Sîsenne ǂoaǃnâs ge mariǁhogu ǀguiga tsâǀkhā tama hâ. Xawe ǁgaixa tsî ra ǂâiǂhansen kai tsi. Saora gā-ai Elobmîs daoǁgaudi ge nî huidu î da nēsa tani hō ǁkhā.

•   Sadu tsâsin xa naun ǀkha ǃhoa re.

   Elobmîsa tae-e ra mî: “Hoa ǁaen ge ǀhōsana ǀnamma ra ǁgau.”—ǂKhoamîdi 17:17.

   Sîsenne du ga ǂoaǃnâ, o du ge ǁaixa, tsûaǂgao tsî ǀhomaxase a tsâ ǁkhā. Sadu tsâsin xa du ge omaris khoen tsî ǀgū ǀhōsan ǀkha a ǃhoa ǁkhā. ǁÎn ge ǂhâ du hâ ǂkhâǃnâs tsîna mādu tsî nî huidu ǃgâise tsâsa. Tsî ǀasa sîsenne hōs ǀkhas tsîna nî huidu.

•   Kaise ǂâiǂhansensa xu ǂgōsen re.

   Elobmîs ge ra mî: “Tā ǁaris xa ǂâiǂhansen, ǁaris ǁîs di ǂhansende ūhâ xuige. Nētsēs ǁîs di ǂhansende ǂâu hâse ūhâ xui-ao.”—Mateub 6:34.

   Elobmîs ge ra ǀapemāda, î da ǀnai ais ai aiǂhomisen. (ǂKhoamîdi 21:5) Xawes tsîna î ge ra ǂkhâǃnâ da, î da tā kaise hānîǁaeb xa ǂâiǂhansen. ǃNāsa ǁaeba da ge ī tite xūn xa ra ǂâiǂhansen. ǂHâǂhâsa i ge a ǀguitsēsa, ǀguiǁaeb ai ūsa.

   Elobmîs ge ǃnāsa gā-ai ǀapemāde ra mā, mati da nēsi da ūhâ ǂâiǂhansende a tani ǁkhāsa. “How to Deal With Stress” di hâ khomaiǃâsa khomai re.

•   ǂHâǂhâsa ǀkharaǀkharana ǁama du ra ǀgaub ǃnâ dī re.

   Elobmîs ge ra mî: “Tita ge . . . ǃnāǂamsase ūhâs . . , ǁâsase hâs tamas ka io ǃâs kas hoasa a ǂan.”—Filipeǁîn 4:12.

   Nēsi du ūhâ mâsiba ǀkharaǀkhara re. Nēs ge nēsi du mari-e ra sîsenū ǀgauba ǃkhōǂgā hâ, î du tā ū du hâs xa ǃnāsase sîsenū. ǂAnbasen re î du tā ǂhâbasa tama surudeb ǃnâ ǂgāsen.—ǂKhoamîdi 22:7.

   Mati du ūhâ du hâ mari-e nî sîsenūs ǃaroma, “How to Live on Less” di hâ khomaiǃâsa khomai re.

•   Sadu ǁaeba gā-aise sîsenū re.

   Elobmîs ge ra mî: “Gā-aise tanisen re . . . , î du hoaǁae ǁaeba ǂhanuse sîsenū.”—Koloseǁîn 4:5.

   Nēsisa du sîsenni ǀapeǁguipa ūhâ tama. Xawe du ge sadu ǁaeba ǃgâise a sîsenū ǁkhā. Nēti dīs ge sadu ûib ǃnâ nî huidu tsî ǃgâise nî tsâ kai du.

•   Supuse dawa re.

   Elobmîs ge ra mî: “Mâ ǃgom sîsenni hoab ǃnâs ge hōǂgāsa hâ.”—ǂKhoamîdi 14:23.

   ǂGuro sîsenni xa ǀkhara-e dīsa māsen re. ǂHâǂhâsa tamas ka io ǀorose ra mātare-e sîsenni tsîna du ge a ūǃoa ǁkhā.

•   Tā ǀûsen re.

   Elobmîs ge ra mî: “ǁGoaga sa ǃkhomma tsoro î ǃommi âtsa tā ūdawa, mâ-i nî ǂûtani ǃkhaisats a ǀū xuige.”—Aoǁnâ-aob 11:6.

   Aiǃgû re sîsenne ôas ǀkha. Nauna mîba re sîsenne du ra ôasa. Familien, ǂan du a khoen, sîsenū du gere khoen. Tsî ǁanǁare-aon ǀkha ǃhoa re. Sîsenne ra ôa ǃkhain, huiba ra ôa advertensidi tsî kompanidi hîna khoena internets ai ra ôana kē re. ǂGui ǃkhain hîna sîsenne ra māna ǃoas tsîna du nî īsa ǂâis ǃnâ ūhâ re. Tsî du ǂgui CV ga nî māǂgāsa.