Amochtli Biblia uejkajkia kiijkuilojkej. Kipia se 3,500 xiuitl kema pejkej kiijkuilouaj ipan Oriente Medio. Ipan nopa tonali, ne China tlanauatiyayaj nopa dinastía Shang, inijuantij katli tlauel ya uejkaj itstoyaj. Uan kema panotoya mil xiuitl , nopa budismo pejki ipan la India. (Xikita nopa recuadro “ Tlen moneki tijmatis tlen Biblia”.)

Se amochtli tlauel tepaleuia tlaj kuali tetlajtolmaka uan tlaj amo ouij se kikuamachilia. Kej nopa eli amochtli Biblia, kuali kinankilia miak tlajtlanili tlen tlauel ipati.

Ximoiljui ipan ni tlajtlanili: “¿Kenke tiitstokej nikaj?”. Ipan miak xiuitl tlen panotok, miakej maseualmej kinektokej kimatisej ni. Biblia kinankilia nopa tlajtlanili ipan nopa achtoui ome capítulos tlen uala ipan Génesis. Nopaya kiijtoua kenijkatsa kema “pejki nochi”, ipan iluikaktli pejki onka galaxias, sitlalimej, uan teipa Tlaltipaktli (Gén. 1:1). Teipa kiijtoua kenijkatsa yolik ipan Tlaltipaktli pejki yoli miak tlamantli, tlapialmej uan maseualmej, uan kiijtoua kenke onka nochi ni tlamantli.

Biblia techtlajtolmaka kenijkatsa uelis tijsenkauasej kuesoli. Tlen techiljuia, amo ouij se kikuamachilis. Ma tikitakaj kenke tikijtouaj nopa ika ome tlamantli.

Se: tlen Biblia kiijtoua amo ouij, xitlauak uan yejyektsi. Amo kitekiuia tlajtoli tlen amo uelis tijkuamachilisej o tlen amo tikixmatij, uan ika amo ouij tlajtoli kiixtoma kenijkatsa eli se tlenijki. Maske kipia ouij tlamachtili, ueli tijkuamachiliaj pampa kitekiuia tlajtoli tlen tojuantij nojkia tijtekiuiaj.

Jesús kitekiuiyaya miak tlaixneskayotl tlen maseualmej kiixmatiyayaj, kiampa asiyaya ipan ininyolo tlen kinmachtiyaya. Miak tlen nopa tlaixneskayotl uala ipan nopa tlamachtili katli ijkuilijtok ipan Mateo 5-7. Se tlakatl kiijtok “nopa tlamachtili tlauel tepaleuia”, uan “amo san techpaleuia tijmatisej miak tlamantli, nelia techyakana uan techpaleuia kuali ma timonejnemiltikaj”. Maske uelis tijpouas nopa tlamachtili san ipan 15 o 20 minutos, tlauel mitspaktis tikitas tlen Jesús  kiijtok tlauel tepaleuia uan amo ouij se kikuamachilia.

Ome: tlen ijkuilijtok ipan Biblia nojkia kichiua amo ouij ma tijkuamachilikaj. Amo tepouilia tlamantli tlen amo nelia panok. Nopa The World Book Encyclopedia kiijtoua Biblia “tepouilia tlen kinpanok maseualmej katli tlauel pankisayayaj uan tlen ueli maseualmej”, kenijkatsa “tlateuijkej, motemachijkej ipan tlen kiseliskiaj, kema amo tlatlankej uan kema tlatlankej”. Kema tijpouaj tikitaj nojkia techpano kej inijuantij, uan nojkia tikitaj kenijkatsa techpaleuia nochi tlen kinpanok (Rom. 15:4).

Se amochtli uelis tijkuamachilis tlaj ijkuilijtok ipan se tlajtoli tlen tijkuamachilia. Ipan ni tonali, uelis Biblia nojkia eltok ipan nopa tlajtoli tlen ta tijkuamachilia, maske uelis tlauel uejka kampa ta tiitstok. ¿Kenke Biblia nojkia eltok ipan nopa tlajtoli?

Kitlajtolkueptokej. Biblia kiijkuilojkej ipan tlajtoli hebreo, arameo uan griego, yeka amo nochi maseualmej ueliskiaj kipouasej. Se keskij katli tlauel kipatiitaj Biblia kichijtokej kampeka kitlajtolkuepasej ipan sekinok tlajtoli. Pampa kiampa kichijtokej, nama nochi Biblia o san se achi motlajtolkueptok ipan se 2,700 tlajtoli. Yeka kipano 90% tlen itstokej ipan Tlaltipaktli uelij kipouaj se kentsi tlen Biblia ipan inintlajtol.

Kimoyajtokej. Kema pejkej kiijkuilouaj Biblia, kiijkuilojkej ipan tlamantli tlen nima ijtlakauiyaya, kej papiro uan kuetlaxtli. Monekiyaya nochipa kiixkopinasej, kiampa amo poliuiskia tlen kiijkuilojtoyaj. Uan tlauel patiyo kinamakayayaj, yeka amo nochi maseualmej kikouayayaj. Uan kema Gutenberg kichijchijki se imprenta, kipia se 550 xiuitl, pejki tlauel momoyaua Biblia. Nama ya momoyajtok se cinco mil millones.

Yon se amochtli tlen kitekiuiaj ipan se religión momoyajtok kej Biblia, ni kiijtosneki nochi uelis kipiasej se. Maske uelis tijmatis ouij tijkuamachilis Biblia, onka se tlamantli tlen mitspaleuis. ¿Tlake nopa tlamantli? ¿Kanke uelis tijpantis? Xikita ipan nopa seyok tlamachtili.