Itech Biblia, tajtol griego tein kemansa mokepa kemej “tein melauak” kijtosneki teisa tein kuali yetok. No kiteajsikamatiltia se taman tein kualtsin uan tein motelneki tein tapaleuia maj se chipaujkanemi.

Akin kichiuayaj kemej Cristo kiitakej ke motelnekia tein kijtoj Pablo, se imomachtijkauj Jesús: “Tiknekij timonejnemiltiskej timelaujkej itech nochi”. ¿Toni kijtosneki nejon tajtolmej?

Miakej moixitaj itech teskat achto ke kisaskej ininkalijtik. ¿Keyej? Porin kinekij kuali moitaskej. Sayoj ke, maj kuali se moita amo yejua tein okachi tayekantok. Tein melauj, kemej titamatij uelis techpaleuis maj kuali timoitakan oso amo.

Biblia kiyekijtoua ke tiknejnekij tikchiuaskej tein amo kuali. Génesis 8:21 kijtoua: “Iyolo taltikpaknenkej kiuika maj kichiua tein amo kuali uan nejon peua keman konetok”. Komo tiknekij timelaujkanemiskej, moneki tikixnamikiskej totanejnekilis tein amo kuali. Pablo se itatojtokakauj Cristo kimelauak keniuj kiixnamikia tajtakol. Yejua kijtoj: “Nimoyolajxilia ke nejua semi nechyolpaktia ne tanauatil de Dios ten yetok tech notalnamikilis. Pero no nikyolitstok ke yetok okse uelilis ten nechmapachojtinemi tech notalnamikilis. Uan ne okse uelilis kixnamiktinemi nejua notalnamikilis ten kineki kichiuas ten kuali. Uan ne okse uelilis tiktokaytiaj netalnamikilis de tajtakol. Uan yejua ne nechmautok ika tajtakol uan no nechyolkitskijtinemi uan nechtsijtsikojtinemi keme yeskia nejua nipreso iuan” (Romanos 7:22, 23).

Kemej neskayot, komo tikixnamikij se taman tein uelis techuikas maj tikchiuakan tein amo melauak, amo onkak keyej tikchiuaskej, uelis timotsakuiliskej. Amo kuali tanejnekilismej amo techixyekana; tejuan tikixpejpenaj ox tikchiuaskej tein kuali oso amo. Keman tikixtopeuaj se amo kuali tanemilil, tikixpejpenaj timelaujkanemiskej itech nejin taltikpak kampa miakej amo melaujkanemij.

Akin kineki melaujkanemis moneki senkis kiixtalis ijkon kichiuas. Tetayokoltij tikijtoskej ke miakej okachi kitemouaj maj kuali kinitakan ke kichiuaskej tein melauak. Ijkuak kichiuaj teisa tein amo melauak, kitemouaj motenpaleuiskej komo kiitaj ke kinualkuilia tein yejuan kinekij. Amaix The (Honest) Truth About Dishonesty (Kemej [yekmelauj] monextia tein amo melauak) ika tajtoua nejin taman: “Titakajkayauaj hasta kampa uelis techpaleuis maj tiknemilikan ke tiksentokaj timelaujkanemij”. Sayoj ke, ¿toni uelis techpaleuis maj tikixejekokan ox kemansa kinamiki maj amo timelaujkanemikan?

Millones akin nemij semanauak taltikpak kiitanij ke Biblia kuali taixyekana. ITajtol Dios kipia tanauatilmej tein okachi kuali (Salmo 19:7). Uelis titakuaujtamatiskej ke techixyekanas kemej kalyetouanij,  itech tekit, kemej timonejnemiltiskej uan keman tiktemoskej timotokiskej iuan Dios. Tayolmajxitilis tein kipia kisentoka tapaleuia. Itanauatiluan uan tein tamachtia kinpaleuia akin yeski. Komo tikixtajtoltiaj Biblia, titanemiliaj itech tein kijtoua uan tikchiuaj tein ompa timomachtiaj, tikmatiskej timelaujkanemiskej ika nochi toyolo.

Sayoj ke, kemej tinemij kampa amo melaujkanemij uan tachikaujkauiaj maj no ijkon se monejnemilti, amo moneki sayoj tikmatiskej tein kijtoua Biblia. Komo tiknekij timelaujkanemiskej moneki tiktataujtiskej Dios maj techpaleui (Filipenses 4:6, 7, 13). Ijkon ika yolchikaualis uelis tikijtoskej tein melauak uan timelaujkanemiskej itech nochi.

Hitoshi, akin ika titajtojkej itech yekinika tamachtilis, semi kipaleuij maj oksekin kiixmatinij kemej se tekitikej akin melaujkanemi porin se akin kiita ke moneki maj se melaujkanemi kitakeuak. Hitoshi kijtoua: “Semi nimotasojkamati. Uelik nikajsik se tekit tein nechpaleuia maj nikpia se kuali tanemilil”.

Oksekin no ijkon kinpanouani. Xiontanemili itech tein kinpanok sekin akin kinpaleuij keman ‘monejnemiltijkej melaujkej itech nochi’ ijkon kemej tayolmajxitia Biblia.

• Amo kinkuejmoloua inintanemilil

  “Nikauak kaltamachtiloyan keman nikpiaya 13 xiujmej porin peuak ‘nitekiti’ iniuan seki tachtekinij. Itech nochi tomin tein niktania, 95% katka ika takajkayaualis. Satepan nimonamiktij uan nejua uan nonamik peuak timomachtiaj Biblia iniuan itaixpantijkauan Jiova. Tikmatkej ke Jiova * kitauelita tachtekilis, yejua ika tikixtalijkej tikpataskej tonemilis [Proverbios 6:16-19]. Itech xiuit 1990 timoauijkej uan timochiujkej tiitaixpantijkauan Jiova.

  “Achto nokalijtik nikpiaya miak taman tein nikichtekka, sayoj ke amook. Axkan ke nimelaujkanemi, amo nechkuejmoloua notanemilil. Ijkuak nitanemilia keman nitachtekia, niktasojkamatilia Jiova maj nechtapojpoluiani. Amo onkak okse taman tein okachi kuali ke ijkuak nikochitiuj nikmatis ke nikyolpaktijtok Jiova” (Cheryl, Irlanda).

  “Keman noteko kimatik ke amo nikselij tomin tein se takoujkej nechmakaya porin kinekia maj nikchiua tein amo melauak, nechiluij: ‘MoDios mitspaleuiani ximochiua takuaujtamach. Semi kuali xitekiti itech nejin tekitiloyan’. Nimelaujkanemis kichiua maj nikpia se kuali tanemilil iixpan Jiova. Uan no ueli nikinpaleuia nochankauan uan oksekin maj no ijkon kichiuakan” (Sonny, Hong Kong).

• Kipiaj yolseuilis

  “Nitekiti kemej akin tapaleuia maj okachi motani tomin itech se banco tein moajsi noyampa. Itech nejin taman tekit okachi kitayekanaltiaj se kitanis tomin uan amo se melaujkanemis. Nochin kinemiliaj: ‘Komo se kitani okachi tomin uan okachi kuali se nemi, ¿keyej amo kuali yetok maj se takajkayaua maski sayoj itech se taman tein amo ueyi?’. Sayoj ke nimelaujkanemis kichiua maj niyolseujto. Uan nikixtalia ijkon niksentokas, maski tein yeski panos. Notekouan kimatij ke komo nechiluiaj maj nitakajkayaua amo keman nikchiuas uan nion no yejuan nikinkajkayauas” (Tom, Estados Unidos).

• Kinpoujkaitaj

  “Akin nechixyekana nechiluij maj amo nikijtouani tein melauak keman poliuik seki taman kampa nitekiti, sayoj ke amo niknekik. Keman momatik akoni kiichtekka, akin iaxka tanamakaloyan nechtasojkamatilij maj nikchiuani tein melauak. Moneki yolchikaualis uan ijkon uelis se melaujkanemis nikan taltikpak. Sayoj ke, ijkon uelis touan takuaujtamatiskej uan techpoujkaitaskej” (Kaori, Japón).

Timelaujkanemiskej kichiua maj tikpiakan se kuali tanemilil, maj tiyolseujkanemikan uan maj techpoujkaitakan. ¿Melauj ke semi tapaleuia?