Emaroñ wõr ippam̦ Baibõl̦ eo etan New World Translation of the Holy Scriptures ilo kajin Pãlle. Ilo iol̦apen kajjojo peij, ewõr juon laajrakin eoon ko. Eoon kein rej kwal̦o̦k mel̦el̦e ko rel̦l̦apl̦o̦k kõn eoon ko ilo peij eo. Tokjãn men in, jemaroñ lo bwe elukkuun bõrokuk aolepen mel̦el̦e ko ilo Baibõl̦. Ilo kajjojo eoon, kwõnaaj lo lõta jidikdik ko iturin juon naan. Ilo Baibõl̦ ko em̦õj bũriini, pukot lõta jidikdik kein me em̦õj kõllaajraki ilo iol̦apen peij eo im kwõnãj lo eoon ko jet me rej ekkejell̦o̦k ippãn doon. Ilo jw.org ak ilo app eo JW Library^®, jipede lõta jidikdik ko iturin naan ko ilo eoon eo ñan lo eoon ko jet.

Eoon kein me em̦õj kõllaajraki ilo iol̦apen peij eo, remaroñ jipañ eok ñan lo mel̦el̦e kein itulal̦ ekoba men ko jet:

Eoon ko Jet ilo Baibõl̦ me Rej Kwal̦o̦k kõn Ejja Bwebwenato eo Wõt: Kwõmaroñ riiti ejja bwebwenato eo wõt ilo bar juon bok ilo Baibõl̦. Ñan waanjoñak, lale 2 Samuel 24:1 im 1 Kronikel 21:1.

Naan ko kar Ãliji: Eoon ko rej kwal̦o̦k ia eo kar ãliji naan ko jãne. Ñan waanjoñak, lale Matu 4:4 im Duteronomi 8:3.

An Jejjet Kũtien Juon Kanaan: Ñe juon eoon ej kwal̦o̦k kõn juon kanaan, lõta jidikdik eo emaroñ jipañ eok ñan lo eoon ko jet me rej kwal̦o̦k kõn wãween an kar jejjet kũtien. Ñan waanjoñak, lale Matu 21:5 im Zekaraia 9:9.