Diana, katli tikijtojkej ipan nopa achtoui tlamachtili, kiijtoua pejki tlai pampa tlauel motekipachouayaya. Maske Biblia kiijtoua amo kenijki tlaj tikisej se kentsi, kena kiijtoua ni: “Amo ximosansejkotili ininuaya tlen kiijij miak xokomekaatl” (Proverbios 23:20). Katli tlauel tlaij, teipa kipiaj se kokolistli, ayokmo kuali mouikaj ininuaya ininsiua o ininueue, mokauaj uan miakej nima mikij. Tlaj kichiuaskiaj tlen Biblia tetlajtolmaka, amo kinpanoskia nochi nopa kuesoli.

Diana kichijki tlen Biblia tetlajtolmaka. Ya kiijtoua: “Maske tlauel nitlaiyaya, nikitak nopa amo nechpaleuiyaya ayokmo ma nimotekipacho. Pejki nijchiua tlen tetlajtolmaka Filipenses 4:6, 7: ‘Ayok ximotekipachokaj ika niyon se tlamantli. [...] Xijtlajtlanikaj ma inmechmaka nochi tlen moneki’. Sejse youali, kema nimoiljuiyaya ipan miak tlamantli, nikiljuiyaya Jehová kenijkatsa nijyolmatiyaya, tlen nechkualankamakayaya, tlen nechyolkokouayaya uan tlen nechtekipachouayaya, uan nikiljuiyaya ma nechpaleui nikitaskia kej kinamiki nopa kuesoli. Ualmostla nijchiuayaya kampeka amo nimoiljuijtos ipan nopa tlamantli. Tlamaijtoli nechpaleuik ma nimoiljui ipan tlen nijpixtoya uan amo ipan tlen amo nijpixtoya. Nimosentlalik ayokmo nitlais, pampa pejki nijpatiita nopa tlaseuilistli tlen nama nijpixtoya uan amo nijnekiyaya sampa nijyolmatis kej achtouia”.

Se keski kuesoli, kej kema momekatiaj, kichiua tlauel ma tlaijiyouikaj maseualmej. Tlen Biblia tetlajtolmaka uelis techpaleuis amo ma techpano nopa, pampa kiijtoua tlake amo kinamiki tijchiuasej, kej kema se akajya kiajasi seyok o kema kiita pornografía. Se telpokatlakatl katli itoka Samuel, kiijtoua: “Amo ouij tikajasisej se akajya... Maske kemantika na amo nikixtoka se akajya, tlaj nikita ya kena nechixtoka, nopa nechpaktia uan peua nikajasi”. Pampa sekinok kiijtouayayaj Samuel tlauel kinajasiyaya siuamej, maske kemantika amo kiampa kichiuayaya, pejki moiljuia kena ueliskia kichiuas nopa. Kema tlauel kinajasik siuamej, pejki kiyolkokoua itlalnamikilis. Nama kiijtoua: “Tlauel amo kuali tijchiuasej nopa, pampa kichiua ma timosentlalikaj san ipan tlen tojuantij tijnekij o techpaktia”.

Samuel kipojki se tlamachtili tlen kintlajtolmaka telpokamej ipan jw.org. Nojkia moiljuik ipan Proverbios 20:11, kampa kiijtoua: “Intla kuali kichijtinemi se tlakatl, yonke yajaya se konetl, nochi kiixmatij para itstok xitlauak. Nochi kiitaj intla monejnemiltia keja moneki uan intla tlapajpaktik iyolo iixpa toTeko”. ¿Kenijkatsa kipaleuik ni texto? Samuel kiitak amo kuali kema se akajya kiajasi seyok uan amo “tlapajpaktik” iixpa toTeotsij. Ya kiijtoua: “Nijkuamachilik kema se tlakatl kiampa kichiua, kema mosiuajtis nojua kichijtos nopa. Uan nimoiljuik kenijkatsa kiyolmatiskia katli eliskia nosiua tlaj nechitaskia nikajasi seyok siuatl. Nikitak tlauel amo kuali tikajasisej seyok”. Samuel kipatlak inemilis uan nopa kipaleuik amo ma momekati.

Antonio kipixtoya seyok kuesoli tlen tlauel amo kuali: tlauel kipaktiyaya kiitas pornografía. Maske kiikneliyaya isiua, nochipa kiitayaya pornografía. Ya kiijtoua tlauel kipaleuik 1 Pedro 5:8, kampa kiijtoua: “Nochipa xiinmotlalnamiktikaj uan xitlachixtokaj, pampa Axkualtlakatl, yajaya inmokualankaitaka, nemi kampa ueli keja se tekuani tlen kitemojtinemi ajkeya uelis kitsontlamiltis”. Antonio kiijtoua: “Kampa ueli nesi pornografía, uan tlaj tikitasej uelis amo kema tikilkauasej. Nopa versículo nechpaleuik ma nimoiljui ajkia kichiua ma onka nopa amo kuali tlamantli. Yeka kema nikitaskia se tlaixkopinkayotl, monekiyaya nima nikilnamikis nopa. Nama nijmati san Jehová uelis nechpaleuis ma nitlalnamiki uan ma nijmokuitlaui noyolo, notlalnamikilis uan kuali ma niitsto iuaya nosiua”. Antonio kipaleuijkej uan ayokmo kiitak pornografía. Nopa kipaleuik amo ma kipia sekinok uejueyi kuesoli.

Kej tikitakej, tlen Biblia tetlajtolmaka tlauel techpaleuia amo ma tijpiakaj uejueyi kuesoli. ¿Uan tlaj moueyilia tokuesoljuaj uan amo tijmatij kenijkatsa tijsenkauasej? Sampa ma tikitakaj kenijkatsa Biblia uelis techpaleuis kema panos nopa.