Don uan Margaret * semi yolpaktoyaj porin ininsiuapil uan ikalyetouanij kinkalpanojtoyaj. Se youak achto ke yaskiaj, Margaret akin achto tekitik kemej takualchiujkej, kinekik kinchijchiuilis macarrones ika queso, takual tein okachi kiueliliaj ome iixuiuan.

Margaret kitalij tapalol itech mesa, kampa nochin tokotsyetoyaj. Keman kitentapoj, kimoujkaitak porin sayoj kipiaya chiltamoltal ika queso. Kielkauak kitalilis tein okachi monekia: ¡macarrones!

Maski tein yeski xiujmej tikpiaskej oso tikmatiskej miak taman tinochin timopolouaj. Amo tiknemiliaj tein tikijtouaj, tikchiuaj teisa keman amo moneki oso amo tikchiuaj uan tikelkauaj. ¿Keyej timopolouaj? ¿Keniuj moneki tikitaskej? ¿Uelis amo timopoloskej? Komo tikitaj kemej moneki techpaleuis maj tiknankilikan nejin netajtanilmej.

Keman tikchiuaj teisa tein kuali, tiknemiliaj ke technamiki maj techiluikan ke kuali tein tikchiujkej. Sayoj ke, ijkuak timopolouaj, maski amo tiknekiaj oso oksekin amo kiitaj, ¿tikijtouaj ke timopolojkej? Tikchiuaskej komo amo timoueyinekij.

Komo timoueyinekij, xa tikijtoskej ke amo se ueyi nepolol, ke amo tikchiujkej oso tiktajtakoltiskej okse. Se kichiuas nejon amo tapaleuia, porin kuejmol ueliskia amo moyektalis uan ueliskia tikintajtakoltiskej oksekin. Maski amo niman techijtakos tein tikchiujkej, moneki tikelnamikiskej ke satepan, “tisenme de tejuan ya monekis ma tikmaktiliske Dios tocuentas” (Romanos 14:12).

Dios kiita nepololmej ika taixejekolis. Amatajkuilol Salmos kijtoua ke yejuatsin “teiknelia uan kineki tapaleuis”. No kijtoua: “Amo nochipa kiitstos nepololmej, uan amo nochipa kisentokas kielnamikisok”. Yejuatsin kimati ke tinochin titajtakolejkej uan toni taman techouijmaka tikixnamikiskej, kemaj; “kielnamiki ke tichijchiujtokej ika talnex” (Salmo 103:8, 9, 14).

Uan no, Dios ijkon kemej se tepopaj teiknelijkej, kineki maj tiikoneuan, tikitakan nepololmej kemej yejuatsin kiita (Salmo 130:3). Ika iTajtol, techixyekana ika netasojtalis uan techmaka miak tayolmajxitilismej tein ika techpaleuia maj tikitakan tonepololuan uan tein oksekin kipiaj kemej moneki.

Akin mopoloua, miakpa, kikui miak tiempo uan chikaualis kintajtakoltis oksekin oso motenpaleuis ika tein kijtoj oso kichiuak. Sayoj ke, ijkuak tikonijtos teisa tein kiyolxokolis aksa, okachi kuali xikonilui maj mitsontapojpolui, xikonyektali kuejmol uan xikonsentoka kuali iuan xionmouika. Uan komo tikonchiua teisa tein tejuatsin mitsonijtakoua oso okse aksa, amo xionkualani nion xikontajtakolti oksekin, okachi kuali xikontemo tikonyektalis tein panok. Tikonsentokas tikonijtos ke amo motajtakol, kichiuas maj amo niman moyektali kuejmol uan maj okachi moueyitili. Okachi kuali xionmomachti  ika monepolol, xikonyektali tein monekis uan xikonelkaua.

Keman okse mopoloua, uelis niman tiknextiskej ke techyolxokolijkej. Sayoj ke okachi kuali maj tikchiuakan nejin tein tayolmajxitij Jesús: “Xikinchiuilikan tokniuan ijkon keme nankinekij ke in tokniuan ma namechchiuilikan” (Mateo 7:12). Keman tikpiaj se nepolol, maski amo tel ueyi, semi timotasojkamatij maj oksekin techiknelikan oso maj techtapojpoluikan. Yejua ika ¿keyej amo tionmochikaua no ijkon tikonchiuas iniuan oksekin? (Efesios 4:32.)

Se diccionario kimelaua ke timopolouaj porin amo kuali titaixejekouaj, amo nochi tikmatij oso porin amo tiknejmachkakij tein moijtoj. Nejin se taman tein tinochin techpanoua. Sayoj ke, amo semi timopoloskej komo tikitaj tayolmajxitilismej tein moajsij itech Biblia.

Semej nejon moajsi itech Proverbios 18:13: “Keman aksa tanankilia achto ke kitamikakis teisa, kinextia ke amo tamati uan mopinaujkatalia”. Kemej tikitaj, komo tikakij ika nejmachkayot nochi tein moijtoua uan tiknemiliaj keniuj titanankiliskej, tapaleuis maj amo tikijtokan tein amo taixejekol oso maj amo tikualanikan. Tein tikmatiskej keman tiknejmachkakiskej tein moijtoj semi techpaleuis maj kuali titaixejekokan.

Okse tayolmajxitilis kijtoua: “Ximofuerzajuijtiyakan se uan okse hasta kampa nanueliske de nannentinemiske ika yolseuilis [...] iuan nochi taltikpakuani” (Romanos 12:18). Xionmochikaua tikontemos kuali tionmouikas uan tionyolseujkanemis iniuan oksekin. Keman tiontekitis iniuan oksekin, xikonnexti tein kuali uan xiontapoujkaita. No xikontemo tikoniluis ke kuali tein kichiuaj uan xikonyolchikaua. Keman ijkon tikchiuaj, tapaleuia maj amo ouij titetapojpoluikan oso maj amo timoyolxokolikan keman oksekin mopolouaj. Uan hasta uejueyi nepololmej uelis moyektaliskej ika kuali tajtolmej.

Xionmomachti ika monepololuan. Amo xikontemo tionmotenpaleuis ika tein tikonijtoj oso tikonchiuak; okachi kuali, xikonita keniuj mitsonpaleuis xikonnexti seki taman tein kuali. Xa okachi moneki amo tionyolijsiuis, okachi tiontapaleuis oso tikonmatis tionmotsakuilis, amo niman tionkualanis oso tikontemos maj onka yolseuilis uan netasojtalis (Gálatas 5:22, 23). Uan no tikonmatis tein amo moneki tikonchiuas keman oksepa tionmopolos. Amo xionmotajtakoltijto monepololuan, ta xikontemo amo oksepa tikonchiuas. Komo tikijtouaj teisa tein teuetskitij tapaleuis maj amo se kualani.

Komo tikitaj nepololmej kemej moneki, techpaleuis maj tikchiuakan tein kuali keman timopolouaj. Tiyolseujkanemiskej iniuan oksekin. Keman timomachtiaj ika tonepololuan, tiknextiskej okachi tamatilis uan oksekin kuali momachiliskej touan. Uan no, amo timosenkauaskej nion tiknemiliskej ke tejuan sayoj timopolouaj. Tikajsikamatiskej ke oksekin no mochikaujtokej amo mopoloskej techpaleuis maj iniuan timotokikan. Uan okachi ueyi tatiochiualis yejua tikmatiskej titetasojtaskej uan titetapojpoluiskej ijkon kemej senkis kichiua Dios (Colosenses 3:13).

¿Toni panok ika inepolol Margaret, tein ika titajtojkej ipeujyan tamachtilis? ¿Kichiuak maj amo kuali momachilikan? Amo. Nochin peujkej uetskaj, okachi Margaret, uan kinyolpaktij takualis, maski amo kipiaya macarrones. Xiujmej satepan, iixuiuan kisentokayaj kintapouiayaj ininkoneuan tein panok uan kielnamikiaj tein kualtsin tein kipanokaj iniuan ininuejkaujtatuan... Porin nejon, sayoj katka se nepolol tein amo ueyi.