Nimoskaltik ipan Warialda (Nueva Gales del Sur). Ipan nopa pilaltepetsi, miakej kinmokuitlauiaj borregos uan uakaxmej, uan nojkia motlatojtokiaj. Nopaya amo tlauel tlasokiyo uan amo onka tlauilankayotl.

Tielij matlakmej tiiknimej uan na niachtouiejketl, yeka pejki nitekiti kema nijpixtoya 13 xiuitl pampa nijnekiyaya nikinpaleuis nochampoyouaj. Pejki nitekiti ipan se rancho pampa amo tlauel nimomachtijtoya. Uan kema nijpixtoya 15 xiuitl nikintekipanouayaya sekinok uan nikinmaxojtiliyaya kuatitlankauayojmej.

Tlaj titekitis ipan se rancho, uelis mitspaleuis o amo. Na tlauel nechpaktiyaya nopa tekitl tlen nijchiuayaya uan nojkia kampa nitekitiyaya. Ika tlayoua, nimoseuiyaya tlixikteno uan nikintlachiliyaya sitlalimej uan metstli, uan nikijiyotilanayaya ajakatl tlen ualayaya ika kuatitla. Nimoiljuiyaya se akajya kichijchijtoya nochi nopa tlamantli tlen tlauel yejyektsi. Maske kiampa nimoiljuiyaya, nojkia onkayaya tlamantli tlen amo kuali. Katli ininuaya nitekitiyaya kitekiuiyayaj tlajtoli sokiyo uan tlauel tlachichinayayaj uan na nojkia pejki kiampa nijchiua.

Kema nikaxitik 18 xiuitl nimochantito Sydney. Maske nijnekiyaya nielis soldado, amo nechselijkej pampa amo tlauel nimomachtijtoya. Nijpantik se tekitl uan nimokajki ipan nopa altepetl se xiuitl. Nopaya nikinixmatki Jehová itlajtoltemakauaj. Kema nechtlanejkej ipan se tlanechikoli, kena niajki uan nimantsi nikitak inijuantij tlamachtiyayaj tlen melauak.

Kema panok se keski tonali, sampa nitlakuepilik kampa nieuayaya. Nimochantik ipan Goondiwindi (Queensland). Nijpantik tekitl, nimosiuajtik uan teipa pejki tlauel nitlai.

Tikinpixkej omej tokoneuaj. Kema tlakatkej, pejki nimoiljuia tlake nijchiuayaya ipan nonemilis. Uajka nikilnamijki tlen nijkajki ipan nopa tlanechikoli tlen Sydney uan nimosentlalik nijchiuas se tlamantli.

Nijpantik se pilamochtsi Tlen Tematiltia tlen ya uejka kistoya. Nopaya kiijtouayaya kanke mokauayaya kali Betel tlen Australia, nikintlajkuiljuilik toikniuaj uan nikiniljuik ma nechpaleuikaj. Inijuantij kiiljuijkej se Jehová itlajtoltemajka ma nechpaxalo, ya eliyaya se toikni katli tlauel teikneliyaya uan pejki nimomachtia Biblia iuaya.

Kema panotiajki tonali, nikitak monekiyaya nijpatlas kej nimonejnemiltiyaya. 2 Corintios 7:1 asik ipan noyolo, nopaya kiijtoua “ma timoiyokatlalikaj tlen nochi tlamantli tlen kiijtlakos totlakayo”.

Nimosentlalik ayokmo kema nimoiuintis yon nitlachichinas. Nijmatki ouij nijkauas pampa tlauel nimomajtoya nijchiuas nopa. Maske ouij nijmatki, nimosentlalijtoya nijchiuas ipan nonemilis tlen toTeotsij kipaktia. Nojkia tlauel nechpaleuik tlen kiijtoua Romanos 12:2: “Ayok xijchiuakaj keja ama kichiuaj tlakamej ipan ni Tlaltipaktli. Pero xijkauilikaj toTeko ma inmechyolpatla”. Nikitak tlaj nijnekiyaya nijpatlas nonemilis, monekiyaya nijpatlas kej nimoiljuiyaya uan nikitas kej Jehová kiita: se tlamantli tlen tetlanauia. Jehová nechpaleuik ayokmo ma nijchiua nopa tlamantli.

Maske nimosentlalijtoya kiampa nijchiuas, tlauel ouij nijmatki ayokmo nijtekiuis tlajtoli tlen sokiyo. Nijmatiyaya tlen kiijtoua Biblia ipan Efesios 4:29: “Amo tlen ueli xikamatikaj”, maske nijmajtoya nopa, monejki panos miak tonali uan kiampa ayokmo nijtekiuik tlajtoli sokiyo. Nojkia nechpaleuik nimoyoliljuis ipan tlen kiijtoua Isaías 40:26. Ni texto kiijtoua tlen sitlalimej: “¡Xiajkotlachiakaj nepa iluikak! ¿Ajkeya kinchijchijki nochi ne sitlalimej? Yajaya kinyakana nopa sitlalimej keja itstoskiaj iiluikaejkauaj para tlateuisej. Yajaya kimati keski sitlalimej eltokej uan sejse kinotsa ika itoka. Pampa toTeko kipia nochi yajatili uan chikaualistli axkema polijtok niyon se”. Nikitak toTeotsij kipia miak chikaualistli pampa kinchijchijtoya nochi sitlalimej, katli tlauel nechpaktiyaya nikinitas, yeka nojkia nechpaleuiskia nijpatlas kej nimonejnemiltiyaya uan kiampa nijyolpakiltis. Tlauel nimomaijtok uan nijchijki kampeka nijkauas, uan kena niuelki pampa teipa ayokmo nijtekiuik tlajtoli sokiyo.

Amo ueltoya nikamanalti ininuaya miakej maseualmej pampa nitekitiyaya ipan ranchos kampa amo miakej itstoyaj. Nochi tlen nijyekok ipan tlanechikoli, nechpaleuik kuali nimonojnotsas ininuaya sekinok. Nojkia nechpaleuik nijmatis kenijkatsa nitlamachtis uan nikiniljuis sekinok tlake kichiuas toTeotsij iTlanauatijkayo (Mateo 6:9, 10; 24:14).

Kipia se keski xiuitl nitlatekipanoua kej ueuejtlakatl. Tlauel nijpatiita nikinpaleuis toikniuaj. Eli se ueyi tlateochiualistli nijtekipanos Jehová iuaya nosiua uan nokoneuaj, katli tlauel nikiniknelia.

Tlauel nijtlaskamatilia Jehová pampa kikajki ma nikixmati maske amo tlauel nimomachtik ipan escuela (Isaías 54:13). Nikitstok nelia tlen kiijtoua Proverbios 10:22: “Kema toTeko kiteochiuas se tlakatl, yajaya moricojchiuas ika tlen nelia ipati”. Nochampoyouaj uan na nojua tijnekij timouampojchiuasej iuaya Jehová uan nochipa tijtekipanosej.