Jen M̦õn̦õn̦õ in Jol̦o̦k an Doon Bõd

“Kom̦win jouj im em̦m̦an bũruomi ñan doon; kom̦win jol̦o̦k an doon bõd ãinwõt Anij ear jol̦o̦k ami bõd ilo Kũraij.”​—EPESÕS 4:​32, UBS.

JOUJ IM UWAAK:

Etke jej aikuj m̦õn̦õn̦õ in jeorl̦o̦k bõd?

Ta bwebwenato eo Jijej ear kwal̦o̦ke ñan kaalikkar bwe jej aikuj jeorl̦o̦k bõd?

Ta jeraam̦m̦an ko jenaaj iiooni ñe jej m̦õn̦õn̦õ in jeorl̦o̦k bõd?

1, 2. Etke eaorõk bwe jen jel̦ã jol̦o̦k bõd an ro jet?

 BAIBÕL̦ eo ej jipañ kõj ñan mel̦el̦e kõn l̦õmn̦ak eo an Jeova kõn jerawiwi ak bõd ko. Ej bareinwõt kwal̦o̦k kõn ta ko Jeova ej kõm̦m̦ani ñe jej jerawiwi ak bõd. Ejjab men kein wõt, ak Baibõl̦ eo ej bar ba bwe Jeova em̦õn̦õn̦õ in jol̦o̦k bõd. Ilo katak eo l̦o̦k juon, jaar katak kõn un ko unin an kar Jeova m̦õn̦õn̦õ in jeorl̦o̦k bõd ko an Devid im Menassa. Erro ar lukkuun ajl̦o̦k im bũrom̦õj kõn men ko renana rar kõm̦m̦ani. Erro ar kwal̦o̦k rueerro ñan Jeova im rar kate erro bwe ren jab bar kõm̦m̦an bõd. Em̦ool aerro kar ukel̦o̦k. Eñin unin Jeova ear m̦õn̦õn̦õ in jeorl̦o̦k aerro bõd im bar kajeraam̦m̦an erro.

² Jen kiiõ lale el̦aññe jej m̦õn̦õn̦õ in jeorl̦o̦k bõd ko an ro jet. Ñan waanjoñak, el̦aññe juon iaan ro ilo baam̦le eo am̦ ear mej kõn wõt men ko renana me Menassa ear kõm̦m̦ane, enaaj kar ewi am̦ eñjake? Kwõnaaj ke kar m̦õn̦õn̦õ in jeorl̦o̦k an Menassa bõd? Eaorõk bwe jen etale kajjitõk kein kõnke ilo lal̦ in rainin elõñ armej ro relukkuun nana, relãj im rej l̦õmn̦ak wõt kõn er make. Innem, etke jej aikuj jel̦ã jol̦o̦k bõd? Ak bõlen jen ba bwe juon armej ear kõmetak eok. Ta ko kwõmaroñ kõm̦m̦ani ñan jol̦o̦k am̦ illu? Ta ko renaaj jipañ eok ñan kõm̦m̦ani wõt men ko Jeova ekõn̦aan bwe kwõn kõm̦m̦ani? Im ta ko kwõmaroñ kõm̦m̦ani bwe kwõn m̦õn̦õn̦õ in jol̦o̦k an armej in bõd?

UNIN JEJ AIKUJ JOL̦O̦K BÕD KO AN RO JET

3-5. (1) Ta bwebwenato eo Jijej ear kwal̦o̦ke ñan katakin kõj bwe jej aikuj jol̦o̦k bõd ko an ro jet? (2) Ta eo jej katak jãn naan ko an Jijej ilo bok in Matu 18:​21-35?

³ Ñe juon armej ej kaillu kõj, ej juon menin aikuj bwe jen m̦õn̦õn̦õ in jol̦o̦k an bõd. Jekdo̦o̦n ñe armej eo ej juon iaan Ri Kõnnaan ro an Jeova ak jaab, jej aikuj jol̦o̦k an bõd. Etke? Kõnke ñe jej m̦õn̦õn̦õ in jol̦o̦k an doon bõd enaaj wõr aenõm̦m̦an ikõtaad im ro ilo baam̦le eo ad, ro m̦õttad, ro jet kab Jeova. Baibõl̦ ej ba bwe jej aikuj jol̦o̦k bõd ko an ro jet meñe elõñ alen aer kaillu kõj. Jijej ear kwal̦o̦k juon bwebwenato kõn  juon ri karejar im juon irooj. Ri karejar in el̦ap an m̦uri ippãn irooj eo an. Bwebwenato in ej jipañ kõj ñan kile unin ad aikuj m̦õn̦õn̦õ in jol̦o̦k bõd ko an ro jet.

⁴ Bwe ri karejar in en kõpel̦l̦o̦k m̦uri eo an ippãn irooj eo, enaaj kar aikuj jerbal ium̦win 60 milien raan bwe en uñ aolepen on̦ean m̦uri eo an. Bõtab, irooj eo ear jol̦o̦k an ri karejar in bõd im ear ba bwe ejjab aikuj kõl̦l̦ãik m̦uri eo an. Ak ta eo ri karejar in ear kõm̦m̦ane ke ear wõr juon eo im ear m̦uri ippãn? L̦ein me ear m̦uri ippãn ri karejar in, ear aikuji wõt 100 raan ñan jerbal bwe en maroñ kõpel̦l̦o̦k m̦uri eo an. Meñe ãindein ak ri karejar in ear m̦akoko in jol̦o̦k an l̦ein bõd im ear ba bwe ej aikuj kõl̦l̦ã ilo iien eo wõt. L̦ein ear akwel̦ap im eoware bwe en lel̦o̦k iien ñan an maroñ jerbal bwe en kõl̦l̦ãik m̦uri eo an. Jekdo̦o̦n ak ri karejar in ear kõm̦m̦an bwe ren kalbuuji. Ke irooj eo ear roñ ta eo ear wal̦o̦k, ekanooj illu. Ear jiroñ ri karejar in bwe ej aikuj kar kwal̦o̦k tũriam̦o ñan eo juon. Kõn men in, irooj eo ear kalbuuji ri karejar in m̦ae iien ear kõl̦l̦ãiki aolepen jããn ko ear m̦uri ippãn.​​—Matu 18:​21-​34.

⁵ Ta eo Jijej ekõn̦aan bwe jen katak jãn bwebwenato in? Eokwe, ear ba bwe Jeova eban jol̦o̦k ad bõd el̦aññe jejjab m̦õn̦õn̦õ in jol̦o̦k an ro jet bõd jãn bũruod. (Matu 18:​35) Kõj aolep ri jerawiwi im ekkã ad kõm̦m̦an bõd. Ewõr iien jenaaj likjab in pokake Jeova. Meñe ãindein ak em̦õn̦õn̦õ in jol̦o̦k ad bõd. Joñan an lukkuun jeorl̦o̦k ad bõd, ej ãinwõt ñe ejjel̦o̦k bõd en̦ jaar kõm̦m̦ane. Kõn men in, el̦aññe jekõn̦aan bwe jen juon iaan ro jeran Jeova, jej aikuj jol̦o̦k an ro jet bõd. Jijej ear kaalikkar men in ilo Katak eo an ioon Tol̦ eo. Ear ba: “El̦aññe kom̦ij jeorl̦o̦k bõd ko an armej, bareinwõt Jememwõj i lañ E naaj jeorl̦o̦k bõd ko ami. A el̦aññe kom̦ jab jeorl̦o̦k bõd ko an armej, bareinwõt Jememwõj e jamin jeorl̦o̦k bõd ko ami.”​—Matu 6:​14, 15.

6. Etke epen jet iien ñan jol̦o̦k an ro jet bõd?

⁶ Bõlen kwõj errã im ba, ‘Aet, jej aikuj jol̦o̦k an doon bõd.’ Emaroñ pidodo ba men in ak jet iien epen ñan ad kõm̦m̦ane. Etke? Kõnke ñe jej metak im inepata, emaroñ l̦ap ad illu ak bũrom̦õj. Ñan waanjoñak, ñe juon armej ej kõm̦m̦ane juon men im ejjab em̦m̦an ippãd, jemaroñ lukkuun illu ak inepata bwe ear jab m̦ool ñan kõj. Kõn men in, jemaroñ kõn̦aan bwe ren kajim̦weik armej in ak bõlen jekõn̦aan ukot nana kõn nana. Joñan ad  inepata, jemaroñ ba, ‘Ilukkuun ban jol̦o̦k an armej en̦ bõd.’ Ãindein ke am̦ bar eñjake? El̦aññe aet, eokwe ta ko kwõmaroñ kõm̦m̦ani bwe kwõn m̦õn̦õn̦õ in jol̦o̦k an ro jet bõd ãinwõt an Jeova kajjitõk ippãd ñan kõm̦m̦ane?

KATE EOK ÑAN MEL̦EL̦E TAUNIN AM̦ ILLU AK INEPATA

7, 8. El̦aññe juon armej ej kainepataik eok, ta eo emaroñ jipañ eok bwe kwõn m̦õn̦õn̦õ in jol̦o̦k an bõd?

⁷ Jemaroñ lukkuun inepata im illu ñe juon armej ej kõm̦m̦ane juon men im ejjab em̦m̦an ippãd ak ñe jej l̦õmn̦ak bwe enana an kõm̦m̦an ñan kõj. Juon likao ear kwal̦o̦k kõn ta eo ear wal̦o̦k juon iien ke ear lukkuun illu. Ej ba: ‘Iar etal jãn m̦weo im iar ba bwe ijamin bar ro̦o̦l. Ilo ial̦ eo ij etal ie elukkuun em̦m̦an im aiboojoj. Ejjel̦o̦k keroro im elukkuun aiboojoj jikin eo. Jidik kõn jidik ejjino med bũruõ. Tokãlik, iar ajl̦o̦k kõn aõ kar lukkuun illu im iar bar ro̦o̦l ñan m̦weo im̦õ.’ El̦aññe kwõj l̦oore joñak in an likao in ilo am̦ kõml̦an bwe en jakol̦o̦k am̦ illu, men in enaaj jipañ eok ñan kajim̦we am̦ mel̦el̦e kõn apañ eo. Kõn men in, kwõban kõm̦m̦ane juon men me kwõnaaj ajl̦o̦k kake tokãlik.​​—Sam 4:4; Jabõn Kõnnaan 14:​29, UBS; Jemes 1:​19, 20.

⁸ Ak ta el̦aññe kwõj illu wõt meñe kwaar bõk iien bwe en jakol̦o̦k am̦ illu? Eokwe, kate eok ñan mel̦el̦e kõn taunin am̦ inepata. Kwõj ke inepata kõnke ejjab jim̦we an armej eo kõm̦m̦an ñan kwe? Ak kwõj ke inepata bwe armej eo ear jab kwal̦o̦k jouj ñan eok? Kwõj ke l̦õmn̦ak bwe armej eo ear kõn̦aan wõt kõmetak eok? M̦ool ke bwe men eo ear kõm̦m̦ane ear lukkuun nana? Kwõn kate eok ñan mel̦el̦e kõn taunin am̦ inepata. El̦aññe kwõj kõm̦m̦ane men in, kwõnaaj maroñ jel̦ã ta naan in kakapilõk ko ilo Baibõl̦ me remaroñ jipañ eok ñan jol̦o̦k am̦ illu ak inepata. Innem, men in enaaj jipañ eok ñan kõm̦m̦ane men eo ejim̦we ippãn Jeova me ekõn̦aan bwe kwõn kõm̦m̦ane. (Riit Jabõn Kõnnaan 15:​28, UBS; 17:​27, UBS.) El̦aññe kwõj etale eñjake ko am̦ ijello̦kun am̦ l̦õmn̦ak wõt kõn am̦ illu, enaaj pidodol̦o̦k am̦ jeorl̦o̦k bõd. Meñe men in emaroñ pen, ak Baibõl̦ eo emaroñ jipañ eok ñan mel̦el̦e kõn men ko kwõj l̦õmn̦aki me rej kõm̦m̦an am̦ illu im inepata. Emaroñ bar jipañ eok ñan kajjioñe Jeova im m̦õn̦õn̦õ in jeorl̦o̦k bõd.​​—Hibru 4:⁠12.

KWÕJ AIKUJ KE ILLU?

9, 10. (1) Ta eo emaroñ wal̦o̦k ñe juon ej kainepataik kõj? (2) Enaaj ta eñjake eo ad el̦aññe jejjab m̦õkaj in illu im jej kõn̦aan jeorl̦o̦k bõd?

⁹ Elõñ men ko remaroñ kõm̦m̦an bwe juon armej en illu. Ñan waanjoñak, ñe kwõj kattõr wa im bar juon wa ebaj wõt jidik dibõje wa eo waam̦, ta eo kwõnaaj kõm̦m̦ane? Jet armej ñe rej iioone men in relukkuun illu, joñan rej kajjioñ in ukot nana kõn nana. Bõtab kõnke jej Kũrjin, jen jab ãindein.

¹⁰ Ñe jej illu, em̦m̦anl̦o̦k bwe jen l̦õmn̦ak m̦okta jãn ad kõm̦m̦ane juon men me jenaaj ajl̦o̦k kake tokãlik. Bõlen unin an wa eo baj wõt jidik kar dibõje wa eo waam̦, emaroñ bwe kwaar m̦ad im jab lukkuun lale m̦aan. Ak emaroñ bwe ewõr jidik jorrããn ilo wa eo juon. Bwe en dikl̦o̦k ad illu im inepata, ewõr jet men ko jej aikuj kõm̦m̦ani. Ta kein? Ej bwe jen kate kõj ñan mel̦el̦e ta eo bwe en wal̦o̦k jorrããn eo. Bareinwõt, jen keememej bwe jemaroñ jab jel̦ã aolep men ko kõn unin an wal̦o̦k apañ eo im jen m̦õn̦õn̦õ in jeorl̦o̦k bõd. En jab m̦õkaj ad illu. Ekklisiastis 7:9 ej ba: “Kwõn jab m̦õkaj in illu ilo bũruom̦, bwe illu ej pãd wõt ilo bũruon ro ri bwebwe.” Ñe juon ej kaillu eok, kajjioñ in jab watõke. Elõñ alen jemaroñ l̦õmn̦ak bwe armej ro rej kaillu kõj kõnke rekõn̦aan. Bõtab ilo m̦ool, rar baj jirilo̦k im kõm̦m̦an bõd kõnke rejjab weeppãn. Bõlen jejjab jel̦ã im mel̦el̦e kõn ta eo ear wal̦o̦k. Kõn men in, ñe juon armej ej ba ak kõm̦m̦ane juon men me ej kaillu kõj, jen keememej bwe jejjab jel̦ã kõn aolep men. Jen kwal̦o̦k yokwe ñan armej eo im jeorl̦o̦k an bõd. El̦aññe jenaaj kõm̦m̦ane men in, enaaj l̦apl̦o̦k ad m̦õn̦õn̦õ.​​—Riit 1 Piter 4:⁠8.

‘AENÕM̦M̦AN ENAAJ BAR JEPL̦AAK ÑAN EOK’

11. Jej aikuj et jekdo̦o̦n ta eo armej ro rej kõm̦m̦ane ñan kõj ilo kwal̦o̦k naan?

¹¹ Jet iien ñe jej kwal̦o̦k naan, armej ro rejjab jouj ñan kõj. Ta eo jemaroñ kõm̦m̦ane bwe jen  jab illu ippãer? Eokwe, ke Jijej ear jilkinl̦o̦k 70 ri kwal̦o̦k ro, ear jiroñ er bwe ren kwal̦o̦k naan in yokyokwe ñan kajjojo baam̦le ko me rar bwebwenato ippãer im ba: “Aenõm̦m̦an ñan m̦wiin.” Jijej ear wõnm̦aanl̦o̦k im ba: “El̦aññe juon armej in aenõm̦m̦an ej pãd ijo, ami naan in kaenõm̦m̦an enaaj pãd ippãn; el̦aññe ejjel̦o̦k, enaaj bar jepl̦aak ñan kom̦.” (Luk 10:​1, 5, 6, UBS) Jelukkuun m̦õn̦õn̦õ ñe armej ro rekõn̦aan roñjake nuuj eo em̦m̦an me jej kwal̦o̦k kake kõnke jejel̦ã bwe renaaj bõk tokjãn. Bõtab, jet iien armej ro rejjab jouj ñan kõj. Ñe ej ãindein, ta eo jen kõm̦m̦ane? Jijej ear ba bwe jen aenõm̦m̦an wõt. Jekdo̦o̦n ta eo ro jet rej kõm̦m̦ane ñan kõj, ak ñe jej etal jãn m̦weo im̦weer jen aenõm̦m̦an wõt. Bõtab el̦aññe jej illu ippãer, enaaj jako ad aenõm̦m̦an.

12. Ta eo Paul ej rõjañ kõj kake ilo Epesõs 4:​31, 32 bwe jen kõm̦m̦ane?

¹² Kwõn kate eok ñan aenõm̦m̦an aolep iien im ejjab ilo jerbal in kwal̦o̦k naan wõt. Ñe kwõj m̦õn̦õn̦õ in jeorl̦o̦k bõd, ejjab mel̦el̦ein bwe kwõj errã ilo men eo enana armej eo ear kõm̦m̦ane ak bwe kwõj kõm̦m̦an ãinwõt ñe men in ear jab kõmetak ro jet. Bõtab, ñe kwõj jeorl̦o̦k bõd ej mel̦el̦ein bwe kwõj aikuj bõjrak jãn am̦ inepata im illu ippãn armej eo. Kate eok ñan aenõm̦m̦an wõt. Jet armej rejjab bõjrak jãn aer l̦õmn̦ak kõn men ko renana me rar wal̦o̦k ñan er. Eñin unin rejjab aenõm̦m̦an. Ak en jab ãindein ippam̦. Kwõn anjo̦ jãn illu. Kwõban m̦õn̦õn̦õ el̦aññe kwõj illu wõt ippãn ro jet. Kõn men in, kwõn kate eok bwe kwõn m̦õn̦õn̦õ in jeorl̦o̦k bõd!​​—Riit Epesõs 4:​31, 32, UBS.

KÕM̦M̦ANE WÕT MEN EO ME ENAAJ KABUÑBŨRUON JEOVA

13. (1) Ñe juon enana an kõm̦m̦an ñan kwe, ewi wãween kwõj “ejouji mãlle kijeek n̦a ioon bõran”? (2) Ta eo emaroñ wal̦o̦k ñe jej jouj wõt ñan juon eo im enana an kõm̦m̦an ñan kõj?

¹³ Bõlen ewõr iien me juon eo im ejjab Ri Kõnnaan ro an Jeova ear nana an kõm̦m̦an ñan kwe. Bõtab, keememej bwe kwõmaroñ jipañ armej in bwe en oktak im m̦õn̦õn̦õ in katak kõn Baibõl̦ eo. Rijjelõk Paul ear jeje im ba: “El̦aññe eo ej kõjdate eok e kwõle, kwõn naajdik e; el̦aññe e maro, kwõn kaidaake; bwe kõn am̦ kõm̦m̦an men in kwõnaaj ejouji mãlle kijeek n̦a ioon bõran. Nana en jab anjo̦ jãn eok, a kwõn anjo̦ jãn nana kõn em̦m̦an.” (Rom 12:​20, 21) El̦aññe kwõj jouj wõt ñan armej eo me enana an kõm̦m̦an ñan kwe, bõlen enaaj oktak im jouj ñan eok. El̦aññe kwõj kajjioñ mel̦el̦e kõn unin an armej eo ãindein im kwal̦o̦k tũriam̦o ñan e, bõlen enaaj kõn̦aan katak Baibõl̦. Jekdo̦o̦n ñe armej eo enaaj oktak ak jaab, ñe kwõj jouj wõt, bõlen enaaj kõn̦aan jel̦ã etke kwõlukkuun oktak jãn armej ro jet.​​—1 Piter 2:​12; 3:​16, UBS.

14. Etke kwõj aikuj m̦õn̦õn̦õ in jeorl̦o̦k bõd meñe armej eo ear kõmetak eok?

¹⁴ Ewõr jet armej ro im jejjab aikuj kõm̦m̦ao ippãer. Ñan waanjoñak, jen jab kõm̦m̦ao ippãn ro rebukwel̦o̦k. Rein rar kõm̦m̦ani bõd ko rel̦l̦ap im rar m̦akoko in ukel̦o̦k, eñin unin kar aikuj jol̦o̦k er jãn eklejia eo. Bõlen juon ear kõm̦m̦ane juon bõd el̦ap im men eo ear kõm̦m̦ane ear kõmetak eok. Kõn men in, emaroñ lukkuun pen am̦ jol̦o̦k an armej in bõd. Jekdo̦o̦n ñe tokãlik emaroñ m̦õj an ukel̦o̦k ak bõlen ejjañin jako am̦ illu ippãn kõn men eo ear kõm̦m̦ane im ear kõmetak eok. Ñe kwõj iioon wãween in, em̦m̦an bwe kwõn wõnm̦aanl̦o̦k wõt im kajjitõk ippãn Jeova ñan jipañ eok bwe kwõn m̦õn̦õn̦õ in jol̦o̦k an armej in bõd. Eaorõk bwe kwõn kõm̦m̦ane men in kõnke kwõjjab maroñ jel̦ã l̦õmn̦ak im eñjake ko an armej eo juon ak Jeova wõt ejel̦ã. Elukkuun jel̦ã l̦õmn̦ak im eñjake ko rettino an kajjojo armej. Bareinwõt, el̦ap an kijenmej im tũriam̦o ippãn armej ro me rar kõm̦m̦an jerawiwi ak bõd. (Sam 7:9; Jabõn Kõnnaan 17:​3, UBS) Eñin unin Baibõl̦ ej ba bwe jen jab nana ñan ro jet meñe rar kõmetak kõj. Ej ba: “El̦aññe ewõr en̦ ej kõm̦m̦an nana ñan kom̦, kom̦win jab ukotl̦o̦k kõn nana. Kajjioñ kõm̦m̦ani men ko rem̦m̦an ippãn armej otemjej. Kom̦win mour ilo aenõm̦m̦an ippãn armej otemjej joñan wõt ami maroñ. Ro jera, kom̦win jab idenon̦e, kõnke Anij wõt ej idenon̦e. Bwe jeje ko rej ba, ‘Irooj ej ba, Ña wõt inaaj idenon̦e, im n̦aon̦ean.’ ” (Rom 12:​17-19, UBS) Jejjab jel̦ã aolep  men ko Jeova ejel̦ã kaki im Baibõl̦ ej ba bwe jen jab ekajete ro jet. (Matu 7:​1, 2) Jen lõke wõt bwe Jeova enaaj ekajet im enaaj jim̦we im jejjet an kõm̦m̦ane men in.

15. Ta eo enaaj kadikl̦o̦k ad illu ippãn armej eo ear kõmetak kõj?

¹⁵ El̦aññe armej eo me ear kõmetak eok em̦õj an ukel̦o̦k ak epen am̦ jol̦o̦k an bõd, em̦m̦an bwe kwõn keememej bwe ebar pen ñan e. Ejjab weeppãn ãinwõt bar kõj. (Rom 3:​23) Jeova ej tũriam̦okake aolep armej kõn aer jab weeppãn. Innem, jen jar kõn armej eo ear kõmetak kõj. Ñe jej kõm̦m̦ane men in, enaaj dikl̦o̦k ad illu ippãn armej in. Jijej ear kaalikkar bwe jej aikuj jol̦o̦k ad illu meñe enana an kar ro jet kõm̦m̦an ñan kõj. Ear ba: ‘Kom̦win yokwe ro rej kõjdate kom̦, im jar kõn ro rej kõm̦m̦ani men ko renana ñan kom̦.’​—Matu 5:​44, UBS.

16, 17. Ta eo kwõnaaj kõm̦m̦ane ñe em̦m̦aan ro rej lale eklejia eo rej pepe bwe em̦õj an armej eo ukel̦o̦k jãn bõd eo an? Etke kwõnaaj kõm̦m̦ane men in?

¹⁶ Em̦m̦aan ro rej lale eklejia eo rej etale el̦aññe eo ear kõm̦m̦an bõd ej ukel̦o̦k ak jab. Jeova ear lel̦o̦k bwe en aer eddo ñan kõm̦m̦ane men in. Rein rejjab jel̦ã aolep tipdikin men ko rar wal̦o̦k ñe juon ej kõm̦m̦an bõd ak Jeova wõt ejel̦ã. Bõtab, rej kajjioñ kõm̦m̦an pepe ekkar ñan ta eo Baibõl̦ ej ba im rej kõtl̦o̦k bwe kajoor eo an Anij en tõl er ilo aer kõm̦m̦ane men in. Innem, kõnke rein rej jar ñan Jeova bwe en jipañ er kõm̦m̦ane juon pepe, jemaroñ lõke im tõmak bwe pepe ko rej kõm̦m̦ani rejejjet im ekkar ñan l̦õmn̦ak ko an Jeova.​—Matu 18:​18, UBS.

¹⁷ Eñin iien eo me enaaj alikkar el̦aññe jej tiljek ñan Jeova. Jej aikuj kwal̦o̦k bwe jej lõke wãween an Jeova kõm̦adm̦õde apañ ko. Bareinwõt, jen l̦oori pepe ko em̦m̦aan ro rej lale eklejia eo rej kõm̦m̦ani. Kwõnaaj et el̦aññe em̦m̦aan ro rej lale eklejia eo rej pepe bwe em̦õj an armej eo ukel̦o̦k jãn bõd eo an? Kwõnaaj ke jol̦o̦k an armej in bõd im kwal̦o̦k am̦ yokwe wõt e? (2 Korint 2:​5-8, UBS) Emaroñ pen ñan kõm̦m̦ane men in, el̦aptata ñe kwaar metak kõn bõd eo ear kõm̦m̦ane ñan kwe ak ñan juon iaan ro ilo baam̦le eo am̦. Bõtab, kwõn atartar wõt ioon Jeova im lõke e kõn wãween an kõm̦adm̦õde apañ ko rej wal̦o̦k ilo eklejia eo. Ñe kwõj ãindein, innem kwõnaaj kõm̦m̦ane men eo ejim̦we. Kwõnaaj kaalikkar bwe kwõj m̦õn̦õn̦õ in jol̦o̦k an armej ro bõd.​—Jabõn Kõnnaan 3:​5, 6.

18. Ta jeraam̦m̦an ko jenaaj iiooni ñe jej m̦õn̦õn̦õ in jeorl̦o̦k bõd?

¹⁸ Elõñ jeraam̦m̦an ko jenaaj iiooni ñe jej m̦õn̦õn̦õ in jeorl̦o̦k bõd. Ta kein? Enaaj em̦m̦anl̦o̦k ad mour ñe jej jol̦o̦k ad illu im inepata. Bareinwõt, enaaj em̦m̦an kõtaan eo ad ippãn ro jet. Ak ta eo enaaj wal̦o̦k ñe jejjab m̦õn̦õn̦õ in jeorl̦o̦k bõd? Eokwe, men in enaaj kõm̦m̦an ad inepata im jemaroñ nañinmej kab eban em̦m̦an kõtaad ippãn ro jet. Bõtab, ñe jej m̦õn̦õn̦õ in jol̦o̦k bõd enaaj em̦m̦an kõtaan eo ad ippãn Jemed ilañ, Jeova. Eñin ej jeraam̦m̦an eo el̦aptata.​​—Kolosse 3:​12-14.   

[Kajitõk ko ñan katak]

[Pija ilo peij 29]

Etke Jijej ear kwal̦o̦k bwebwenato eo kõn irooj eo im ri karejar eo?

[Pija ilo peij 32]

Kũrjin ro rej aikuj m̦õn̦õn̦õ in jeorl̦o̦k bõd