TLEN KINPANOTOK TOIKNIUAJ
Tijpantijkej nopa “perla tlen tlauel miak ipati”
WINSTON uan Pamela (Pam) Payne tlatekipanouaj ipan kali Betel tlen Australasia. Maske tlauel yolpaktokej ipan ininnemilis, nojkia kiixnamiktokej miak kuesoli pampa mijki ininkone uan monejki momatisej kichiuasej sekinok tlamantli. Maske kinpanotok nochi nopa tlamantli, inijuantij tlauel kiikneliaj Jehová uan toikniuaj, uan nojkia tlajtolmoyauaj ika miak pakilistli. Ma tikitakaj tlake kiijtojkej kema kintlajtlanijkej se keski tlamantli.
Winston, xitechiljui kenijkatsa pejki tikixmati toTeotsij.
Nimoskaltik ipan Queensland (Australia) nochampoyouaj amo kipixtoyaj ininreligión. Tiitstoyaj ipan se granja kampa amo itstoyaj miakej maseualmej, yeka san niitstoya ininuaya nochampoyouaj uan san se keski maseualmej nikinixmatiyaya. Kema nijpixtoya 12 xiuitl, nijnejki nikixmatis toTeotsij. Nimomaijtok uan nikiljuik ma nechpaleui nijmatis tlen melauak tlen ya. Teipa, nikistej nochaj uan nijpantik se tekitl ipan Adelaida (Australia Meridional). Kema nijpixtoya 21 xiuitl, kema niajki nijpaxaloua Sydney, nikixmatki Pam. Ya nechiljuik tlen nopa israelismo británico, se religión tlen kiijtoua pilaltepetsitsij tlen Gran Bretaña elij iixuiuaj Israel. Inijuantij moiljuiaj, elij nopa matlaktli pilaltepetsitsij tlen itstoyaj ika norte uan tlen kistejkej tlen ininaltepe ipan siglo 8, a.u.J. Kema nitlakuepilik Adelaida, nikiljuik se tlakatl katli iuaya nitekitiyaya tlen nechiljuijkej, ya pejtoya momachtia ika Biblia ininuaya Jehová itlajtoltemakauaj. Maske amo uejkajki nikamanalti iuaya tlen Jehová itlajtoltemakauaj kineltokaj, nikitak toTeotsij kinankilik nopa tlamaijtoli tlen nijchijki kema nieliyaya niokichpil. Nijyekok tlen melauak tlen toTeotsij uan tlen iTlanauatijkayo. ¡Nijpantik nopa “perla tlen tlauel miak ipati”! (Mat. 13:45, 46).
Pam, ta nojkia pejki tijtemoua “nopa perla tlen tlauel miak ipati” kema tieliyaya tipilichpokatsij. ¿Kenijkatsa tijpantik?
Kema nimoskaltik, nochampoyouaj kipixtoyaj ininreligión, tiitstoyaj ipan altepetl Coffs Harbour (Nueva Gales del Sur). Notatauaj uan noueyitatauaj kineltokayayaj tlen tlamachtiyayaj ipan israelismo britanico. Noikni katli teipaejketl, nosiuaikni katli achtouiejketl, miakej nomachikniuaj uan na techmachtijkej toTeotsij san kinpatiita britanicos. Maske techmachtijtoyaj nopa, amo kuali nijneltokayaya uan nijmatiyaya amo niitstoya inechka toTeotsij. Yeka, kema nijpixtoya 14 xiuitl niajki kampa mosentiliyayaj sekinok religiones, kej ipan iglesias anglicanas, bautistas uan adventistas del séptimo día. Maske kiampa nijchijki, inijuantij amo nechpaleuijkej ma nikixmati toTeotsij.
Teipa, nochampoyouaj mochantitoj Sydney, kampa nikixmatki Winston kema yajtoya paxaloua nopaya. Kej Winston kiijtok, pampa timokamanaljuijkej tlen religión, pejki momachtia Biblia ininuaya Jehová itlajtoltemakauaj. Teipa ipan nopa amatlajkuiloli tlen nechtitlaniliyaya, kiijkuilouayaya miak textos. Kema pejki kichiua nopa, nimotekipachok uan nikualanki. Teipa, ika yolik nikitstiajki tlen kimachtiyayaj eliyaya tlen melauak.
Ipan 1962, niajki Adelaida pampa nijnekiyaya niitstos nechka kampa itstoya Winston. Ya kiniljuik se toikni uan isiua ma niitsto ininchaj. Eliyayaj Thomas uan Janice Sloman, katli eliyayaj misioneros ipan Papúa Nueva Guinea. San nijpixtoya 18 xiuitl uan inijuantij kinextijkej tlauel nechikneliyayaj uan nechpaleuijkej nojua ma nijnechkaui Jehová. Yeka, nojkia pejki nimomachtia Biblia uan nimantsi nikitak nijpantijtoya tlen melauak. Kema timosenkajkej, Winston uan na pejkej sansejko tijtekipanouaj Jehová ika miak pakilistli. Maske tikixnamiktokej miak tlaouijkayotl, nochi tlen techpanok kichijtok nojua tlauel ma tijpatiitakaj “nopa perla” tlen tijpantijkej.
Winston, uelis titechiljuis tlake mitspanok kema pejki tijtekipanoua Jehová.
1. Se mapa kampa nesi altepetinij tlen tijpaxalojkej.
2. Tlaixkopinkayomej tlen kiixnextia nopa islas. Achtouia Kiribati uan Tuvalu kiixmatiyayaj kej islas Gilbert y Ellice.
3. Nopa yejyektsi isla Funafuti, tlen mokaua ipan Tuvalu. Elki se tlen nopa islas kampa tiajkej kema ayamo kintitlaniyayaj misioneros.
Kema ya timosenkajtoyaj, Jehová techmakak “se ueyi tekitl” kiampa ueliskia nojua kuali tijtekipanosej (1 Cor. 16:9). Nopa “ueyi tekitl” techmakak toikni Jack Porter, katli kipaxalouayaya totlanechikol. Ipan ni tonali, toikni Jack uan na titlatekipanouaj sansejko ipan comité tlen kali Betel tlen Australasia. Kema techpaxalouayayaj, toikni Jack uan isiua Roslyn, techiljuijkej ma titlatekipanokaj kej precursores regulares, tlauel tiyolpajkej makuili xiuitl kiampa titlatekipanosej. Na nijpixtoya 29 xiuitl kema techtlanejkej ma titlatekipanokaj kej katli tepaxaloua chijchikuasej metstli, tijpaxalojkej islas tlen Pacífico sur, ipan nopa tonali kali Betel tlen Fiyi kiyakanayaya tekitl tlen mochiuayaya ipan Pacífico sur. Tijpaxalojkej islas tlen Kiribati, Nauru, Niue, Samoa, Samoa Norteamericana, Tokelau, Tonga, Tuvalu uan Vanuatu.
Ipan nopa tonali, maseualmej katli itstoyaj ipan islas tlen tlauel uejka mokauayaya amo motemachiyayaj ipan Jehová itlajtoltemakauaj, yeka monekiyaya tijpiasej tlalnamikilistli uan kuali timoiljuisej tlake tijchiuasej (Mat. 10:16). Nopa tlanechikoli amo uejueyi eliyaya, yeka kanajya amo onkayaya kampa timokauaskiaj. Yeka tikiniljuiyayaj maseualmej tlen nopa pilaltepetsitsij tlaj ueliskia timokauasej ininchaj. Nochipa kipixkej kuali ininyolo touaya.
Winston, ta tlauel mitspaktia tlen mochiua kema motlajtolkuepa amatlajkuiloli. ¿Kenke pejki mitspaktia?
Kampa kinmachtiaj ueuejtlakamej ipan Samoa.
Ipan nopa tonali, toikniuaj tlen Tonga san kipixtoyaj se keski pilamatsitsij uan pilamochtsitsij ipan tongano, se tlajtoli polinesio. Kema tlamachtiyayaj ika Biblia kitekiuiyayaj nopa amochtli La verdad que lleva a vida eterna ipan tlajtoli Inglés. Yeka, kema naui semanas kinmachtijkej ueuejtlakamej, eyij tlen nopa ueuejtlakamej katli kimatiyayaj Ingles kitlajtolkuepkej nopa amochtli ipan tlajtoli tongano. Pam kiijkuilok ika maquina tlen kitlajtolkuepkej uan teipa tijtitlankej ipan kali Betel tlen Estados Unidos pampa nopaya kisaskia nopa amochtli. Ipan se chikueyi semanas tlanki nopa tekitl. Maske amo tlauel kuali kej kitlajtolkuepkej, kinpaleuik miakej maseualmej katli kamanalti tongano ma kimatikaj tlen melauak. Maske Pam uan na amo titlajtolkuepaj, tlen panok kichijki ma techpakti nopa tekitl.
Pam, ¿kenijkatsa amo sanse eliyaya initstosej ipan Australia uan ipan nopa islas?
Kampa timokauayayaj kema titlatekipanouayayaj kej katli tepaxaloua chijchikuasej metstli.
Tlauel mopatlak kej tiitstoyaj pampa ipan sekij pilaltepetsitsij tlen nopa islas itstoyaj miakej sayolimej, kimichimej, tlauel tlatotoniayaya, onkayaya kokolistli uan kemantika amo tijpixtoyaj miak tlakualistli. Ika tiotlak, kema tiitstoyaj ipan fale, se kali katli kichijchijtokej ika sakatl uan amo kipia tlapepecholi, techpaktiyaya tijtlachilisej ueyi atl. Ika tlayoua, tijtlachiliyayaj iekauil nopa palmeras uan iekauil nopa metstli tlen nesiyaya ipan ueyi atl. Kema ya nopa tijchiuayayaj, techpaktiyaya timoyoliljuisej uan timomaijtosej, kiampa san timoiljuiyayaj ipan tlamantli tlen techyolchikauayaya uan amo tlen techtekipachouayaya.
Tikinikneliyayaj konemej. Techtlauetskiltiyayaj uan pampa amo tieliyayaj sanse kej inijuantij, san techtlachiliyayaj. Kema tiitstoyaj ipan isla Niue, se okichpil pejki kiitskia imatsoyo Winston uan kiiljuik: “Nechpaktia moijuiyo”. Nopa okichpil amo kema kiitstoya kenijkatsa se maseuali kipixtoya tlauel miak imatsoyo, uan yeka moiljuiyaya eliyaya ijuitl.
Techyolkokouayaya kema tikitayayaj maseualmej tlauel teikneltsitsij eliyayaj. Maske eli tlauel tlayejyektsi, amo eltoya kampa mopajtisej uan amo onkayaya miak atl. Maske kiampa itstoyaj, toikniuaj amo motekipachouayayaj pampa ya momajtoyaj kiampa itstosej. Yolpakiyayaj pampa itstoyaj ininuaya ininchampoyouaj, eltoya se kali kampa monechikosej uan pampa kiitayayaj se tlateochiualistli kiueyichiuasej Jehová. Tlen tikitakej techpaleuik ma timosentlalikaj ipan tlamantli tlen tlauel ipati uan amo ma titlapijpiakaj.
Pam, kemantika monekiyaya tiatlakuis uan timomatis tijchiuas tlakualistli ika sekinok tlamantli. ¿Kenijkatsa tijchiuayaya?
Pam tlachikuenia kema tiajkej ipan Tonga.
Nitlaskamatilia notata pampa nechmachtik miak tlamantli tlen tlauel nechpaleuik. Nechmachtik kenijkatsa nitlipitsas, nitlakualchiuas nopaya uan kenijkatsa niitstos maske amo nijpias miak tlamantli. Kema tiajkej Kiribati, timokajkej ipan se kali tlen kichijchijtoya ika sakatl, ipan tlalchi kitlalijtoyaj corales uan tlapepecholi kichijtoyaj ika ojtlatl. Kema nijnekiyaya nitlakualchiuas, nitlakoyoni tlalchi uan nitlipitski ika cocos ikakauayo. Uan kema niauiyaya niatlakui, nimotekpanki kampa itstoyaj siuamej tlen nopaya euaj. Kikixtiyayaj atl ika se kuauitl tlen nechka ome metro iueueyaka uan iteno kitlaliliyayaj se lazo, eliyaya sanse tlen ika se akajya tlajtlama. Iteno amo kipixtoya se anzuelo, san kiilpiliyayaj se lata. Teipa, sejse tlen nopa siuamej kichomoniyayaj nopa lata pampa kinekiyayaj ma temi ika atl. Nesiyaya amo ouij uan kema na monejki nijchiuas nopa, amo niueliyaya. Maske miakpa nikachomoniyaya, amo ueliyaya nijkixtia atl, san motikuiniyaya. Nochi pejkej nechuetskiliaj, teipa se tlen nopa siuamej nechmachtik kenijkatsa nijchiuas. Maseualmej katli itstoyaj ipan nopa islas nochipa techpaleuiyayaj uan kuali technojnotsayayaj.
Tijmatij tlauel inmechpaktik intlatekipanosej ipan nopa islas. Xitechiljuikaj tlake tlamantli tlen inmechpanok tlauel inmechpakti.
Winston: Amo nimantsi tijkuamachilijkej tlen nopaya momajtoyaj kichiuaj. Toikniuaj techmakayayaj nochi tlen kipixtoyaj kema techtlamakayayaj. Achtoui, tijkuayayaj nochi tlen techmakayayaj pampa amo tijmatiyayaj monekiyaya tijkauasej tlen inijuantij kikuaskiaj. Uan kema tijmatkej tlen momajtoyaj kichiuaj, pejkej tijkauaj tlen inijuantij kikuaskiaj. Maske timokuapolouayayaj, toikniuaj kichiuayayaj kampeka kikuamachilisej kenke tijchiuayayaj se keski tlamantli. Kema panoyaya chikuasej metstli, tikinpaxalouayayaj uan inijuantij tlauel yolpakiyayaj kema techitayayaj. Ipan nopa tonali toikniuaj amo kinixmatiyayaj sekinok toikniuaj, san tojuantij techixmatiyayaj.
Se keskij toikniuaj tlen isla Niue yauij tlajtolmoyauatij.
Kema tikinpaxalouayayaj toikniuaj, maseualmej tlen nopa islas kuali techitayayaj. Miakej maseualmej moiljuiyayaj toikniuaj ininselti kipeualtijtoyaj ininreligión. Yeka, kema kiitayayaj se toikni uan isiua kinpaxalouayayaj maske amo nopaya euayayaj, mosentlachiliyayaj uan kikuamachiliyayaj Jehová itlajtoltemakauaj itstokej ipan nochi Tlaltipaktli.
Pam: Tlauel nechpaktia nikilnamikis tlen panok ipan Kiribati, kampa eltoya se tlanechikoli tlauel pilsiltsi. Toikni Itinikai Matera san ya eliyaya ueuejtlakatl uan kichiuayaya kampeka kuali ma tiitstokaj. Se tonali, ipan se chikiuitl kiuikayaya se teksistli uan techiljuik: “Nimechualikilia ni”. Ipan nopa tonali eliyaya tlauel patiyo nopa tlamantli. Tlen kichijki nopa toikni asik ipan toyolo.
Pam, kema panok se keski xiuitl, tijpiaskia se konetl uan mijki kema ayamo tlakatiyaya. ¿Tlake mitspaleuik amo tlauel ximotekipacho?
Ipan xiuitl 1973, kema tiitstoyaj ipan Pacífico sur, nitlanemiltik. Yeka, titlakuepilijkej Australia uan kema panok naui metstli, nopilkone mijki. Tlen nechpanok nojkia tlauel kiyolkokok Winston. Maske yolik ayokmo tlauel nimotekipacho, ouij nijmatiyaya nikilkauas, uan tlauel nechpaleuik kema tijpojkej nopa tlamachtili tlen kiski ipan La Atalaya, abril 15, 2009, ipan “Preguntas de los lectores” nopaya kiijtouayaya: “Si una criatura muere en el vientre materno, ¿volverá a la vida en la resurrección?”. Nopa tlamachtili kiijtouayaya Jehová kimati tlake kichiuas uan nochipa kichiua tlen xitlauak. Ya kikualtlalis nochi tlamantli tlen techtlaijiyouiltia pampa kitekimakatok iKone “para kixoleuas iteki Axkualtlakatl” (1 Juan 3:8). Nojkia techpaleuik nojua tlauel ma tijpatiitakaj tlamachtili tlen melauak, uan pampa tijmatij tlen toTeotsij iTlanauatijkayo kichiuas techpaleuijtok ma tiyolpakikaj.
Kema panok nochi nopa tlamantli, sampa pejki senkistok titlatekipanouaj. Se keski metstli titlatekipanojkej ipan Betel tlen Australia uan teipa sampa pejkej titlatekipanouaj kej katli tepaxaloua chijchikuasej metstli. Ipan 1981, kema ya titlatekipanojtoyaj naui xiuitl ipan pilaltepetsitsij tlen Nueva Gales del Sur uan ipan Sydney, techtlanejkej ma titlatekipanokaj ipan kali Betel tlen Australia, kej kitokaxtiyayaj uejkajkia, uan nama nojua nopaya titlatekipanouaj.
Winston, tlen mitspanok kema tijtlatekipanok ipan islas del Pacífico sur, ¿tikita mitspaleuijtok ipan nopa tekitl tlen nama tijchiuaj kema tijtlayakana ipan kali Betel tlen Australasia?
Kena, tlauel nechpaleuijtok. Achtouia, Australia kiyakanayaya tlen mochiuayaya ipan altepetl Samoa uan Samoa Norteamericana. Teipa, kali Betel tlen Nueva Zelanda mosansejkotilik ika kali Betel tlen Australia. Nama kali Betel tlen Australasia kiyakana Australia, islas Cook, Niue, Nueva Zelanda, Samoa, Samoa Norteamericana, Timor Oriental, Tokelau uan Tonga. Ueltok nijpaxaloua nochi ni altepetinij pampa kali Betel nechtitlantok ma nia nopaya. Pampa nitlatekipanok ininuaya toikniuaj tlen nopa islas, nechpaleuijtok nojua kuali ma nitekiti ininuaya maske nama niitstok ipan Betel.
Winston uan Pam ipan kali Betel tlen Australasia
San nijneki nikijtos tlen Pam uan na techpanok techpaleuijtok ma tikitakaj amo san katli ya uejueyij kinekij kiixmatisej Jehová, telpokamej nojkia kinekij kipantisej “nopa perla tlen tlauel miak ipati”, maske ininuikaljuaj amo kinekij (2 Rey. 5:2, 3; 2 Crón. 34:1-3). Jehová tlauel techiknelia uan kineki nochi ma timomakixtikaj maske sekij elij telpokamej o ya uejueyij.
Kema Pam uan na pejkej tikixmatij toTeotsij kipano 50 xiuitl, amo timoiljuijkej nochi tlamantli tlen techpanoskia kema tijpantiskiaj “nopa perla tlen tlauel miak ipati”. Kej ya tikitakej, nopa tlamachtili tlen melauak tlen toTeotsij iTlanauatijkayo eli tlauel ipati, yeka nochipa tijnekij tijmokuitlauisej.
