1, 2. 1) ¿Kenke amo timosentlachiliaj kema techpano se tlaouijkayotl? 2) ¿Tlake tikitasej ipan ni tlamachtili?

 KATLI tijtekipanouaj Jehová amo tlauel timosentlachiliaj kema tikixnamikij tlaouijkayotl. Tijmatij Biblia kiijtoua “moneki tipanotiasej miak trabajojyotl nika, uan teipa tikalakisej kampa toTeko tlanauatia” (Hech. 14:22). Nojkia tijmatij se keski tlaouijkayotl tlen tikixnamikij tlamis kema moyankuilis Tlaltipaktli, nopaya “ayok kema aki mikis, niyon mokuesos, niyon chokas” (Apoc. 21:4).

² Maske Jehová amo kitsakuilia tlaouijkayotl, kena techpaleuia ma tikijiyouikaj. Ma tikitakaj tlen apóstol Pablo kiniljuik Cristo itokilijkauaj katli itstoyaj Roma. Kema tlanki kiijtoua sejse tlaouijkayotl tlen kiixnamikiyayaj toikniuaj uan ya, kiijtok: “Yonke tipanoj tlaouijkayotl, yajaya techiknelia” (Rom. 8:35-37). Ni kiijtosneki Jehová ueli kichiuas kuali ma tiitstokaj maske tikixnamikisej se tlaouijkayotl. Ma tikitakaj kenijkatsa Jehová kipaleuik José nochipa kuali ma itsto uan kenijkatsa uelis techpaleuis ipan ni tonali.

3. ¿Kenijkatsa nima mopatlak José inemilis?

³ Jacob kinextiyaya tlauel kiikneliyaya ikone José (Gén. 37:3, 4). Yeka iikniuaj katli achtoui euayayaj, pejkej tlauel kikualankaitaj. Uan kema kinitakej se keskij tlanamakanij tlen Madián, nima kinamakakej José. Nopa tlanamakanij kiuikakej Egipto, se altepetl tlen tlauel uejka  mokauayaya. Uan nopaya sampa kinamakakej ika Potifar, katli kinyakanayaya tlamokuitlauianij tlen ichaj faraón. Nima mopatlak inemilis José; nama san tlatekipanoskia ipan Egipto uan ayokmo tlauel kiikneliskiaj kej kiikneliyaya itata (Gén. 39:1).

4. ¿Tlake tlaouijkayotl uelis tikixnamikisej sanse kej José?

⁴ Biblia kiijtoua “tlen ueli tlamantli axkuali ueli kipantis aki ueli tlakatl kema axkichia” (Ecl. 9:11). Kemantika, nojkia tikixnamikij tlaouijkayotl sanse kej kinpano nochi maseualmej (1 Cor. 10:13). Uelis techpinajtiaj, amo techkauaj ma tijueyichiuakaj Jehová o techtlatsakuiltiaj pampa tijtokiliaj Jesús (2 Tim. 3:12). Maske kiampa techpano, Jehová uelis kichiuas kuali ma tiitstokaj. Ma tikitakaj kenijkatsa kipaleuik José.

5. ¿Tlake kiitak Potifar? (Génesis 39:2-6).

⁵ (Xijpoua Génesis 39:2-6). Potifar kiitak José kipaktiyaya tekitis uan kuali kichiuayaya iteki. Uan kiitak kuali kichiuayaya iteki pampa “TOTEKO itstoya iuaya José uan kiteochiuayaya uan nochi tlen kichijki kiski kuali”. b Yeka, teipa Potifar kitekimakak uan kikajki ma kiyakana miak tekitl ipan ichaj. Tlen kichijki José, kipaleuik nopa tlakatl nojua tlauel ma tlapijpia.

6. ¿Tlake kiyolmatiyaya José?

⁶ Ma timoiljuikaj kenijkatsa kiyolmatiyaya José. ¿Tlake kinekiyaya kichiuas? ¿Kinekiyaya kuali ma kiita Potifar uan kiampa ueliskia kiselis se keski tlamantli? Uelis ya ayokmo kinekiyaya elis se tlatekipanojketl uan kinekiyaya tlakuepilis ichaj. Maske uelis tlauel tlapijpiayaya ipan Egipto, nojua eliyaya san se tlatekipanojketl uan iteko kinueyichiuayaya sekinok teotsitsij. Jehová amo kichijki Potifar ma kimalakani José. Uan teipa nojua kipanoskia sekinok tlaouijkayotl.

7. ¿Kenke uelis tikijtosej teipa José kipanok tlen nojua tlauel amo kuali? (Génesis 39:14, 15).

⁷ Ipan Génesis capítulo 39 kiijtoua  isiua Potifar pejki tlauel kiixtoka José, yeka miakpa kinejki kichiualtis ma moteka iuaya. Uan José amo kichijki tlen kinekiyaya nopa siuatl, yeka ya tlauel kualanki uan kiijtok José kinekiyaya kipinaualtis (xijpoua Génesis 39:14, 15). Kema Potifar kimatki nopa tlamantli, tlanauatik ma kitsakuakaj José miak xiuitl (Gén. 39:19, 20). ¿Kenijkatsa eliyaya kampa kitsajkej? Nopa tlajtoli tlen José kitekiuik, ika hebreo kiijtosneki “tlakoyoktli”. Nopaya amo kalakiyaya tlauili uan eliyaya tlatemajmatijka (Gén. 40:15). Biblia nojkia kiijtoua José kimetsilpijkej se keski tonali uan kitlalilijkej ikechtla se cadena (Sal. 105:17, 18). Kipanok tlen tlauel amo kuali pampa nama tsaktoskia uan ayokmo motemachiskiaj ipan ya kej achtouia.

8. ¿Ipan tlake uelis timotemachisej maske tikixnamikisej miak tlaouijkayotl?

⁸ ¿Tikixnamiktokej se tlaouijkayotl tlen teipa kichijki nojua tlauel ma titlaijiyouikaj maske ya timomaijtojtoyaj? Uelis kena kiampa techpanotok. Jehová amo techkixtilia tlaouijkayotl tlen techpano pampa Satanás kiyakana Tlaltipaktli (1 Juan 5:19). Maske Jehová amo kitsakuilia sejse tlaouijkayotl, ya kiita tlen techpano uan kitekipachoua (Mat. 10:29-31; 1 Ped. 5:6, 7). Ya techiljuia: “Axkema niinmechkajteuas, nochipa niitstos inmouaya” (Heb. 13:5). Ika Jehová itlapaleuil uelis tikixnamikisej tlen ueli tlaouijkayotl. José uelki kiijiyouik tlen kipanok pampa Jehová kiyolchikajki.

9. ¿Tlake tlamantli kinextia Jehová kipaleuik José maske tsaktoya miak xiuitl? (Génesis 39:21-23).

⁹ (Xijpoua Génesis 39:21-23). Maske José tsaktoya uan kiixnamikiyaya miak tlaouijkayotl, Jehová kipaleuik. ¿Tlake kichijki José? Pejki kuali monejnemiltia kej kichijki ipan ichaj Potifar. Yeka katli tlayakanayaya ipan nopa tlatsaktli, pejki kuali kiita uan kikajki ma kinyakana sekinok katli tsaktoyaj nopaya. Biblia kiijtoua “nopa tlayakanketl axmonekiyaya mokuatotonis ika tleno tlen eltoya imako José”. Nopa tekitl kipaleuik José ma moiljui kenijkatsa kinpaleuis sekinok. Uelis timosentlachiliaj ika tlen kipanok pampa kitekimakakej maske kiijtojkej kinekiyaya kipinaualtis isiua Potifar. Ni panok pampa kej kiijtoua Génesis 39:23, “toTeko itstoya iuaya uan kichiuayaya para nochi ma kisa kuali”.

10. Xikijto kenke José kiyolmatiyaya amo kuali kisayaya tlen kinekiyaya kichiuas.

¹⁰ Sampa ma timoiljuikaj tlen kiyolmatiyaya José: ¿Moiljuiyaya nochipa kuali itstoskia maske kitsaktoyaj pampa kiistlakauijkej? ¿Tlake kinekiyaya José? ¿Kinekiyaya kuali ma kiita katli tlamokuitlauiyaya ipan tlatsaktli? Uelis kinekiyaya ma kitlapojpoljuikaj uan ma kikixtikaj kampa tsaktoya. Yeka, kema kimatki kikixtiskiaj se tlakatl, kiiljuik kema yaskia kiitati faraón ma kiiljui ya kuali monejnemiltiyaya uan ma kikixti (Gén. 40:14). Nopa tlakatl amo kiampa kichijki, yeka José nojua tsaktoya se ome xiuitl (Gén. 40:23; 41:1, 14). Maske tsaktoya, ya nojua kuali itstoya. ¿Kenijkatsa kipaleuik Jehová?

11. ¿Kenijkatsa Jehová kipaleuik José, uan kenijkatsa tlapaleuik ma mochiua tlen Jehová mosentlalijtok?

¹¹ Kema José nojua tsaktoya, Jehová kichijki nopa tlanauatijketl tlen Egipto ma kitemiki ome tlamantli. Nopa tlanauatijkej kinekiyaya kimatis tlake kiijtosnekiyaya nopa temiktli. Yeka kema kimatki  José ueliskia kiixtomas, tlanauatik ma kinotsatij. Jehová kipaleuik ma kiixtoma tlake kiijtosnekiyaya uan nojkia ma kiiljui nopa tlanauatijketl tlake monekiyaya kichiuas. Ika tlen kiijtok, kichijki ma mosentlachili faraón. Yeka, kema nopa tlanauatijketl kiitak José kipiayaya itlapaleuil Jehová, kikajki ma kiseli uan ma kiajokui nochi tlakualistli tlen asiyaya Egipto (Gén. 41:38, 41-44). Teipa, panok se ueyi mayantli ipan Egipto uan ipan Canaán, kampa itstoyaj José ichampoyouaj. Nopa tekitl tlen kipiayaya José tlauel kipaleuik pampa nojkia ueliskia kinmakas tlakualistli ichampoyouaj, katli teipa eliskiaj iuejkapantatauaj Mesías.

12. ¿Kenijkatsa Jehová kipaleuik José kuali ma itsto?

¹² Ma timoiljuikaj ipan nochi tlamantli tlen kipanok José. ¿Ajkia kichijki Potifar ma kitekimaka maske eliyaya san se tlatekipanojketl? ¿Ajkia kichijki ma tlayakana kampa tsaktoya? ¿Ajkia kichijki ma tlatemiki faraón uan kenke José uelki kiixtoma? ¿Ajkia kichijki ma kitekimakakaj José ipan Egipto uan ma kiajokui tlakualistli? (Gén. 45:5). Tijmatij Jehová kipaleuik ipan sejse tekitl tlen kipixki. Maske iikniuaj kinekiyayaj kimiktisej, Jehová kichijki ika nopa tlamantli ma moaxiti tlen mosentlalijtoya.

13. ¿Techpaleuia Jehová ipan sejse tlaouijkayotl tlen tikixnamikij?

¹³ Tlen kipanok José techmachtia se tlamantli tlen tlauel ipati. ¿Nochipa techpaleuia Jehová kema tikixnamikij tlaouijkayotl? ¿Nochipa techyakana ipan tlaouijkayotl pampa kineki ma techpano tlen kuali? Biblia amo tlamachtia nopa tlamantli (Ecl. 8:9; 9:11). Maske Jehová amo kiampa kichiua, timotemachiaj ya nochipa kiita tlen techpano uan techtlakakilia kema timomaijtouaj (Sal. 34:15; 55:22; Is. 59:1). Nojkia techpaleuia ma tikijiyouikaj sejse tlamantli tlen techpano. ¿Kenijkatsa kichiua?

14. ¿Kenijkatsa Jehová techpaleuia kema tikixnamikij tlaouijkayotl?

¹⁴ Jehová nochipa techpaleuia uan techyolchikaua kema kinamiki (2 Cor. 1:3, 4). Eziz, se toikni katli eua Turkmenistán  kiampa kiitak kema kiiljuijkej kitsakuaskiaj ome xiuitl pampa kitekipanouayaya Jehová. Ya kiijtoua: “Ipan nopa ijnalok kema nechtlajtolsenkauayayaj, se toikni nechnextilik Isaías 30:15, kampa kiijtoua: ‘Intla inmotemachisej ipan na uan axinmolinisej, inkipiasej chikaualistli’. Nopa texto nechpaleuik amo tlauel ma nimotekipacho uan ma nimotemachi ipan Jehová. Kema nimoiljuiyaya ipan nopa texto, nechpaleuiyaya kuali ma nijyolmati kema nitsaktoya”. ¿Tikilnamiki ipan tlake tlaouijkayotl Jehová mitsyolchikajki uan mitspaleuik xikijiyoui?

15, 16. ¿Tlake techmachtia tlen kipanok Tori?

¹⁵ Kema tikixnamiktokej se tlaouijkayotl amo tikitaj kenijkatsa Jehová techpaleuia, tikitaj kema ya panok nopa tlaouijkayotl. Tosiuaikni Tori kiitak nelnelia kiampa pano. Ikone Mason mijki ika cáncer uan kiijiyouik nopa kokolistli chikuasej xiuitl. Tlen kipanok Tori, kichijki tlauel ma moyolkoko. Ya kiijtoua: “Kema se tenaj kipano ni tlamantli nelnelia tlauel moyolkokoua”. Nojkia kiijtoua: “Uelis tetajmej nojkia kiyolmatij kej na, tlauel techyolkokoua kema tokoneuaj tlaijiyouiaj, uan amo kema tojuantij techpano se tlenijki”.

¹⁶ Maske ipan nopa tonali Tori tlauel tlaijiyouik, teipa pejki moiljuia ipan nochi nopa tlamantli tlen ika Jehová kipaleuijtoya. Ya kiijtoua: “Nikitak kenijkatsa Jehová nechpaleuik ika tlaiknelili kema nokone mokokouayaya. Nikilnamiki maske Mason amo kuali momachiliyaya, toikniuaj ualayayaj hospital maske ininchaj mokauayaya se ome hora iuejkaka. Toikniuaj nochipa yauiyayaj hospital pampa kinekiyayaj techpaleuisej. Uan  nojkia techpaleuijkej ika tomij. Maske tikixnamijkej uejueyi tlaouijkayotl, nochipa tijpixkej tlen ika timopanoltisej”. Jehová kinyolchikajki Tori uan Mason uan kiampa uelkej kiijiyouiaj tlen kinpanok (xikita recuadro “ Jehová nochipa techmakak tlen techpolouayaya”).

17, 18. ¿Tlake techpaleuis tikitasej kenijkatsa Jehová techteochijtok kema tikixnamikij se tlaouijkayotl? (Salmo 40:5).

¹⁷ (Xijpoua Salmo 40:5). Kema se akajya kichijchiua se kali, kineki kitlamiltis uan nopaya itstos. Kema kichijchijtia nopa kali o sejse tlamantli tlen kiuika, uelis moketsas uan moiljuis tlake tlamantli ya kichijtok. Sanse kej nopa kalchijketl, uelis timoyoliljuisej kenijkatsa Jehová techpaleuijtok kema tikixnamijkej se tlaouijkayotl. Ika tiotlak ma timotlajtlanikaj: “¿Kenijkatsa Jehová nechteochijki nama? Maske nojua nikixnamiktok nopa tlaouijkayotl, ¿kenijkatsa nechpaleuijtok Jehová ma nikijiyoui?”. Mojmostla ma tijchiuakaj kampeka tikitasej maske san se tlamantli tlen ika Jehová techteochijtok.

¹⁸ Amo kenijki tlaj tijtlajtlaniaj Jehová ma kitlamilti nopa tlaouijkayotl tlen tikixnamikij (Filip. 4:6). Maske amo kenijki tlaj kiampa timoiljuiaj, moneki tikitasej kenijkatsa Jehová techteochijtok ipan ni tonali. Jehová kiijtojtok techyolchikauas uan techpaleuis tikijiyouisej tlaouijkayotl. Yeka ma tijtlaskamatilikaj nochi tlen ya kichiua. Tlaj kiampa tijchiuaj, tikitasej kenijkatsa Jehová techpaleuijtok sanse kej José maske tikixnamikij tlaouijkayotl (Gén. 41:51, 52).