1. ¿Kenke se keskij toikniuaj kimatij ouij momachtisej?

IPAN ni tonali nelia tlauel ouij tijpiasej tlen ika timopanoltisej. Miakej toikniuaj moneki se tonal tlauel tekitisej uan kiampa kipiasej tlen ika uelis kinpanoltijtiasej ininchampoyouaj. Sekij tlauel ijnalok kisaj uan tlauel tlayoua asij ininchaj pampa uejka tekitij, uan sekinok tlauel siauij kampa tekitij pampa moneki kitekiuisej miak chikaualistli. Nochi ni toikniuaj asij ininchaj tlauel siajtokej, yeka tlauel ouij kimatij nojua momachtisej.

2. ¿Kema tijkixtia tonali timomachtis?

² Maske kiampa pano, moneki tijkixtisej tonali uan kiampa tijpouasej toTeotsij iTlajtol uan amatlajkuiloli, uan kuali timomachtisej. Uelis kuali timouampojchiuasej ika Jehová uan timomakixtisej tlaj kiampa tijchiuasej (1 Tim. 4:15, 16). Sekij toikniuaj mojmostla kualka meuaj uan momachtiaj kema nojua tlatsitsikatok uan uelij moyoliljuiaj ipan tlen momachtiaj pampa kuali mosiaketskej. Uan sekinok momachtiaj uan moyoliljuiaj ipan tlen kipouaj kema nechka kochisej, pampa nojkia ya tlatsitsikatok.

3, 4. ¿Tlake amatlajkuiloli ayokmo mochijchiua, uan kenke?

³ Nochi tijmatij moneki tijkixtisej tonali uan kiampa timomachtisej. ¿Tlake uelis timomachtisej? Uelis timoiljuiaj tlauel onka miak tlamantli tlen uelis tijpouasej uan yeka tijmatij ouij tijpouasej nochi nopa tlamachtili. Maske sekij kena uelij, miakej toikniuaj amo uelij kichiuaj nopa. Toikniuaj Katli kinyakanaj Jehová itlajtoltemakauaj kimatij nopa tlamantli, yeka namanok kiijtojkej ayokmo kisaskia miak tlamachtili.

⁴ Nama ayokmo tijchiuaj nopa amochtli Anuario de los testigos de Jehová, pampa ipan jw.org^® uan ipan JW Broadcasting^®, tlen kisa sejse metstli, uelis tikitasej tlen kinpanotok miakej toikniuaj. Nojkia, ipan se xiuitl san mochijchiua eyi pilamochtsitsij Tlen Tematiltia uan eyi pilamochtsitsij ¡Xitlachixtokaj!  Ni tlamantli amo mopatlak pampa kiampa ueliskia tijchiuasej sekinok tlamantli, mopatlak pampa kiampa ueliskia tikachtouitlalisej “tlen nelia kuali” (Filip. 1:10). Ma tikitakaj tlake moneki tikachtouitlalisej uan tlake uelis tijchiuasej tlaj tijnekij ma techpaleui tlen timomachtisej ipan Biblia.

5, 6. ¿Tlake moneki kuali timomachtisej?

⁵ ¿Tlake achtoui moneki timomachtisej? Moneki mojmostla tijkixtisej tonali uan kiampa uelis timomachtisej toTeotsij iTlajtol. Nama, tlen moneki mopouas sejse chikueyi ipan tlanechikoli ayokmo kipia miak capítulos tlen Biblia. Uajka, uelis kuali timoyoliljuisej ipan tlen tijpouaj uan tijtemosej ipan amatlajkuiloli kenijkatsa moixtoma se keski textos. Amo kinamiki san tijpouasej nopa capítulos, moneki tijkauasej nopa tlamachtili tlen Biblia ma asi ipan toyolo uan ma techpaleui nojua kuali timouampojchiuasej iuaya Jehová (Sal. 19:14).

⁶ ¿Tlake sekinok tlamantli nojkia moneki timomachtisej? Moneki kuali timomachtisej nopa tlamachtili tlen uala ipan Tlen Tematiltia, tlen moixtomas Kampa techmachtiaj ika Biblia uan nochi tlen moixtomas ipan tlanechikoli. Uan kema kistias pilamochtsitsij Tlen Tematiltia uan ¡Xitlachixtokaj!, moneki tijtlamipouasej.

7. ¿Moneki timotekipachosej tlaj amo tiuelij tijpouaj nochi tlen kistia ipan jw.org uan ipan JW Broadcasting?

⁷ Uelis timoiljuiaj: “Tlauel miak tlamachtili eltok ipan jw.org uan ipan JW Broadcasting, amo uelis nijtlamipouas...”. Ma timoiljuikaj ipan ni neskayotl: kampa kinamakaj tlakualistli onka tlauel miak tlamantli tlen uelis tijkuas uan nochi ajuiyak. Katli asij nopaya amo uelis kikuasej nochi, yeka kitlapejpeniaj san se keski tlen kinpaktia. Nojkia kiampa pano ika nochi nopa tlamachtili, yeka amo ma timotekipachokaj tlaj amo tiuelij tijpouaj nochi tlen kistia. San ma tijpouakaj uan ma tikitakaj tlen tiuelisej. Uan, ¿tlake kiijtosneki timomachtisej, uan tlake uelis tijchiuasej tlaj tijnekij ma techpaleui tlen timomachtiaj?

8. 1) ¿Tlake uelis tijchiuasej kema timomachtisej ika Tlen Tematiltia? 2) ¿Kenijkatsa techpaleuis tlaj tijchiuasej ni?

⁸ Timomachtisej amo kiijtosneki san tijpouasej o tijuasanisej kampa monankilia se keski tlajtlanili. Moneki kuali tijpouasej se tlenijki pampa tijnekij tijyekosej se keski tlamantli. Ma tikitakaj kenijkatsa uelis tijchiuasej ni kema timomachtisej ika pilamochtsi Tlen Tematiltia. Achtoui ma tijpouakaj kampa nesi tlen moixtomas, tlen eltok kampa peua tlamachtili. Teipa, ma tikitakaj itoka nopa tlamachtili, tlen kiijtoua kampa moxejxeloua tlamachtili uan tlajtlanili tlen ika moompauia. Teipa, yolik uan kuali ma tijpojtiakaj nochi tlamachtili. Kuali ma tikitakaj tlake kiijtoua se keski tlajtoli tlen uala ipan sejse párrafo, kemantika uala kampa peua, kiampa tijmatisej nochi tlen moixtomas ipan tlamachtili. Nopa tlajtoli kinextia tlen moixtoma ipan párrafo. Kema tijpojtiasej, ma timoiljuikaj kenijkatsa sejse párrafo kipaleuia tlen kiijtoua kampa moxeloua tlamachtili uan kenijkatsa mouika ika nochi tlen moixtoma. Ma tikijkuilokaj tlajtoli tlen amo tijkuamachiliaj uan se keski tlamantli tlen teipa uelis tijtemosej tlake kiijtosneki.

9. 1) ¿Kenke moneki kuali tijpouasej nochi textos kema timomachtiaj ika Tlen Tematiltia, uan kenijkatsa uelis tijchiuasej? 2) Kej kiijtoua Josué 1:8, ¿tlake nojkia moneki tijchiuasej kema tijpouasej textos?

⁹ Kema timomachtiaj ika Tlen Tematiltia, timomachtiaj ika Biblia. Yeka, kuali ma tijpouakaj nochi nopa textos, uan nojua tlauel kuali  ma tijpouakaj katli mopouas ipan tlanechikoli. Ma tikitakaj kenijkatsa nopa tlajtoli tlen eltok ipan textos kipaleuia tlen moixtoma ipan párrafo. Uan ma timoyoliljuikaj ipan nopa textos uan ma timoiljuikaj kenijkatsa uelis tijchiuasej ipan tonemilis tlen nopaya kiijtoua (xijpoua Josué 1:8).

10. Kej kiijtoua Hebreos 5:14, ¿kenke tetajmej moneki kinextilisej ininkoneuaj kenijkatsa momachtisej o kitemosej se tlamachtili kema momachtisej ininuaya?

¹⁰ Nama ma tikitakaj kema timomachtiaj ininuaya tochampoyouaj. Tetajmej kinekij ininkoneuaj ma kinpakti kema momachtisej sansejko. Uan maske tetajmej moneki kiitasej tlake momachtisej ika ininchampoyouaj, amo moneki nochipa kichiuasej uejueyi tlamantli. Uelis kiitasej JW Broadcasting o kichiuasej seyok tlamantli, kej kiixkopinasej uan kichijchiuasej nopa ueyi akali tlen Noé kichijchijki. Nojkia moneki kinmachtisej ininkoneuaj kenijkatsa uelis momachtisej. Konemej moneki kiyekosej kenijkatsa mokualchijchiuasej ika tlen moixtomas ipan tlanechikoli o kitemosej se keski tlamachtili tlen kinpaleuis ma kiixnamikikaj tlen kinpano kampa momachtiaj (xijpoua Hebreos 5:14). Tlaj momatisej momachtisej o kitemosej se tlamachtili, kinpaleuis kuali ma tlakaktokaj ipan tlanechikoli o ipan uejueyi tlanechikolistli, kampa amo nochipa kinextiaj se video. Tetajmej moneki kiitasej keski uejkauasej kema momachtisej ininuaya ininkoneuaj, pampa amo nochi sanse elij yon sanse ininxiui.

11. ¿Kenke moneki tikinnextilisej ininselti ma momachtikaj katli tikinmachtiaj ika Biblia?

¹¹ Katli tikinmachtiaj ika Biblia nojkia moneki kimatisej kenijkatsa momachtisej ininselti. Maske tlauel tiyolpakij kema tikitaj kenijkatsa kiuasanijtokej nopa tlamachtili tlen tikixtomasej ininuaya o ipan tlanechikoli, nojkia moneki tikinnextilisej kenijkatsa uelis kitemosej sekinok tlamachtili uan kuali momachtisej kema itstosej ininseltsitsij. Kiampa, kema kiixnamikisej se kuesoli, amo nimantsi kiiljuisej se akajya tlen tlanechikoli ma kinpaleui, achtoui inijuantij kitemosej ipan amatlajkuiloli se tlamachtili tlen kinpaleuis.

12. ¿Tlake uelis timosentlalisej kema timomachtiaj?

¹² Tlaj amo techpaktia timomachtisej, uelis timoiljuiaj amo kema techpaktis. Maske kiampa timoiljuiaj, kena uelis techpaktis timomachtisej. Achtoui kentsi ma timomachtikaj, uan teipa nojua ma tiuejkajtiakaj seyok kentsi. Moneki tikilnamikisej kenke tijnekij timomachtisej. Timosentlaliaj kuali timomachtisej  pampa tijnekij kuali timouampojchiuasej iuaya Jehová. Uan nojkia uelis timosentlalisej ipan seyok tlamantli: tijtemosej kenijkatsa tijnankilisej se akajya katli techchiuilik se tlajtlanili o tijtemosej se tlamachtili tlen techpaleuis kema tijpiasej se kuesoli.

13. 1) ¿Tlake uelis kichiuas se telpokatl katli kineki kimanauis tlen melauak kampa momachtia? 2) ¿Kenijkatsa uelis tijchiuas tlen kiijtoua Colosenses 4:6?

¹³ ¿Tieli titelpokatl uan nojua timomachtia? Uelis nochi katli ininuaya timomachtia tlaneltokaj ipan evolución. Maske tijnekiskia tikiniljuis tlen Biblia tlamachtia, timoiljuia amo tiuelis. Yeka, moneki kuali timomachtis tlen nopa tlamantli. Uelis timosentlalis ipan ome tlamantli. Se, timotemachis uan tijneltokas toTeotsij nelia kichijchijki nochi tlen onka. Uan ome, nojua kuali tijmatis kenijkatsa tikixtomas tlen Biblia kiijtoua o tijmanauis tlen melauak (Rom. 1:20; 1 Ped. 3:15). Achtoui monekiskia tikintlatsintokis katli ininuaya timomachtia kenke tlaneltokaj ipan evolución. Uan teipa kuali tijtemos ipan amatlajkuiloli kenijkatsa moixtoma nopa tlamantli. Nopa mitspaleuis amo ouij tikixtomas tlen tijneltoka. Sekij tlaneltokaj ipan evolución pampa se akajya katli kitlepanitaj kiniljuijtok nopa. Kema tijmatis se keski tlamantli, mitspaleuis kuali xijnankili se akajya katli mitstlatsintokis se keski tlamantli (xijpoua Colosenses 4:6).

14-16. 1) ¿Tlake uelis tijchiuasej tlaj tijneki tijyekosej se keski tlamantli tlen se pilamochtsi katli amo kuali tikixmatij? 2) Xikixtoma kenijkatsa se keski textos uelis techpaleuis ma tijmatikaj miak tlamantli tlen pilamochtsi Amós (nojkia xikita nopa recuadro “ Kuali ma tikinixmatikaj”).

¹⁴ Ma timoiljuikaj ipan se tlanechikoli tlen tijpiasej moixtomas se pilamochtsi tlen kiijkuilok se tlajtolpanextijketl katli amo tlauel kuali tikixmatij. Achtoui moneki ma tijnekikaj tijyekosej se keski tlamantli tlen kiijkuilok nopa tlajtolpanextijketl. ¿Kenijkatsa uelis tijchiuasej nopa?

¹⁵ Ueliskia timotlajtlanisej: “¿Tlake nijmati tlen nopa tlajtolpanextijketl? ¿Ajkia eliyaya, kanke itstoya uan tlake tekitl kipixtoya?”. Nochi ni tlamantli techpaleuis ma tijkuamachilikaj kenke kitekiuik se keski tlajtoli o se keski neskayotl. Kema tijpojtiasej, ma tijtemokaj se keski tlajtoli tlen kinextis kenijkatsa eliyaya katli kiijkuilok nopa pilamochtsi.

¹⁶ Teipa, ma tijtemokaj kema moijkuilok nopa pilamochtsi. Uelis tikitasej nopa “Tabla de los libros de la Biblia” ipan Traducción del Nuevo Mundo de las Santas Escrituras (con referencias). Nojkia uelis tikitasej tlaxeloli 3 tlen pilamochtsi Tlen techpaleuis timomachtisej toTeotsij iTlajtol, kampa kamanalti tlen tlajtolpanextianij uan tlanauatianij. Pampa nopa pilamochtsi kamanalti tlen miak tlajtolpanextili, ueliskia tijtemosej kenijkatsa itstoyaj maseualmej ipan nopa tonali. Tlake tlamantli tlen amo kuali kinekiyaya kipatlas nopa tlajtolpanextijketl uan ajkia sekinok maseualmej nojkia itstoyaj ipan nopa tonali. Uan tlaj tijnekij tijmatisej nochi tlen panoyaya, uajka moneki tikitasej tlake kiijtoua sekinok pilamochtsitsij. Ma tikitakaj se neskayotl: tlaj tijnekij tijmatisej tlake panoyaya kema itstoya tlajtolpanextijketl Amós, uelis tijpouasej se keski textos tlen pilamochtsitsij 2 Reyes uan 2 Crónicas. Ipan Amós 1:1 uelis tijpantisej tlake textos tijpouasej tlen nopa pilamochtsitsij. Nojkia uelis tijmatisej sekinok tlamantli tlaj tijpouasej pilamochtsi Oseas, katli nojkia itstoya kema Amós tlajtolpanextiyaya. Nochi nopa tlamantli tlen tijmatisej, techpaleuis ma tijkuamachilikaj kenijkatsa eliyayaj maseualmej uan tlake panoyaya kema Amós itstoya (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Xikixtoma kenijkatsa techpaleuia nojua tlauel ma techpakti tijpouasej Biblia kema tijnekij tijmatisej sekinok tlamantli tlen nesi amo tlauel ipati. Uelis tijtekiuis neskayotl tlen nikaj uala o seyok tlen ta tijpantik.

¹⁷ Kema tijpouasej Biblia, moneki tijnekisej tijmatisej miak tlamantli. Ma timoiljuikaj tijpojtokej Zacarías, capítulo 12, ipan Traducción del Nuevo Mundo de las Santas Escrituras (con referencias), kampa uala se tlajtolpanextili tlen kiijtoua nopa Mesías mikiskia (Zac. 12:10). Ipan versículo 12 kiijtoua “Natán ichampoyouaj” tlauel mochokiliskiaj kema Mesías mikiskia. Ueliskia timoketsasej uan timotlajtlanisej: “¿Kenke Natán ichampoyouaj kichokiliskiaj Mesías? ¿Kanke uelis nijpantis sekinok tlamantli?”. Uajka, nimantsi tijtemouaj ipan sekinok textos. Zacarías 12:12 kiijtoua ma tikitakaj 2 Samuel 5:14, uan tikitaj kiijtoua Natán eliyaya se tlen David ikoneuaj. Uan ipan Lucas 3:31 kinextia Jesús inana, María, ualajki tlen Natán ichampoyouaj (xikita Tlen Tematiltia, agosto 2017, iamayo 32, párrafo 4). Uajka, uelis tijyekosej miak tlamantli. Maske tijmajtoyaj Jesús eliskia David iteipaixui, ya kinpixtoya kipano veinte ikoneuaj. Nama tijkuamachiliaj kenke Zacarías kiijtok Natán ichampoyouaj tlauel chokaskiaj kema Jesús mikiskia.

¹⁸ Ma tikitakaj seyok neskayotl. Ipan Lucas, capítulo 1, kiijtoua nopa iluikaejketl Gabriel kiitato María uan kiiljuik ni tlamantli tlen nopa konetl katli kipiaskia: “Yajaya elis ueyi iixtla toTeko. Uan tlakamej kiixmatisej para iKone toTeko Dios tlen más kipia tlanauatili. Uan toTeko kichiuas ma moseuis uan tlanauatis kampa tlanauatiyaya iuejkapantata David. Uan kipias tekiuejkayotl ika israelitajmej para nochipa” (Luc. 1:32, 33). Uelis nima tikitaj nopa iluikaejketl kiijtok “iKone toTeko  Dios tlen más kipia tlanauatili”. Iluikaejketl Gabriel amo san ya nopa kiijtok, nojkia kiijtok Jesús eliskia tlanauatijketl. Uelis timotlajtlaniaj tlake kikuamachilik María kema kikajki nopa tlajtoli. ¿Moiljuik kitekipatlaskia Herodes o sekinok tlanauatianij tlen Israel? ¿Moiljuik ya uan ichampoyouaj itstoskiaj tekikalko kampa ikone tlanauatiskia? Ipan Biblia amo kana tijpantiaj tlaj María kiampa moiljuik kema kamanaltik iuaya Gabriel. Nojkia amo kiijtoua tlaj tlajtlanki ma kikauakaj tekichiuas iuaya ikone, kej kichijkej omej itokilijkauaj Jesús (Mat. 20:20-23). Ni tlamantli technextilia kenijkatsa María tlauel moechkapantlaliyaya.

19, 20. Kej kiijtoua Santiago 1:22-25 uan 4:8, ¿kenke tijnekij timomachtisej?

¹⁹ Moneki tikilnamikisej tojuantij tijnekij timomachtisej toTeotsij iTlajtol uan sekinok amatlajkuiloli pampa tijnekij nojua kuali timouampojchiuasej iuaya Jehová. Uan nojkia tijnekij tijmatisej kenijkatsa timonejnemiltiaj uan tlake tlamantli moneki tijpatlasej ipan tonemilis uan kiampa tijyolpakiltisej toTeotsij (xijpoua Santiago 1:22-25; 4:8). Yeka, nochipa kema timomachtisej, tlauel moneki tikiljuisej Jehová ma techmaka itonal. Nojkia, tlauel moneki titlajtlanisej ika nochi toyolo ma techpaleui kuali timomachtisej uan ma techpaleui timoitasej kej ya techita.

²⁰ Nochi ma tielikaj kej se toTeotsij itekipanojka, kej katli ijkuilijtok ipan Salmo 1:2, 3: “Kipantia ueyi pakilistli pampa kichijtinemi tlen kiijtoua itlanauatiljuaj toTeko, uan ipan nopa tlanauatili moyoliljuijtinemi tonaya uan tlayoua. [...] Nochi tlen kichiua kisa kuali”.