1, 2. ¿Tlake kiijtok Jehová panoskia ipan ni tonali?

IPAN nochi Tlaltipaktli itstokej maseualmej katli mosentikapaleuiaj, uan nochi inijuantij kiikneliaj toTeotsij uan kinekij kitekipanosej. Nopa maseualmej kinixmatij kej Jehová itlajtoltemakauaj. Maske inijuantij nojkia mokuapolouaj, Jehová kinyakana ika itonal uan tlauel kinteochijtok. Ma tikitakaj kenijkatsa kichijtok.

² Ipan xiuitl 1914 san se keskij kiueyichiuayayaj Jehová. Ipan ni tonali tlauel miakej momachtijtokej Biblia uan mochijtokej itlajtoltemakauaj pampa Jehová kinteochijtok itekipanojkauaj kema tlajtolmoyajtokej. ToTeotsij ipa kiijtojtoya kenijkatsa panoskia ni: “Tlen más pilsiltsitsij, nikinmiakilis hasta mochiuasej se mil tlakamej. Uan nopa tlakamej tlen ayok miak mokajtokej, nikinchiuas ma kitemitikaj se tlali uan tlauel kipiasej chikaualistli. Na niinmoTeko nijchiuas ma pano nochi ya ni ipan nopa tonali tlen na nikixtlalijtok” (Is. 60:22). Nama tikitstokej kenijkatsa moaxitijtok ni  tlajtolpanextili. Jehová itlanechikol mochijtok kejuak eliskia se altepetl. Ipan miak altepemej amo itstokej miakej maseualmej kej katli itstokej ipan Jehová itlanechikol.

3. ¿Kenijkatsa Jehová itekipanojkauaj kinextijtokej teikneliaj?

³ Jehová kinpaleuijtok itekipanojkauaj nojua tlauel ma moiknelikaj. Biblia kiijtoua toTeotsij “yajaya teiknelijkayotl” uan kineki nojkia ma timoiknelikaj (1 Juan 4:8). Jesús kinnauatik itokilijkauaj ma moiknelikaj “se ika seyok”. Uan teipa kiniljuik: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:34, 35). Ipan ni tonali Jehová itekipanojkauaj nojkia kinextijtokej moikneliaj maske onkatok tlauilankayotl. Kema ika ompa mochijki nopa ueyi tlauilankayotl, mijkej se 55 millones. Maske tlauel miakej mijkej, Jehová itlajtoltemakauaj amo aka kimiktijkej ipan nopa ueyi tlauilankayotl (xijpoua Miqueas 4:1, 3). Jehová itlajtoltemakauaj amo temiktijtokej pampa tlauel teikneliaj (Hech. 20:26, TNM).

4. ¿Tlake pano ika Jehová itlajtoltemakauaj maske Satanás kineki kintsakuilis?

⁴ ToTeotsij itekipanojkauaj nojua momiakilijtiauij maske Satanás, katli “kinauatia ni Tlaltipaktli”, tlauel kinkualankaita (2 Cor. 4:4). Satanás amo kineki ma tlajtolmoyauakaj, yeka kitekiuia miak tlamantli tlen ika kineki kintsakuilis uan nojkia ika tlen kichiuaj políticos. Maske kichiua miak tlamantli, ya amo ueli kintsakuilia, yeka nojua kineki kichiuas ayokmo ma kitekipanokaj Jehová, pampa “kimati axpoliui miak tonali” kema kitlajtolsenkauasej (Apoc. [Rev.] 12:12).

5. ¿Kenke kemantika sekinok uelis techyolkokosej? (Xikita nopa achtoui tlaixkopinkayotl).

⁵ Katli tijtekipanouaj Jehová tijmatij tlauel moneki tikiknelisej, uan nojkia moneki tikiniknelisej sekinok. Jesús kiijtok: “‘Xikikneli toTeko Dios ika nochi moyolo, uan ika nochi moalma, uan ika nochi motlalnamikilis’. Ya ni nopa tlanauatili tlen más ueyi uan tlen más moneki tijchiuasej. Uan nopa ompa tlanauatili no iuikal elisneki: ‘Xikinikneli sekinok keja timoiknelia moselti’” (Mat. 22:35-39). Maske tijnekiskiaj tijchiuasej ni, Biblia kiijtoua nochi titlajtlakolejkej pampa Adán tlajtlakolchijki (xijpoua Romanos 5:12, 19). Yeka ipan tlanechikoli, kemantika se toikni uelis kiijtos o kichiuas se tlenijki tlen techyolkokos. ¿Tlake tijchiuasej tlaj kiampa techpanos? ¿Tijnextisej nelia tikikneliaj Jehová? ¿Nojua tijtekipanosej Jehová uan amo tikintlauelkauasej toikniuaj? Biblia kiijtoua se keskij toTeotsij itekipanojkauaj kinyolkokojkej sekinok ika tlen kichijkej o ika tlen kiijtojkej. Ma tikitakaj tlake techmachtia tlen inijuantij kinpanok.

6. ¿Kenke Elí tlauel mokuapolok?

⁶ Ma tikitakaj tlake kipanok Elí. Ya eliyaya sumo sacerdote ipan altepetl Israel, uan omej ikoneuaj amo kichiuayayaj tlen Jehová tlanauatijtoya. Biblia kiijtoua “eliyayaj axkuajkualmej uan niyon kentsi” kitlepanitayayaj Jehová (1 Sam. 2:12). Maske Elí kimatiyaya ikoneuaj kichiuayayaj tlen amo kuali, ya tlauel mokuapolok pampa amo kintlalnamiktik. Yeka teipa Jehová kitlatsakuiltik Elí ininuaya  ikoneuaj. Nojkia amo kikajki yon se tlen ichampoyouaj Elí ma tlatekipano kej sumo sacerdote (1 Sam. 3:10-14). Ximoiljui tiitstok ipan nopa tonali uan tikita kenijkatsa Elí amo kintlalnamiktia ikoneuaj maske kichiuaj tlen amo kuali. ¿Tlake tijchiuaskia? ¿Ayokmo kuali titlaneltokaskia uan ayokmo tijtekipanoskia Jehová?

7. ¿Tlake kichijki David, uan tlake kichijki toTeotsij?

⁷ Nojkia ma tikitakaj tlake kichijki David. Jehová tlauel kiikneliyaya pampa kinextiyaya kuajkuali tlamantli ipan inemilis (1 Sam. 13:13, 14; Hech. 13:22). Se tonali ya nojkia tlauel mokuapolok pampa kichijki se tlamantli tlen tlauel amo kuali. Kema Urías yajtoya tlateuia, David kisiuakuilik uan momekatik iuaya Bat-seba. Uan kema Bat-seba kiiljuik konepiaskia, David kinotski Urías pampa kinekiyaya ma itsto iuaya isiua, kiampa kema maseualmej kiitaskiaj konepiaskia, moiljuiskiaj eliyaya ikone Urías. Pampa Urías amo kinejki yas ichaj, David tlanauatik ma kitlalikaj kampa nima kimiktiskiaj kema tlateuiskia. Pampa tlauel tlajtlakolchijki, David iuaya ichampoyouaj tlauel tlaijiyouijkej (2 Sam. 12:9-12). Maske tlauel mokuapolok, Jehová kiiknelik uan kitlapojpoljuik pampa kimatiyaya David kinekiyaya kichiuas tlen kuali (1 Rey. 9:4). Tlaj nojkia tiitstoskia ipan nopa tonali, ¿tlake tijyolmatiskia tlaj tijmajtoskia tlen David kichijki? ¿Ayokmo tijtekipanojtoskia Jehová?

8. 1) ¿Tlake kichijki Pedro? 2) ¿Kenke Jehová nojua kitekimakak Pedro maske mokuapolok?

⁸ Biblia nojkia kiijtoua tlake kipanok Pedro. Maske Jesús kitlapejpenijtoya kej  iapóstol, kemantika kichijki o kiijtok tlen amo kinamikiyaya. Se tonali kiiljuik Jesús amo kema kitlauelkauaskia maske sekinok kitlauelkauaskiaj (Mar. 14:27-31, 50). ¿Tlake panok kema Jesús kiitskijkej? Nochi iapóstoles kitlauelkajkej, uan Pedro nojkia kiampa kichijki. Uan expa kiijtok amo kiixmatiyaya Jesús (Mar. 14:53, 54, 66-72). Pampa kiampa kichijki, Pedro tlauel moyolkokok, yeka Jehová kitlapojpoljuik uan nojua kitekimakak. Tlaj ta tieliskia se tlen Jesús itokilijka ipan nopa tonali uan tijmajtoskia tlen Pedro kichijki, ¿nojua timotemachijtoskia ipan Jehová?

9. ¿Kenke timotemachiaj Jehová nochipa kichiuas tlen xitlauak?

⁹ ¿Tlake techmachtia tlen kinpanok nopa toTeotsij itekipanojkauaj? Techmachtia sekij nojkia tlauel mokuapolojtokej uan tlauel kinyolkokojtokej sekinok. Tlaj se toikni nojkia mokuapoloskia, ¿tlake tijchiuaskiaj? ¿Ayokmo tiaskiaj tlanechikoli uan tijtlauelkauaskiaj Jehová uan itlanechikol? ¿O tikilnamikiskiaj kenijkatsa Jehová tlauel teiknelia uan yeka kichixtok nopa toikni ma moyolkuepa? Kemantika se akajya amo moyolkuepa maske tlauel tlajtlakolchijtok. Tlaj kiampa panoskia, ¿timotemachiskiaj Jehová kimati tlen nopa toikni kichiua uan kimati kema kinamiki kitlalnamiktis? Maske tijmatij ya uelis kichiuas ma kikixtikaj ipan tlanechikoli, ¿timotemachiaj Jehová nochipa kichiuas tlen kinamiki uan tlen xitlauak?

10. ¿Tlake kimatiyaya Jesús maske Judas Iscariote uan Pedro mokuapolojkej?

¹⁰ Biblia kiijtoua miakej toTeotsij itekipanojkauaj amo kema kitlauelkajkej Jehová yon itlanechikol maske sekinok tlauel mokuapolojkej. Jesús nojkia amo kema kitlauelkajki toTeotsij. Kema kintlapejpeniskia iapóstoles, seyoual momaijtok pampa kinekiyaya Jehová ma kipaleui kuali ma kintlapejpeni. Teipa, Judas Iscariote, se tlen katli kitlapejpenijtoya kitlauelkajki uan kitemaktilik ika ikualankaitakauaj. Nojkia, Pedro kiijtok amo kiixmatiyaya (Luc. 6:12-16; 22:2-6, 31, 32). Maske Pedro uan Judas Iscariote kiampa kichijkej, Jesús kimatiyaya Jehová uan sekinok itokilijkauaj amo tleno kichijtoyaj, yeka amo kitlauelkajki toTeotsij uan nojua kitekipanok. Pampa Jesús nochipa kitekipanok Jehová, ya kiyolkuik uan teipa kichijki ma eli tlanauatijketl ne iluikak (Mat. 28:7, 18-20).

11. ¿Kenijkatsa itstokej Jehová itekipanojkauaj ipan ni tonali?

¹¹ Tlen Jesús kichijki techmachtia amo kema ma tijtlauelkauakaj Jehová yon itlanechikol, pampa ya tlauel techpaleuijtok. Tikitstokej kenijkatsa Jehová techyakana ipan ni itlamia tonali. Nojkia techpaleuia ma titlajtolmoyauakaj ipan nochi Tlaltipaktli, maske san tojuantij tijchiuaj. Uan tlauel kuali timouikaj ininuaya toikniuaj uan tiyolpaktokej pampa  nelia tlauel kuali techmachtia. Uejkajkia Jehová kiijtok nochi itekipanojkauaj itstoskiaj ika miak “pakilistli”, uan nama tikitaj kenijkatsa moaxitia tlen kiijtok (Is. 65:14).

12. ¿Tlake tijchiuasej kema toikniuaj mokuapolosej?

¹² Tlauel tiyolpakij pampa Jehová techyakana uan techpaleuia kuali ma timonejnemiltikaj. Katli amo kitekipanouaj Jehová amo kipiaj pakilistli uan amo kichiaj kiselisej se kuali tlamantli teipa. Yeka, kema ipan tlanechikoli sekinok mokuapolosej, amo kinamiki tijtlauelkauasej Jehová yon itlanechikol, moneki timoiljuisej kenijkatsa kinamiki tikinitasej kema mokuapolosej uan tlake kinamiki tijchiuasej. Ma tikitakaj kenijkatsa uelis tijnextisej tijkauaj Jehová ma techyakana uan amo kema tijtlauelkauaj.

13, 14. 1) ¿Kenke moneki tijpiasej toyolo ininuaya sekinok? 2) ¿Tlake moneki tikilnamikisej?

¹³ ¿Tlake tijchiuasej tlaj se toikni kiijtos o kichiuas se tlamantli tlen techyolkokos? Biblia kiijtoua: “Amo xikualani nimantsi, pampa ya nopa tlen kichiuaj uiuitlakamej” (Ecl. 7:9). Nochi titlajtlakolejkej uan nochi timokuapolouaj, yeka moneki tijpiasej ueyi toyolo ininuaya toikniuaj kema kiijtosej o kichiuasej se tlamantli tlen amo kinamiki. Nojkia kema toikniuaj mokuapolosej, amo kinamiki san ya nopa timoiljuijtosej, pampa ueliskia kichiuas ayokmo ma tijtekipanokaj Jehová ika pakilistli. Nojkia ayokmo kuali titlaneltokaskiaj ipan Jehová uan ueliskia tijkauasej itlanechikol. Kiampa ayokmo tijtekipanoskiaj Jehová uan ayokmo ueliskia tiitstosej ipan Xochimili.

¹⁴ Uajka, ¿tlake techpaleuis nojua tijtekipanosej Jehová ika pakilistli maske sekinok techyolkokosej? Techpaleuis tlaj tikilnamikij tlen Jehová kiijtok: “Xikitakaj, na nijchijchiuas se yankuik iluikaktli uan se yankuik Tlaltipaktli. Elisej tlauel pano yejyektsitsij hasta axaka moiljuis tlen nopa iluikaktli uan Tlaltipaktli tlen eltoya” (Is. 65:17; 2 Ped. 3:13). Jehová techmakas nochi ni tlateochiualistli tlaj amo kema tijtlauelkauasej.

15. ¿Tlake kiijtok Jesús moneki tijchiuasej kema sekinok techyolkokosej?

¹⁵ Maske ayamo tiitstokej ipan Xochimili, tlaj se toikni techyolkokos moneki tikilnamikisej tlake kineki Jehová ma tijchiuakaj. Jesús kiijtok: “Pampa intla inkintlapojpoljuisej tlakamej tlen inmechixpanotokej, uajka inmoTata tlen itstok nepa iluikak inmechtlapojpoljuis inmotlaixpanoljuaj nojkia. Pero intla axinkintlapojpoljuiaj tlakamej tlen inmechixpanoj, uajka inmoTata axinmechtlapojpoljuis inmotlaixpanoljuaj”. Uan kema Pedro kitlajtlanik Jesús tlaj moneki titetlapojpoljuisej “hasta chikome uelta”, Jesús kinankilik: “Moneki tijtlapojpoljuijtinemis hasta chikompa setenta ueltas”. Jesús tlamachtik  moneki nochipa tijnekisej titetlapojpoljuisej (Mat. 6:14, 15; 18:21, 22).

16. ¿Kenijkatsa techpaleuia tlen José kichijki?

¹⁶ Tlen José kichijki kinextia tlake moneki tijchiuasej kema techyolkokosej. Raquel, katli eliyaya Jacob isiua, kinpixki san omej ikoneuaj. Yeka José san kipixtoya se iikni. Maske Jacob nojkia kinpixtoya sekinok matlaktli ikoneuaj, ya tlauel kiikneliyaya José. Yeka itepotsikniuaj tlauel kikualankaitakej uan kinamakakej kej se tlatekipanojketl. Uan katli pejki kintekipanoua kiuikakej Egipto. Kema panok miak xiuitl, tlanauatijketl tlen Egipto kimakak José se tekitl tlen tlauel ipati. Nopa tlanauatijketl tlauel kipatiitayaya José pampa kichijtoya miak tlamantli tlen kuali. Teipa, kampa itstoyaj José itepotsikniuaj tlanki tlen kikuaskiaj, yeka yajkej Egipto pampa kinekiyayaj kikouatij tlakualistli. Maske kema inijuantij asitoj amo kiixmatkej José, ya kena kinixmatki. José amo momakuepki maske itepotsikniuaj tlauel kikualankaitakej. Ya san kinyejyekok pampa kinekiyaya kiitas tlaj moyolpatlatoyaj. Kema kiitak kena moyolpatlatoyaj, kiniljuik eliyaya ininikni. Uan teipa tlauel kinyolchikajki kema kiniljuik: “Amo ximajmauikaj. Niinmechmakas inmojuantij uan inmokoneuaj tlen inkikuasej” (Gén. 50:21).

17. ¿Tlake tijchiuas kema sekinok mokuapolosej?

¹⁷ Ma tikilnamikikaj nochi timokuapolouaj uan yeka tojuantij nojkia tikinyolkokouaj sekinok. Yeka, tlaj tijyolkokojtokej se akajya, moneki tijchiuasej tlen Biblia kiijtoua. Ma tikiljuikaj ma techtlapojpoljui uan sampa kuali ma timouikakaj iuaya (xijpoua Mateo 5:23, 24). Tojuantij tlauel kuali tijyolmatij kema sekinok techtlapojpoljuiaj, yeka nojkia kinamiki tikintlapojpoljuisej sekinok. Colosenses 3:13 techiljuia: “Xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj. Intla se kiteljuia seyok ika se tlenijki, ma kitlapojpoljui”. Tlaj nelia tikinikneliaj toikniuaj, uajka ayokmo tikualantosej pampa techchiuilijkej se tlenijki, moneki tikilkauasej (1 Cor. 13:5). Tlaj titetlapojpoljuiaj, Jehová nojkia techtlapojpoljuis. Yeka, ma tikintlasojtlakaj sekinok kej Jehová techtlasojtla (xijpoua Salmo 103:12-14).