1, 2. ¿Tlake nochipa kichijtokej Jehová itekipanojkauaj?

JEHOVÁ nochipa technextilijtok miak tlajtolpanextili uan itekipanojkauaj nochipa kichixtokej ma moaxiti. Kema Jeremías kiijtok nopa babiloniaeuanij kitsontlamiltiskiaj Judá, moaxitik ipan xiuitl 607 a.u.J. (Jer. 25:8-11.) Isaías kiijtok Jehová kinpaleuiskia judeaeuanij ma kisakaj Babilonia uan mokuepaskiaj ininaltepe. Uan kiijtok: ‘Ma pakikaj nochi tlen motemachiaj ipan ya para ma kinpaleui’ (Is. 30:18). Miqueas motemachiyaya nopa tlajtolpanextili temachtli moaxitiskia. Yeka kiijtok: “Na kuali nitlachixtos” (Miq. 7:7, TNM). Uan toTeotsij itekipanojkauaj uejkajkej kichixtoyaj nopa Mesías katli toTeotsij kiniljuijtoya asiskia (Luc. 3:15; 1 Ped. 1:10-12). *

² Nama tijchixtokej ma moaxiti nopa tlajtolpanextili tlen toTeotsij iTlanauatijkayo. Jesús yaya tekichiuas uan nechka techmanauis ipan Tlaltipaktli kampa ueliskia techpanos tlen amo kuali. Kema tlamis nochi tlen amo kuali, kintsontlamiltis tlen amo kualmej  uan tlen techtlaijiyouiltia (1 Juan 5:19). Nopa mochiuas kema amo timoiljuiaj, yeka moneki timokualchijchijtosej.

3. ¿Tlake uelis timotlajtlaniaj tlaj ya kipia miak xiuitl tijchixtokej itlamia nochi?

³ Tlauel tijnekij ma mochiua ipan Tlaltipaktli tlen toTeotsij kineki (Mat. 6:10). Tlaj ya kipia miak xiuitl tijchixtokej itlamia nochi, uelis timotlajtlaniaj tlaj nojua moneki kuali titlachixtosej uan timokualchijchijtosej.

4. ¿Kenke tlauel moneki kuali titlachixtosej uan timokualchijchijtosej?

⁴ Moneki kuali titlachixtosej uan timokualchijchijtosej pampa Jesús ya nopa technauatik ma tijchiuakaj (Mat. 24:42; Luc. 21:34-36). Uan nojkia pampa ipan Jehová itlanechikol nochipa techiljuiaj kuali ma titlachixtokaj uan ma timokualchijchijtokaj kema ayamo asi itlamia nochi tlen onka uan ma tikilnamiktokaj nopa Xochimili tlen toTeotsij kichiuas (xijpoua 2 Pedro 3:11-13).

5. ¿Kenke nojkia tlauel moneki ma timokualchijchijtokaj kema ayamo asi itlamia nochi tlen onka?

⁵ Nopa achtoui Cristo itokilijkauaj monekiyaya kuali tlachixtoskiaj uan mokualchijchijtoskiaj kema ayamo asiskia itlamia nochi. Uan nama tlauel moneki ma timokualchijchijtokaj, pampa Jesús pejki tekichiua ipan xiuitl 1914 uan tiitstokej ipan itlamia tonali. ¿Kenke timotemachiaj nopa nelia? Pampa nochi tlen Jesús kiijtok panoskia moaxitia ipan ni tonali. Maseualmej tlauel kichiuaj tlen amo kuali uan nopa tlamachtili tlen toTeotsij iTlanauatijkayo momoyaua ipan nochi Tlaltipaktli (Mat. 24:3, 7-14). Jesús amo kiijtok keski tonali tiitstoskiaj ipan itlamia tonali. Yeka, moneki timokualchijchijtosej pampa amo tijmatij kema asis.

6. ¿Kenke tijmatij ipan Tlaltipaktli kichijtiasej san tlen tlauel amo kuali?

⁶ Ipan Tlaltipaktli nojua kichijtiasej tlen tlauel amo kuali. ¿Kenke tijmatij nopa? Pampa Biblia kiijtoua ipan “itlamia tonali” maseualmej nojua eliskiaj tlauel amo kualmej (2 Tim. 3:1, 13; Mat. 24:21; Apoc. [Rev.] 12:12). Yeka, maske ya kichijtokej tlen amo kuali, tijmatij nojua kichiuasej san tlemach tlamantli. Uajka, ¿kiijtosneki moneki kichiuasej san tlen tlauel amo kuali ipan Tlaltipaktli uan kiampa asis itlamia nochi?

7. ¿Tlake tijmatij kema timoyoliljuiaj ipan Mateo 24:37-39?

⁷ Sekij uelis moiljuiaj kema nechka peuas nopa “ueyi tlaijiyouilistli” kampa ueli onkas mayantli, kokolistli uan uejueyi tlauilankayotl (Apoc. 7:14). Nopa amo panos, pampa tlaj panoskia, nochi kimatiskiaj moaxitijtok nopa tlajtolpanextili, uan katli amo kineltokaj tlen Biblia kiijtoua nojkia kiitaskiaj. Uan Jesús kiijtok miakej amo kimatiskiaj kema tiitstoskiaj ipan itlamia tonali. Kiijtok asiskia kema amo kichiaskiaj uan kej itstoskiaj kinextiskiaj amo kichiaj nopa tonali (xijpoua Mateo 24:37-39). Kema timoyoliljuiaj ipan tlen Jesús kiijtok, tijmatij kema nechka peuas nopa ueyi tlaijiyouilistli amo nochi kichiuasej san tlen tlauel amo kuali yon amo nochi kimatisej kema monechkauijtos itlamia nochi (Luc. 17:20; 2 Ped. 3:3, 4).

8. ¿Ipan tlake timotemachiaj toTeotsij itekipanojkauaj?

⁸ Jesús kiijtok nopa tlajtolpanextili tlen itlamia tonali, pampa kiampa san katli kuali tlachixtoskiaj kimatiskiaj ya nechka asiskia itlamia nochi. ToTeotsij itekipanojkauaj kuali tlachixtokej (Mat. 24:27, 42). Yeka, kema pejki xiuitl 1914 tikitstokej moaxitijtok miak  tlamantli tlen nopa tlajtolpanextili. Timotemachiaj tiitstokej kema nechka tlamis nochi tlen amo kuali. Uan Jehová ya kitlalijtok ipan tlake tonali kitsontlamiltis.

9. ¿Kenke kinamiki kuali titlachixtosej uan timokualchijchijtosej?

⁹ ¿Kenke kinamiki kuali titlachixtosej uan timokualchijchijtosej? Pampa tijnekij tijneltokasej Cristo uan pampa tijneltokaj moaxitijtia nopa tlajtolpanextili tlen itlamia tonali. ¿Kenke tijneltokaj nopa? Amo pampa tijneltokaj nochi tlen techiljuiaj. Tijneltokaj pampa onka tlamantli tlen kinextia nelia moaxitijtok nopa tlajtolpanextili tlen uala ipan Biblia.

10, 11. 1) ¿Kenke Jesús kiniljuik itokilijkauaj nochipa kuali ma tlachixtokaj? 2) ¿Tlake moneki tijchiuasej tlaj amo asis itlamia nochi kema timoiljuiyayaj? (Xikita nopa achtoui tlaixkopinkayotl.)

¹⁰ Miakej ya uejkajtok kichixtokej ma asi itlamia nochi. Maske miak o amo miak xiuitl tijtekipanojtokej toTeotsij, moneki nochipa kuali titlachixtosej uan timokualchijchijtosej. Kiampa tijchixtosej kema Jesús kitsontlamiltiki nochi tlen Satanás kinauatia. Jesús kiniljuik itokilijkauaj kuali ma tlachixtokaj pampa amo kimatiyayaj kema asiskia itlamia nochi. Uan nojkia kiniljuik: “Keja ni tlakatl tlen yajki paxaloto. Yajaya achtoui kinmakak tekiuejkayotl itekipanojkauaj uan kimakak sejse iteki. Uan kinnauatik ma kimokuitlauikaj kuapuerta. Uan kiski ichaj uan yajki paxaloto, pero itekipanojkauaj monejki mojmostla tlachixtosej pampa axkimatiyayaj tlachke tonal mokuepaskia. Uajka xitlachixtokaj kuali iuikal kej nopa tekipanouanij tlen kichiaj nopa kaltekojtli pampa inmojuantij nojkia, axinkimatij kema nimokuepas. Uelis niualas tlayoua, o tlajkoyoual, o kema tsajtsis kuapelech o ika ijnalok. Intla niualas nimantsi, ma axniinmechpantiki inkochtokej. Uan tlen niinmechiljuia inmojuantij, nojkia nikiniljuia nochi tlakamej: ¡Xitlachixtokaj kuali para kema niualas!” (Mar. 13:33-37).

¹¹ Kema Cristo itokilijkauaj kikuamachilijkej Jesús pejki tekichiua ipan 1914, kimatkej itlamia nochi nechka asiskia uan kema amo kichiaskiaj. Yeka mokualchijchijkej. Mosentlalijkej tlajtolmoyauasej. Ipan Marcos 13, Jesús kiijtok nopa tlakatl uelis amo nima asiskia kej moiljuiyayaj. Maske amo kimatiskiaj kema asiskia, monekiskia kuali tlachixtoskiaj. Uajka, tlaj ya tijpiaj miak xiuitl timochixtokej, amo kiijtosneki itlamia nochi nojua tlauel uejkauas o ayokmo tiitstosej kema panos. Moneki nochipa kuali titlachixtosej.

12. 1) ¿Tlake kinekiyaya kimatis Habacuc? 2) ¿Uan tlake kinankilik Jehová?

¹² Ma timoiljuikaj tlen kipanok Habacuc.  Ya mochixki kema tematiltiyaya Jerusalén kitsontlamiltiskiaj. Achtouia, sekinok nojkia tematiltijkej miak xiuitl nopa. Uan Habacuc kiitayaya ipan nopa tonali maseualmej kichiuayaya tlen tlauel amo kuali. Yeka kiiljuik Jehová ma kipaleui. Ya kitlajtlanik: “ToTeko, ¿hasta kema tlamis nimitstsajtsilis xinechpaleuiki uan axtinechtlakakilis?”. Maske Jehová amo kiiljuik kema kitsontlamiltiskiaj Jerusalén, kinauatik kuali ma tlachixto uan kiiljuik: “Temachtli panos” (xijpoua Habacuc 1:1-4 uan 2:3).

13. 1) ¿Tlake ueltoskia moyoliljuis Habacuc? 2) ¿Tlake kipanotoskia Habacuc tlaj kiampa moyoliljuijtoskia?

¹³ Ximoiljui Habacuc ayokmo kinejki mochias uan moyoliljuik: “Miak xiuitl nijchixtok ma kitsontlamiltikaj Jerusalén. Uelis nojua poliui miak xiuitl, yeka ayokmo moneki nojua nitlajtolmoyajtos. Ma kichiuakaj sekinok”. ¿Tlake kipanotoskia tlaj kiampa moyoliljuijtoskia? Ayokmo mouampojchijtoskia iuaya toTeotsij. Uan tlaj asitoskia nopa tonali uan amo mokualchijchijtoskia, miktoskia.

14. ¿Tlake tijyolmatisej kema tiitstosej ipan Xochimili?

¹⁴ Kema tiitstosej ipan Xochimili, ya tikitstosej kenijkatsa moaxitijtok nochi tlen Jehová kiijtok panoskia ipan itlamia tonali. Yeka, ¿tlake tijyolmatisej? Timotemachisej ipan ya uan tijneltokasej temachtli kichiuas nochi nopa sekinok tlamantli tlen kiijtojtok (xijpoua Josué 23:14 *). Tlauel tijtlaskamatilisej Jehová pampa kichijki ma asi itlamia nochi kema kinamikiyaya uan pampa kinnauatik itekipanojkauaj kuali ma tlachixtokaj uan ma mokualchijchijtokaj (Hech. 1:7; 1 Ped. 4:7).

15, 16. ¿Kenke moneki timosentlalisej titlajtolmoyauasej?

¹⁵ Jehová itlanechikol nochipa techilnamikilijtos tlauel moneki ma tijtekipanokaj toTeotsij. Nopa techpaleuis nochipa ma tijtekipanokaj  uan ma tikilnamiktokaj tlauel moneki ma titlajtolmoyajtokaj. Timotemachiaj moaxitia tlen Jesús kiijtok tlen itlamia tonali uan nechka tlamis nochi tlen amo kuali. Yeka, tlauel tijpatiitaj tijtekipanosej Jehová uan tijmoyauasej nopa tlamachtili tlen itlanauatijkayo (Mat. 6:33; Mar. 13:10).

¹⁶ Tlen Satanás kinauatia nechka kitsontlamiltisej. Kema titlajtolmoyauaj, tikinpaleuiaj maseualmej ma momanauikaj. Ma tikitakaj tlen kinextia kenke tlauel moneki timosentlalisej tikinpaleuisej ma momanauikaj. Ipan 1945, se barco tlen Alemania atsonpolijki uan tlauel miakej mijkej. Se tlakatl iuaya isiua katli momanauijkej teipa mochijkej Jehová itlajtoltemakauaj. Isiua kiijtoua kema nopa barco atsonpoliuiyaya, se siuatl kuatsajtsiyaya pampa tlen tlauijuikayaya yauiyaya atsintla. Uan sekinok kimatiyayaj tlauel monekiyaya kinpaleuisej sekinok ma momanauikaj. Ipan ni tonali maseualmej nojkia uelis mikisej. Yeka, moneki timosentlalisej titlajtolmoyauasej pampa kiampa uelis momanauisej. Tijnekij tijchiuasej se ueyi kampeka tikinpaleuisej ma momanauikaj.

17. ¿Kenke tijmatij nopa tonali kema tlamis nochi uelis asis kema amo tijchiaj?

¹⁷ Nopa tlajtolpanextili moaxitia uan nochi tlen onka tlamis kema amo tijchiaj. Nopa Organización de las Naciones Unidas uan tekichiuanij katli kinpaleuiaj, nechka kinekisej kintsontlamiltisej nopa religiones tlen amo melauak (Apoc. 17:16). ¿Moneki panos miak tonali uan kiampa moaxitis nopa? Amo. ToTeotsij kichiuas tekichiuanij ma kinekikaj kintsontlamiltisej nopa religiones. Ya nimantsi kichiuas nopa kema amo kichiasej (Apoc. 17:17). Nochi tlen kinauatia Satanás nechka kitsontlamiltisej. Yeka, ma tijchiuakaj tlen Jesús kiijtok: “Ximomokuitlauikaj. Nopa tonal ma axinmechpantiki ipan tlajtlakoli. Niyon ma axniinmechpantiki iniuintitokej, yon ma niinmechpantiki inmokuatotonijtokej ika tlamantli tlen ni nemilistli nikaj, pampa intla san ya nopa inmoiljuiaj, axinmokualtlalijtosej, uan nopa tonal nimantsi inmechasis keja se tlaketstli” (Luc. 21:34, 35; Apoc. 16:15). Uajka, kuali ma titlachixtokaj, ma timosentlalikaj tijtekipanosej Jehová uan ma timotemachikaj kinmanauis katli nochipa kuali tlachixtosej uan mokualchijchijtosej (Is. 64:4).

18. ¿Tlake tlajtlanili tijnankilisej ipan nopa seyok tlamachtili?

¹⁸ Ipan ni tonali kema ayamo tlami nochi tlen onka, moneki ma tijchiuakaj tlen Judas techtlajtolmakak. Ya kiijtok kema nojua tijchixtosej toTeotsij ma kichiua ma tiitstokaj nochipa, moneki nojua tlauel kuali titlaneltokasej, nochipa timomaijtosej uan kuali timouampojchijtosej iuaya Jehová (Jud. 20, 21). ¿Kenijkatsa uelis tijnextisej nelia tijnekij tiitstosej ipan Xochimili? Ni tikitasej ipan nopa seyok tlamachtili.