Ir al contenido

¿Kinamiki tikiniljuisej santojmej ma techpaleuikaj?

¿Kinamiki tikiniljuisej santojmej ma techpaleuikaj?

Tlen Biblia kiijtoua

Biblia kiijtoua amo kinamiki timomaijtosej iixpa se tlaixkopinkayotl o se teteyotl. San moneki timomaijtosej ika toTeotsij uan ika Jesús itoka. Jesús kiniljuik itokilijkauaj: “Uajka kema inmomaijtosej ipan toTeko, xikiljuikaj kej ni: ‘ToTeko toTata tlen tiitstok nepa iluikak. Nochi tlakamej ma kiueyichiuakaj motoka’ ” (Mateo 6:9). Jesús kiijtok ma timomaijtokaj ika toTeotsij uan amo iixpa se tlaixkopinkayotl, se teteyotl, se iluikaejketl o seyok tlamantli.

Jesús nojkia kiijtok: “Na niojtli [...]. Na niitstok tlen melauak uan nitemakas yolistli yankuik para nochipa. Axaka uelis asis kampa itstok noTata [...] tlaj axnechneltoka” (Juan 14:6). San ika Jesús itoka uelis timomaijtosej ika toTeotsij (Hebreos 7:25).

¿Uelis timomaijtosej ika toTeotsij uan ika santojmej?

Ipan nopa Matlaktli Tlanauatili toTeotsij kiijtok: “Na niDios, niinmoTeko, uan niinmechtlasomati” (Éxodo 20:5). ¿Kenke tikijtouaj toTeotsij techtlasomati? Ipan se nota tlen kipia nopa Biblia de América kej ni kiixtoma ni texto: “San ya eli toTeotsij uan yon se tlaixkopinkayotl [...] uelis kikuilis tlen ya kinamiki kiselis”. ToTeotsij kineki san ya ma tijueyichiuakaj, uan tijueyichiuaj kema timomaijtouaj (Isaías 48:11).

Tlaj timomaijtosej ika se iluikaejketl, se tlaixkopinkayotl o se teteyotl, tlauel tijyolkokosej toTeotsij. Ipan Apocalipsis kiijtoua kema nopa apóstol Juan motlankuaketski iixpa se iluikaejketl pampa kinekiyaya kiueyichiuas, nopa iluikaejketl kiiljuik: “Amo xinechueyimati. Na nojkia nijtekipanoua toTeko keja ta uan moikniuaj tlen inkitokiliaj Jesús. San toTeko xijueyimati” (Apocalipsis 19:10).