Ku tuala ha vinambi ni nguetu kutsisa tue ku kava viya longesa Mbimbiliya. Ca ku muenako Mbimbiliya nguayo:

•   Ka ca puile vupi kulila nga tu na tsisa muntu u tua lema. Vandongesi va Yesu navo va lilile na kukala mu vusiua mu va tsisile. (Yoano 11:33-35, 38; Vilinga 8:2; 9:39.) Ngeci mukemuo, nga tu na tsisa ka tue ku mona kupua ntsimbu ya vueho ni cilika. (Ekelesiaste 3:1, 4; 7:1-4.) Vunoni tue ku mona kupua vukovelelo vua ku muesa ngozi na ku lilembezieka.—Loma 12:15.

•   Vatsi ka va tantekeya na vimo viahi. Vutuhu tua tunda ku visemua na miyati ya kuli seza-seza, vunoni nga tu na tsisa, ka tue ku kava visemua na vilinga ka via litombuele na Mbimbiliya. Ngeci mua vize via muesa nguavio vatsi ve ku tualelelaho ku yoya kaha va hasa ku tu kuasa ni ku tu vulumuna. (Ekelesiaste 9:5, 6, 10) Ca ku muenako, vimo vilinga viaco via pua: ku singimika vatsi, ku kombeleya vatsi, ku simutuila navo, ku va vundila vimo na ku linga vimo vizila ku va ntuluue. Tue ku viana vilinga viose evi muomu tue kuononoka lisiko lia mu Mbimbiliya lia handeka ngualio: “Tundenu hakati kavo, . . . ‘likelenu kukuata ku viuma via kuzuala.”—2 Kolintu 6:17.

•   Vantu vatsa va ka sanguka. Mbimbiliya ya longesa nguayo, ku kala cisangukilo kaha i ka heta imo ntsimbu omo kutsa ka ci kakalako naua. (Vilinga 24:15; Ku-Solola 21:4) Ku kala nolu lulavelelo, ce ku tu kuasa linga kati tu hianesemo ku linienga, ni ku linga viuma ka via litombuele na Mbimbiliya ha miala. Lulavelelo luaco lua kuasele Vakua Kilistu va ku livanga.—1 Tesalonika 4:13.

•   Mbimbiliya ya tu mamuna ku linga viuma mu ku puisamo. (Visimo 11:2) Ntsimbu ya kutsisa, ka ya puile vukovelelo vua “ku tembesa” vupite ni “viuma viali navio muntu.” (1 Yoano 2:16) Ka tue ku linga viuma via ku komouesa linga tuye vantu ku mutima. Ngeci mua: ku landa kashau ka ndando ya kama ambe ku zala vuzalo vua ndando ya kama na vutumbe vua ku limuesa ku vantu.

•   Kutuala ha via kutsa, ka tue ku sindiya vakuetu va tave vi tua tsiliela. Tue ku kava eci citume ca mu Mbimbiliya: “Tuvose muntu ku muntu aka litavela kuli Njambi.” (Loma 14:12) Vunoni nga va tuihula, tue kulinga cose mu ku lumbununa vi tua tsiliela, kaha tue ku lingamo “na kulikehesa, kaha na kasingimiko ka kama.”—1 Petulu 3:15.

Vati ve kulinga Vakaleho va Yehova nga va na tsisa?

 Cihela: Vavusoko vakevo ve kuhangula kuiko ku hitila programa ya kutsinda. Ca ku muenako, i hasa ku hitila ku Ndzivo ya Vuangana, ku vutulikilo vua vatsi, ku ndzivo ya muntu ni vene ku vihilo.

 Programa: Kue ku kala cimpande ce ku lembezieka vaze va na tsisa na ku lumbununa vika Mbimbiliya ya handeka ku tuala ha kutsa na lulavelelo lua cisangukilo. (Yoano 11:25; Loma 5:12; 2 Petulu 3:13) Cimpande caco, ce ku tsindika ha vifua via cili via kele navio muntu natsi, kaha na ku handeka ha lungano lua cili lua lutsilielo luendi.—2 Samuele 1:17-27.

 Tue kuimba muaso ua ku tundisa mu Mbimbiliya. (Kolose 3:16) Programa ye kuhua na civundilo ca ku lembezieka.—Filipu 4:6, 7.

 Ku vundila milambu: Ka tue ku fuetesa na vimo viahi ku vipanga viose via mu lutsilielo vi tue ku linga, cipue vene na programa ya kutsinda. Cikuavo naua, viuano vietu via pua via vuana, ka tue ku fuetesa.—Mateu 10:8.

 Ku solokako: Ambe vene vaze ka va puile Vakaleho va Yehova va hasa ku livua ku zituka kuya ku Ndzivo ya Vuangana va ka halakane ku cimpande ca kutsinda. Viuano vietu viose via pua via vuana, cipue vene cimpande ca kutsinda, muntu uose-ouo citava ayeko.

Vuno Vakaleho va Yehova ve kuya ku via ku tsinda via mu malombelo eka ni?

 Nkala Mukaleho ua Yehova ue ku lihanguila nga ayako ni kuahi, kuliya na mutima uendi ua ku longesa ku Mbimbiliya. (1 Timoteu 1:19) Vunoni ka tue ku lihaka mu vilinga via malombelo eka, vize vi tue ku mona nguetu ka via litombuele na Mbimbiliya.—2 Kolintu 6:14-17.