Ximosentlali ayokmo titlachichinas

“Tlauel kinpaleuijtok katli ayokmo kinekij tlachichinasej kema mosentlaliaj ayokmo kiampa kichiuasej” (Stop Smoking Now! [¡Ayokmo xitlachichina!]).

UAJKA, tlaj ayokmo tijneki titlachichinas, moneki timoiljuis ipan se tlamantli tlen mitspaleuis ayokmo kiampa tijchiuas. Tlauel mitspaleuis tlaj timoiljuis kenijkatsa kuali tiitstos kema ayokmo titlachichinas.

Ayokmo tijsosolos motomij. Tlaj mojmostla tijchichina se caja cigarros, tijpolos miak tomij sejse xiuitl. “Amo nikitstoya tlauel miak tomij nijtekiuiyaya kema nijkouayaya cigarros” (Gyanu, eua Nepal).

Tlauel tiyolpakis ipan monemilis. “Ueliskia nikijtos nonemilis pejki kema nijkajki nitlachichina, uan nama nojua tlauel kuali niitstok” (Regina, eua Sudáfrica). Kema se akajya ayokmo tlachichina, peua kuali tlaijnekui uan kiajuiakmati tlakualistli. Nojkia kipia miak chikaualistli uan kuali nesi.

Ayokmo tlauel timokokos. “Maske amo sanse ininxiui, tlauel kinpaleuia tlakamej uan siuamej kema ayokmo tlachichinaj pampa ayokmo tlauel mokokouaj” (Centros para el Control y la ­Prevención de Enfermedades, de Estados Unidos).

Mitspaleuis kuali xijyolmati. “Ayokmo nitlachichinki pampa ayokmo nijnekiyaya kejuak ma nechnauati iyatl, nama nijnekiyaya noselti nimoyakanas” ­(Henning, eua Dinamarca).

Tlauel kuali itstosej mochampoyouaj uan mouampoyouaj. “Tlaj titlachichinas [...] nojkia kintlanauis sekinok maseualmej katli itstokej monechka. [...] Ixtlamatinij kiitstokej sejse xiuitl tlauel miakej maseualmej mikij ika cáncer ipan ininpulmón uan ika sekinok kokolistli ipan ininyolo pampa kiijnekuij tlen sekinok kichichinaj” (Sociedad Americana contra el Cáncer).

Tijyolpakiltis toTeotsij. “Noikniuaj tlen niinmechiknelia, [...] ma timoiyokatlalikaj tlen nochi tlamantli tlen kiijtlakos totlakayo” (2 Corintios 7:⁠1). “Ximoiljuikaj inmotlakayo eltok keja se tlakajkaualistli [...] tlen tlatsejtseloltik, pampa keja nopa kipaktia toTeko” (Romanos 12:⁠1).

“Kema nikitak toTeotsij amo kineki ma tijchiuakaj tlen kitlanauis totlakayo, ayokmo nitlachichinki” (Sylvia, eua España).

Miakpa amo san moneki ayokmo tijnekis titlachichinas. Nojkia moneki ma mitspaleuikaj sekinok maseualmej, kej mochampoyouaj uan mouampoyouaj. ¿Tlake uelis kichiuasej inijuantij?