis akinmej tlajtlakolchiuaj maski yetos ken se tlakemitl istak tlen omosokioti ika itlaj chichiltik.

Jehová amo kineki ximoyolkoko pampa tikneltoka motlajtlakol tlen otikchi. Pero melauak ximoyolseui ijkuak toTajtsin Dios mitstlapojpoluia uan axkan ayakmo itlaj mitstekipachoa. ¿Tlen uelis tikchiuas pampa ijkon timomachilis? Ijkon ken okichi ueyi tekiua David. Achto ye okijto: “Nikiluis Jehová nochi notlajtlakoluan” (Salmo 32:5). Jehová yomitsilui: “Ma tikyektlalikan ouijkayotl tlen tikpiaj”. Xikilnamiki Jehová mitsyoleua iuan ximotoki uan xikchiua ijkuak timotlatlaujtia. Xikilui tlen amo kuali otikchi uan xikilui ken timomachilia. Ken David, akin ika miak tlaneltokilistli okitlatlaujti Jehová: “Xinechchipaua itech notlajtlakol”. Uan noijki okijto: “Se yolotl tlen moyolkokoa,  toTajtsin Dios amo tikixtopeuas” (Salmo 51:2, 17).

Noijki David okiseli tlapaleuilistli tlen okimakak Natán se itekipanojka toTajtsin Dios (2 Samuel 12:13). Axkan Jehová itech tlanechikolmej okintlali tlayekankej. Ninmej tokniuan okinmachtijkej pampa kinpaleuiskej akinmej otlajtlakolchijkej oksepa ma mouikakan iuan Jehová. Ijkuak timotlapouis iuan tokniuan tlayekankej yejuan ika Biblia mitspaleuiskej ma mochikaua motlaneltokilis. Noijki mouan motlatlaujtiskej pampa ayakmo ximoyolkoko nion ayakmo ximokuayejyeko itech tlen amo kuali otikchi (Santiago 5:14-16).

Jehová kineki amo itlaj ma mitsyolkoko

“Yolpaki akin okitlapojpoluijkej itlajtlakol”

Tikiluis Jehová motlajtlakoluan noso tikintlapouis tlayekankej tlen otikchi uelis yetos oui. Uan noijki David okitak oui. Biblia kijtoa seki kauitl amo ikaj okilui tlen amo kuali okichi (Salmo 32:3). Pero satepan okitak ken okipaleui kijtos nochi uan okiyektlali nochi tlen amo kuali okichi.

David okiseli miakej tlateochiualismej, pero ye oksepa oyolpakik. Ye okijto: “Yolpaki akin okitlapojpoluijkej itlajtlakol, uan itlajtlakol poliui” (Salmo 32:1). Noijki okitlatlaujti toTajtsin Dios: “Oh Jehová, xiktlapo nokamak, pampa nokamak ma kitematilti moueyichiualis” (Salmo 51:15). David omoyolseui uan okitlasojkamatili Jehová, uan non okichi ma kiueyichiua inmixpan oksekimej tlaltikpaktlakamej.

Jehová kineki amo itlaj ma mitstekipacho. Kineki xiyolpaki ijkuak tikintlapouis oksekimej itech ye uan tlen kichiuas, uan amo itlaj ma mitstekipacho uan kuali ma yeto moyolo (Salmo 65:1-4). Jehová techiluia: “Ayakmó xikchiwakah tlajtlákoli iwa xiktlakitakah Dios. Ijkó Ye kilkawas nochi tlan amo kuali ononkichijkeh, iwa nomechmakas yankuik chikawálistli” (Hechos 3:19).

Martha kijtoa: “Notelpoch onechtitlaniliaya revistas Akin Tetlapouijtok uan ¡Despertad! Yolik oksepa opejki kuali nimouika iuan Jehová. Okachi oui niktlatlaujtis ma nechtlapojpolui pampa nochi tlajtlakoli tlen onikchi. Pero oniktlatlaujti. ¡Opanok 40 xiuitl uan onimokuepki iuan Jehová! Tlen onechpanok, techilnamiktia maski miak xiuitl timoxeloskej itech Jehová, ye techkauilia oksepa ma tikitakan ye techtlasojtla uan ma tiyetokan iuan ialtepe”.