Biblia amo kitekiuia nopa tlajtoli mokonetlauisoua kema kamanalti tlen se siuatl katli iselti kineki kitlauisos ikone. Maske kiampa, ipan miak textos techpaleuia ma tikitakaj kenijkatsa toTeotsij kiita tonemilis, uan nojkia inemilis se konetl katli ayamo tlakati.

 Tonemilis eli se nemaktli tlen toTeotsij (Génesis 9:6; Salmo 36:9). Ya kipatiita nochi tlen yoltok, sanse kej kipatiita inemilis se konetl katli ayamo tlakati. Yeka, kema se akajya san kineki mokonetlauisos, temiktia.

 Nopa Tlanauatili tlen toTeotsij kinmakak israeleuanij kiijtouayaya: “Intla omej tlakamej moteuiaj uan kikokosej se siuatl tlen koneue uan ika ya nopa kichiuilisej ma tlakatis ikone kema aya asi tonali, ya ni tlen inkichiuasej. Intla axmiki nopa konetl, uajka tlen kipia tlajtlakoli moneki tlaxtlauas imiaka tlen kiijtos iueue nopa siuatl uan nopa jueces. Pero intla mikis nopa konetl, moneki inkimiktisej tlen kikokok nopa siuatl” (Éxodo 21:22, 23). a

•  ¿Kema peua inemilis se maseuali?

•  ¿ToTeotsij uelis kitlapojpoljuis se akajya katli mokonetlauisok?

•  ¿Tlauel amo kuali kema se siuatl mokonetlauisos tlaj ya o ikone uelis mikisej?

 ToTeotsij kiita peua inemilis se pilkonetsi kema se siuatl konekui. Ipan iTlajtol, toTeotsij kiita se konetl katli ayamo tlakati kejuak ya eliskia se maseuali. Ma tikitakaj se keski neskayotl kampa kinextia toTeotsij sanse kinita se konetl katli ayamo tlakati uan se katli ya tlakatki.

•   Tlanauatijketl David kiiljuik toTeotsij: “Moixteyol kiitak kema pejki nimoskaltia iijtiko nonana” (Salmo 139:16, TNM). Uajka toTeotsij ya kiitayaya David kej se maseuali maske ayamo tlakatiyaya.

•   Ma tikitakaj seyok neskayotl. ToTeotsij ipa moiljuijtoya tlake tekitl kimakaskia tlajtolpanextijketl Jeremías kema ayamo tlakatiyaya. ToTeotsij kiiljuik: “Na nimitsixmatki hasta kema aya nimitschijchijtoya ipan iijti monana. Uan kema aya titlakatiyaya, nimitstlapejpenik uan nimitsiyokatlalik para titlayolmelauas tlen na ika tlakamej tlen euanij nochi tlaltinij ipan nochi Tlaltipaktli” (Jeremías 1:5).

•   Lucas, katli nojkia kiijkuilok Biblia uan eliyaya tepajtijketl, kitekiuik sanse tlajtoli ika griego kema kamanaltik tlen se konetl katli ayamo tlakatiyaya uan se katli ya tlakajtoya (Lucas 1:41; 2:12, 16).

 Kena, toTeotsij uelis kintlapojpoljuis katli mokonetlauisojkej. Tlaj kiitaj nemilistli kej toTeotsij kiita, amo kinamiki tlauel moyolkokojtosej. Biblia kiijtoua: “ToTeko tetlasojtla miak uan kipia ueyi iyolo [...]. Techkixtilik totlajtlakoljuaj uan kitlalik uejka tlen tojuantij. Kena, kitlalik keja iuejkaka kampa kisa tonati uan hasta kampa onkalaki” (Salmo 103:8-12). b Jehová kintlapojpoljuis katli moyolkuepasej ika nochi ininyolo tlen inintlajtlakoljuaj, nojkia katli mokonetlauisojkej (Salmo 86:5).

 Kej tikitakej, Biblia kiijtoua toTeotsij tlauel kipatiita inemilis se konetl katli ayamo tlakati, yeka se siuatl amo kinamiki mokonetlauisos maske uelis kipanos tlen amo kuali ya o ipilkone.

 ¿Tlake moneki mochiuas tlaj pano tlen amo kuali kema se siuatl kitlakatiltis ikone uan monekis kitlapejpenisej tlaj kimanauisej nopa tenaj o ipilkone? Maske ni amo tlauel pano, tlaj kiampa panoskia, uajka iueue o sekinok ichampoyouaj moneki kitlapejpenisej ajkia kimanauisej.