Biblia kinpaleuik kuali ma monejnemiltikaj

¿TLAKE kipaleuik se tlakatl katli eliyaya punk ayokmo ma mosisini uan ma kinikneli sekinok? ¿Tlake kipaleuik se telpokatl katli eua México ayokmo ma momekati? ¿Kenke se tlakatl katli motlajtlaniyaya ika bicicleta ininuaya sekinok ayokmo kinejki kiampa kichiuas? Ma tikitakaj kenke kiampa kichijkej.

“Amo nitlatlepanitayaya, nimoueyimatiyaya uan tlauel nimosisiniyaya” (DENNIS O’BEIRNE)

TLAKATKI IPAN: 1958

EUA: INGLATERRA

SEKINOK TLAMANTLI: PUNK KATLI AMO KIPAKTIYAYA MOUIKAS ININUAYA SEKINOK

TLEN NECHPANOK: Notata ichampoyouaj tlakatkej Irlanda uan kema nieliyaya okichpil niauiyaya Iglesia católica. Amo nechpaktiyaya nias pampa nochampoyouaj nechiljuiyayaj noselti ma nia. Maske kiampa nijyolmatiyaya, kena nijnekiyaya nikixmatis toTeotsij. Nikilnamiki mojmostla ika tlayoua nikompauiyaya nopa padrenuestro, nimotekayaya ipan nocama uan nimoiljuiyaya tlake kiijtosneki. Nijxejxelouayaya tlen kiijtoua nopa padrenuestro uan nimoiljuiyaya tlake kiijtosneki sejse tlen nopa tlamantli.

Kema nitelpokatixki, nimokalakik ika rastafaris uan nojkia nijnekiyaya nijmatis tlen kichiuaj políticos, kej nopa liga antinazi. Maske nikitak tlen kichiuaj, nojua tlauel nechpaktik tlen kichiuaj punks pampa tlaijixnamikiyayaj. Nochipa nijtekiuiyaya drogas uan tlauel nijtekiuiyaya marihuana. Tlauel nitlaiyaya, nijchiuayaya tlamantli tlen ika ueliskia nechpanos tlen amo kuali uan amo nechtekipachouayaya tlen kinpanoyaya sekinok. Amo nechpaktiyaya nikinnojnotsas sekinok, nikualaniyaya tlaj nechixkopinayayaj uan san nikamanaltiyaya ininuaya maseualmej katli nimoiljuiyaya nechpaleuiskiaj tlaj nimonojnotsaskia ininuaya. Kema nikilnamiki tlen nijchiuayaya, nikita amo nitlatlepanitayaya, nimoueyimatiyaya uan tlauel nimosisiniyaya. San nouampoyouaj kuali nikinnojnotsayaya uan nikinmakayaya tlen nijpixtoya.

Kema nijpixtoya 20 xiuitl, nijnejki nimomachtis Biblia. Se nouampo katli kinamakayaya drogas, pejki kipoua Biblia kema tsaktoya, se tonali tikamanaltikej tlen religión, tlen kichiuaj iglesias uan tlen kichiua Satanás ipan Tlaltipaktli. Nijkojki se Biblia uan pejki nimomachtia. Nouampo uan na tijpouayayaj se keski textos tlen Biblia, teipa timoiljuiyayaj tlake tijpojkej uan sansejko tikitayayaj tlake kiijtosneki tlen timomachtijtoyaj. Miak metstli kiampa tijchijkej.

Kema timomachtiyayaj sansejko, tijyekojkej tiitstokej ipan itlamia tonali, Cristo itokilijkauaj moneki kiniljuisej sekinok tlen kichiuas toTeotsij iTlanauatijkayo, moneki amo timokalakisej ipan tlen mochiua ipan Tlaltipaktli yon ipan política, uan Biblia techpaleuia kuali ma timonejnemiltikaj. Tikitakej Biblia tlamachtia tlen melauak, yeka monekiyaya eltos se religión tlen melauak. Maske kiampa timoiljuiyayaj, amo tijmatiyayaj tlake religión eliyaya. Tikitakej tlen kichiuaj religiones tlen tlauel kinixmatij uan mokalakiaj ipan política uan nojkia kichiuaj uejueyi iljuitl, uan nima tijmatkej nopa religiones amo kichiuayayaj tlen Jesús kiijtok. Nojkia tikitakej toTeotsij amo kuali kinitayaya, yeka pejki tikitaj tlen kichiuaj religiones tlen amo tlauel kinixmatij.

Timokamanaljuijkej ininuaya se keskij maseualmej katli yauiyayaj ipan nopa religiones uan tikintlatsintokijkej miak tlamantli tlen Biblia. Tojuantij ya tijmajtoyaj tlake tlamachtia Biblia, yeka nima tijmatiyayaj tlaj kiijtouayayaj se tlamantli tlen amo eliyaya sanse ika tlen Biblia tlamachtia. Kema titlamiyayaj tikamanaltij ika nopa maseualmej, nikiljuiyaya toTeotsij ma kichiua sampa ma nijneki nikinitas tlaj inijuantij tlamachtiyayaj tlen melauak. Kema panok miak metstli, tikitakej yon se religión technankiliyaya ika Biblia tlen tijnekiyayaj tijmatisej, uan na amo nijnekiyaya sampa nimokamanaljuis ininuaya.

Teipa timonojnotskej ininuaya Jehová itlajtoltemakauaj. Kema tikintlatsintokijkej tlen ipan titlatsintokayayaj, technankilijkej ika Biblia. Tlen kiijtojkej eliyaya sanse ika tlen ya tijmatiyayaj. Teipa, tikintlatsintokijkej sekinok tlamantli tlen amo tijmatiyayaj, tijnekiyayaj tijmatisej kenijkatsa kinita toTeotsij katli kitekiuiaj drogas uan tabaco. Uan inijuantij sampa kitekiuijkej Biblia kema technankilijkej. Tikiniljuijkej tiaskiaj kampa mosentiliaj.

Tlauel ouij nijmatki nias ipan se tlanechikoli. Amo nechpaktiyaya nikamanaltis ininuaya sekinok, yeka amo kuali nikitak kema nochi nopa maseualmej katli kuali tenojnotsayayaj uan kuali moyoyontijtoyaj, yajkej nechtlajpalotoj. Nimoiljuiyaya maske kiampa kichiuayayaj, amo nelnelia kipixtoyaj kuali ininyolo, yeka ayokmo nijnejki nias tlanechikoli. Kej ipa nijchiuayaya, nikiljuik toTeotsij ma nechpaleui sampa nijnekis nikinitas nopa maseualmej tlaj itstoyaj ipan religión tlen melauak. Teipa, tlauel nijnejki inijuantij ma nechmachtikaj ika Biblia.

BIBLIA NECHPALEUIK KUALI MA NIMONEJNEMILTI: Nijmatiyaya monekiyaya ayokmo nijtekiuis drogas uan yeka nimantsi nijkajki. Tlauel ouij nijmatki ayokmo nijchichinas tabaco. Maske miakpa nijchijki kampeka nijkauas, amo niuelki. Yeka, kema nechiljuijkej sekij san kitepejkej inincigarros uan ayokmo kema sampa tlachichinkej, nikiljuik Jehová ma nechpaleui. Ipan nopa tonali, ayokmo kema sampa nitlachichinki. Uan nopa kichijki ma nikita monekiyaya nikiljuis toTeotsij nochi tlen nijyolmatiyaya.

Nojkia nijpatlak kej nimoyoyontiyaya uan nimoyejyekchiuayaya. Kema achtoui niajki ipan kali kampa mosentiliaj Jehová itlajtoltemakauaj, notsonkal eliyaya azultik uan mokejketstoya, teipa notsonkal nijchijki ma nesi chilkostik. Niajki ika nopantalo uan nochamarra tlen kipixtoya tlaixkopinkayotl. Nimoiljuiyaya amo monekiyaya nijpatlas kej nimoyoyontiyaya maske Jehová itlajtoltemakauaj miakpa nechiljuijkej monekiyaya nijpatlas. Teipa nimoiljuik ipan tlen kiijtoua 1 Juan 2:15-17: “Ayok xikiknelikaj tlen tlakamej ipan ni Tlaltipaktli kiikneliaj, niyon amo xikiknelikaj nopa tlamantli tlen eltok ipan ni Tlaltipaktli. Intla se tlakatl kiiknelia tlamantli tlen ni Tlaltipaktli, uajka axneli kiiknelia toTeko toTata”. Nopa texto nechpaleuik ma nijkuamachili kej nesiyaya, kinextiyaya nikiknelia ni Tlaltipaktli, yeka tlaj nijnekiyaya nijnextis nikiknelia toTeotsij, monekiyaya nijpatlas kej ninesiyaya. Uan kiampa nijchijki.

Teipa nikitak, toTeotsij kinekiyaya ma nia kampa mosentiliaj uan amo Jehová itlajtoltemakauaj, kej kiijtoua Hebreos 10:24, 25. Kema pejki nochipa nia tlanechikoli uan kuali nikinixmatki toikniuaj, nijnejki nimoatsonpoliuiltis.

¿KENIJKATSA NECHPALEUIJTOK? Tlauel niyolpaki kema nimoiljuia kenijkatsa Jehová techkaua ma timouampojchiuakaj iuaya. Ya tlauel teiknelia uan tetlasojtla, nopa kichiua ma nijneki nijchiuas sanse kej ya uan ma nijchiua ipan nonemilis tlen kichijki iKone Jesús (1 Pedro 2:21). Maske nojua moneki nijpatlas se keski tlamantli ipan nonemilis, amo tlauel ouij nijmati kiampa nijchiuas. Nijchijtok kampeka kuali nikinnojnotsas sekinok uan nijnextis niteiknelia. Uan nijchiua kampeka nijchiuas kej Jehová uan Jesús kema niitstok iuaya nosiua uan nokone. Nojkia nechtekipachoua tlen kinpano toikniuaj. Nama nijchiua kej Jesús uan nopa nechpaleuijtok ma nimotlepanita, ma nimopatiita uan ma nikinikneli sekinok.

“Kinextijkej nechtlepanitaj” (GUADALUPE VILLARREAL)

TLAKATKI IPAN: 1964

EUA: MÉXICO

SEKINOK TLAMANTLI: MOMEKATIYAYA

TLEN NECHPANOK: Nimoskaltik ipan Hermosillo, Sonora (México), nopaya itstokej miakej maseualmej katli teikneltsitsij. Notata mijki kema nojua nieliyaya nipilsiltsi, yeka nonana monejki tlauel tekitis uan kiampa techpanoltis. Kema nojua nieliyaya niokichpil pejki nitekiti pampa nijnekiyaya nijpaleuis nonana ika tomij uan amo nijuikayaya nozapatos pampa amo tijpiayayaj tomij tlen ika tijkouaskiaj. Tojuantij timokuatetsoptoyaj ipan tochaj pampa amo tlauexka eliyaya, kiampa itstoyaj miakej maseualmej ipan nopa altepetl.

Nonana tekitiyaya nochi setonal, yeka amo ueliyaya techmokuitlauia tlen maseualmej katli amo tikinixmatiyayaj. Kema nijpixtoya chikuasej xiuitl, se telpokatl katli kipixtoya 15 xiuitl nechchiualtik ma nimoteka iuaya uan miak xiuitl kiampa kichijki. Nopa kichijki ma nikinixtoka tlakamej, nimoiljuiyaya amo kenijki pampa kiampa nijchiuayaya. Nikamanaltik ininuaya miakej tepajtianij uan sacerdotes pampa nijnekiyaya ma nechiljuikaj tlake monekiyaya nijchiuas, uan inijuantij nechiljuijkej amo kenijki tlaj kiampa nijyolmatiyaya.

Kema nijpixtoya catorce xiuitl nijnejki sekinok ma kimatikaj nimosiuanekiyaya. Once xiuitl nojua kiampa nijchijki, uan ninenki ininuaya miakej tlakamej. Nimomachtik nitetsonkaltekis uan nijtlalik se kali kampa nitetsonkaltekiyaya. Nopa amo kichijki nelnelia ma niyolpaki pampa tlauel nitlaijiyouiyaya uan nechkajkayauayayaj. Nijmatiyaya amo kuali tlen nijchiuayaya, uan nimoiljuiyaya tlaj kanajya itstoyaj maseualmej katli kuali ininyolo.

Nikilnamijki se nosiuaikni kimachtijkej ika Biblia uan teipa moatsonpoliuiltik uan mochijki se tlen Jehová itlajtoltemakauaj. Ya nechiljuiyaya tlen kiyekouayaya uan na amo nijtlakakiliyaya. Maske kiampa nijchiuayaya, nikitayaya kuali monejnemiltiyaya uan kuali itstoya iuaya iueue. Iueue uan ya kuali monojnotsayayaj, moikneliyayaj uan motlepanitayayaj. Kema panok se keski tonali, se tosiuaikni pejki nechmachtia ika Biblia. Maske achtoui amo tlauel nechpaktiyaya, teipa ayokmo kiampa nijyolmatki.

BIBLIA NECHPALEUIK KUALI MA NIMONEJNEMILTI: Kema niajki kampa mosentiliaj Jehová itlajtoltemakauaj, nikitak inijuantij amo kichiuaj kej sekinok maseualmej. Sekinok nechuetskiliyayaj, uan inijuantij amo kiampa kichijkej. Yajkej nechtlajpalotoj uan kinextijkej nechtlepanitaj. Tlauel kuali nijyolmatki.

Ipan se ueyi tlanechikolistli tlen Jehová itlajtoltemakauaj, nojkia nikitak inijuantij nelnelia moikneliaj. Maske itstoyaj miakej maseualmej, inijuantij kinextiyayaj kuali ininyolo uan amo tlakajkayauaj, sanse kej nosiuaikni. Na nimoiljuik: “¿Uelis Jehová itlajtoltemakauaj elij nopa maseualmej katli nochipa nijnektoya nikinixmatis?”. Nimosentlachiliyaya pampa kuali mouikayayaj uan moikneliyayaj, uan nojkia pampa kitekiuiyayaj Biblia kema kinankiliyayaj tlen sekinok kinekiyayaj kimatisej. Nikitak Biblia kinpaleuiyaya kuali ma itstokaj. Uan nojkia nikitak tlaj nijnekiyaya nielis se Jehová itlajtoltemajka, monekiyaya nijpatlas miak tlamantli ipan nonemilis.

Nijpatlak nochi tlen nijchiuayaya, pampa niitstoya kej se siuatl. Monekiyaya nijpatlas kej nikamanaltiyaya, kej nimoojoliniyaya, kej nimoyoyontiyaya, kej nimoxiljuiyaya, nouampoyouaj uan sekinok tlamantli. Katli achtouia eliyayaj nouampoyouaj nechiljuiyayaj: “¿Kenke kiampa tijchiua? Kuali tiitstoya achtouia. Amo ximomachti Biblia. Amo tleno mitspoloua”. Maske tlauel ouij nijmatki kema kiampa nechiljuiyayaj, nojua tlauel ouij nijmatki ayokmo nimomekatis.

Tlen kiijtoua 1 Corintios 6:​9-11 asik ipan noyolo, uan nikitak kena ueliskia nijpatlas nonemilis. Nopaya kiijtoua: “Axinkimatij para axkuajkualmej axuelis kalakisej kampa tlanauatia toTeko. ¡Amo ximokajkayauakaj! Axkalakisej nepa tlen kichiuaj tlamantli ika tlen axininnamik, o tlen kinueyimatij tlaixkopinkayomej, o tlen momekatiaj, o tlakamej tlen mosiuanekij. Axkalakisej nepa tlakamej tlen kichiuaj tlen ueli ika sekinok tlakamej [...]. Achtouia sekij inmojuantij initstoyaj keja nopa, pero ama toTeko inmechpajpajki tlen inmotlajtlakoljuaj”. Uejkajkia Jehová kinpaleuik ma kipatlakaj ininnemilis se keskij maseualmej, uan na nojkia nechpaleuik. Maske niuejkajki se keski xiuitl, uan nijchijki se ueyi kampeka nijpatlas nonemilis, tlauel nechpaleuik pampa toikniuaj kinextijkej nechikneliaj uan nechpaleuijkej ika tlen nechiljuiyayaj.

¿KENIJKATSA NECHPALEUIJTOK? Ipan ni tonali nimosiuajtijtok uan na iuaya nosiua tijmachtiaj tokone ma moyakana ika tlen kiijtoua Biblia. Ayokmo nijchiua tlen uejkajkia nijchiuayaya, uan Jehová tlauel nechteochijtok uan nijselijtok miak tekitl ipan tlanechikoli. Nitlatekipanoua kej ueuejtlakatl uan nikinpaleuijtok miakej maseualmej ma kimatikaj tlen Biblia tlamachtia. Uan pampa nijpatlak nonemilis, nonana nojkia kinejki momachtis Biblia uan teipa moatsonpoliuiltik. Se nosiuaikni tlen achtouia auilnemiyaya, nojkia kipatlak inemilis uan mochijki se Jehová itlajtoltemajka.

Se keskij maseualmej katli nechiljuiyayaj amo ma nijpatla nonemilis, nama kiitaj tlauel kuali niitstok, uan amo kej achtouia. Uan na nijmati tlake nechyololinik ma nijpatla nonemilis. Uejkajkia nikiniljuik se keskij maseualmej ma nechpaleuikaj, maske kiampa nijchijki, tlen nechiljuijkej amo nelnelia nechpaleuik. Uan Jehová kena tlauel nechpaleuik. Maske nimoiljuiyaya amo kinamiki, Jehová kikajki ma nijnechkaui, kipixki ueyi iyolo nouaya uan kinextik nechiknelia. Asik ipan noyolo kema nimoiljuik kenijkatsa toTeotsij katli tlauel teiknelia uan tlalnamiki kinejki ma nijnechkaui uan kuali ma niitsto.

“Amo kuali nijyolmatiyaya uan nijmatiyaya niitstoya noselti” (KAZUHIRO KUNIMOCHI)

TLAKATKI IPAN: 1951

EUA: JAPÓN

SEKINOK TLAMANTLI: TLAUEL KINEKIYAYA TLATLANIS IPAN CICLISMO

TLEN NECHPANOK: Nimoskaltik ipan se altepetl kampa amo panoyaya miak tlamantli tlen amo kuali, ipan Shizuoka (Japón). Niitstoya ininuaya chikueyij nochampoyouaj ipan se pilkaltsi. Notata kinamakayaya bicicletas uan kema nieliyaya nipilsiltsi nechuikayaya kampa motlajtlanij ika bicicletas, nopa kichijki tlauel ma nechpakti ciclismo. Ya kinekiyaya kuali ma nijyeko uan kiampa ueliskia nimotlanis ika sekinok, uan yeka pejki nechkualchijchiua kema nijpixtoya 14 xiuitl. Uan kema nijpixtoya 16, 17 uan 18 xiuitl, expa nitlatlanki. Ipan se universidad kinekiyayaj nopaya ma nimomachti, maske ya nopa kinekiyayaj, na nijtlapejpenik nimomachtis kampa kinmachtiaj katli motlajtlanij. Uan kema nijpixtoya 19 xiuitl, ya nimotlaniyaya ika sekinok katli nojkia chikauak kinemiltiyayaj bicicleta.

Ipan nopa tonali, nimosentlalijtoya san na kuali nijnemiltis bicicleta ipan Japón. Nijnekiyaya nijtlanis miak tomij pampa nijnekiyaya nochampoyouaj amo tleno ma kinpolo, yeka pejki nochipa nimokualchijchiua. Uan kema tlauel nisiauiyaya kema tijchiuayayaj ejercicio uan nimoiljuiyaya tlauel ouij kampa tipanoskiaj ika bicicleta, noselti nimoiljuiyaya san na tlauel kuali nijnemiltiyaya bicicleta, uan yeka nojua monekiyaya nijchiuas kampeka. Teipa pejki nijtlani miak tomij. Ipan nopa xiuitl kema pejki nimotlani ininuaya sekinok, nechmakakej se premio. Kema panok se xiuitl, nechselijkej kampa kiitaskiaj ajkia tlauel kuali kinemiltiyaya bicicleta ipan Japón. Chikuasej imiakpa nimokajki ipan segundo lugar.

Nijpiayaya miak chikaualistli uan miakpa nitlatlanki, yeka nechiljuiyayaj Locomotora tlen Tokai, kej se pilaltepetsi. Tlauel nijnekiyaya nitlatlanis. Sekinok nechmakasiyayaj pampa amo nikinkauayaya ma tlatlanikaj. Kema pejki nijtlani miak tomij, nimokouik nochi tlen nijnekiyaya. Nimokouik se kali tlen nojkia kipixtoya kampa ueliskia nijchiuas ejercicio uan se carro tlen nojkia tlauel patiyo kej nopa kali. Teipa nijkojki miak tlali uan kali, uan nopa tomij tlen mokajki nijtlalik kampa ueliskia momiakilis.

Maske nijpixtoya miak tlamantli, amo kuali nijyolmatiyaya uan nijmatiyaya niitstoya noselti. Ipan nopa tonali, ya nimosiuajtijtoya uan nikinpixtoya eyij nokoneuaj. Kemantika sanima nikualaniyaya ika nosiua uan nokoneuaj. Inijuantij kitlachiliyayaj noixayak uan kiampa kiitayayaj tlaj nikualantoya o amo.

Se tonali, nosiua pejki momachtia ininuaya Jehová itlajtoltemakauaj, nopa kichijki ma mopatla miak tlamantli ipan tonemilis. Kema kiijtok kinekiyaya yas tlanechikoli, nikiljuik nochi tiaskiaj. Nikilnamiki se ueuejtlakatl yajki nochaj ika tiotlak pampa peuaskia nechmachtis ika Biblia. Uan tlen nijyekok asik ipan noyolo.

BIBLIA NECHPALEUIK KUALI MA NIMONEJNEMILTI: Amo kema nikilkauas tlen kiijtoua Efesios 5:⁠5: “Axuelis kalakis kampa Cristo uan kampa toTeko tlanauatia se tlakatl tlen kichijtinemi tlen axkuali, o tlen kichijtinemi tlen ueli ika tlen axinamik, o tlen kineki más tlamantli mojmostla. Pampa se tlen tlauel kineki moaxkatis más tlamantli, itstok sanse keja se tlen kinueyichiua toteotsitsij”. Nikitak kema timotlaniyayaj ika bicicleta, maseualmej mauiltiyayaj ika tomij uan nojkia kichiuayaya ma kinekikaj kipiasej miak tomij. Yeka pejki nechyolkokoua notlalnamikilis. Nikitak tlaj nijnekiyaya nijyolpakiltis Jehová, monekiyaya ayokmo nimotlanis ininuaya sekinok, tlauel ouij nijmatki kiampa nijchiuas.

Ipan nopa xiuitl tlen panotoya, tlauel nitlatlantoya uan sampa nijnekiyaya kiampa nijchiuas. Maske ya nopa nijnekiyaya, nikitak kema nimomachtiyaya Biblia nechpaleuiyaya kuali ma nijyolmati uan ma nijpia noyolo ika sekinok, uan amo kiampa nijmatiyaya kema nimotlaniyaya ininuaya sekinok. Kema pejki nimomachtia Biblia, san expa nimotlajtlanki ininuaya sekinok. Maske kiampa nijchijki, nojua nechyoltilanayaya nijchiuas nopa. Amo nijmatiyaya kenijkatsa nikinpanoltiskia nochampoyouaj yon nijmatiyaya tlake nijchiuas. Nojkia, nochampoyouaj amo kinpaktik pampa nimomachtiyaya ininuaya Jehová itlajtoltemakauaj. Notata tlauel moyolkokok. Nochi ni tlamantli kichijki ma nijpia se kokolistli ipan noijti.

Ipan nopa tonali, tlauel nechpaleuik pampa nojua nimomachtiyaya Biblia uan nojkia pampa niauiyaya tlanechikoli. Ika yolik pejki kuali nitlaneltokatia. Nikiljuik Jehová ma nechtlakakili uan ma nechpaleui nikitas kena nechtlakakiliyaya kema nimomaijtouayaya. Nosiua nojkia nechpaleuik ayokmo tlauel ma nimotetsopa kema nechiljuik amo monekiyaya kipias se ueyi kali uan kiampa yolpakis. Ika yolik pejki nojua kuali nitlaneltokatia.

¿KENIJKATSA NECHPALEUIJTOK? Nikitstok nelnelia tlen kiijtok Jesús ipan Mateo 6:33, nopaya kiijtoua: “Achtoui xijtemokaj para inkalakisej ipan itlanauatilis toTeko uan para inkipiasej se yolistli tlen xitlauak iixtla. Uan yajaya inmechmakas nojkia nochi ni tlamantli tlen moneki”. Kej Jesús kiijtok, amo kema techpolojtok “tlen moneki” pampa nochipa tijpixtiualajtokej tlen ika timopanoltisej. Maske ayokmo nijtlani miak tomij kej achtouia, ipan ni veinte xiuitl tlen panotok amo kema techpolojtok se tlamantli tlen nelnelia moneki.

Tlauel niyolpaki nijtekipanos Jehová ininuaya toikniuaj uan yeka amo nijmati kenijkatsa pano tonali. Nojkia tlauel kuali niitstok ininuaya nochampoyouaj. Nikinpia eyij nokoneuaj uan nochi inijuantij kitekipanouaj Jehová ininuaya ininsiuajuaj.