UKATI wa apostolu Paulu, khayaarivo apaketi o waapakhirya atthu paasi. Ntthu apheelaka unkela paketi wiira arwee nipuro, ahaana waakoha atthu akiina khampa haavo paketi aananakoso (aapakherya mirintti) nopheela urwaa mpaka nipuro ntthuuyo ninrwaawe ni ahaana ukoha wakhala wiira uyo paketyuuyo ciicammo nawaacisa atthu. (Mite. 21:2, 3) Wakhala wiira paketyuuyo khaarwaa mpaka nipuro ntthuuyo nimpheelaawe urwaa, uyo pooti wankelaawe paketyuule, urwaa ukhuruwa nipuro nikiina nineemela paketi ni unkela paketi nkhwaawe oohala weemela wakhiviru waya nipuro ninrwaawe ntthuuyo.—Mite. 27:1-6.

Imaara cinci, khula mwaakha waanaakhala ukati apaketi weettaaya mpahari, ni khayantikheleliya mahuku oohala ukhuma. Makuhu makiina paketi khaakhumaka, kahi paasi nlattu wookhala ukati woohinamaana, masi nlattu wookupaliya citthu coohimiya cookhwiri. Wootakihera, anahota yamoonaka nakhuku eepaka waculu waya mikhoyi co paketi awula yoonaka mmaacini ithaapwa co paketi ookwanyuwaca, yaanaakupali wiira waakhala mwiikho. Masi yoonaka wiira ihaavo iphyoo yomaana, anahota yaanaaweetta nkwaha woohipica. Ntthu amphwanyaka paketi opheela unkela wiira arwee nipuro, uyo aanamonkomelela ni mirintti cawe wakhiviru nipuro nineemelaawe paketi, ni anaawereherera ukhuweliya wiira paketi mpheela ukhuma.

Wasitati yoo Roma yokhalayi, yahaavo mananna owaakuva umphwanya paketi oopheela unkela. Namantikha História neehaniya Lionel Casson, heera: “U Roma, apaketi yeemelaka nipuro naamalelaaya mooloko Tibre. Wakhiviru waya isitati yoo Óstia, naahaavo nipuro nuulupale caatekiye inupa cinci caananakoso. Inupa cinci caari caananakoso omapuro menci yaapakherihaka mirintti caya mpaketini. Nanakoso mmoca aari oo Narbonne [nna va uneehaniya u França], nanakoso nkiina aari oo Cartago [nna va uneehaniya u Tunísia] . . .  ni yaahaavo akhwaawe. Khula ntthu antotha paketi oopheela unkela, aalamuliya paasi urwaa mpaka nnyo inupannyo ni waakoha ale yaapakheriha mirintti coohala urwaaniya nipuro ninrwaawe ntthuuyo.”

Unkela paketi yaakhala mananna owaakuva uphiya nipuro, masi ciicammo waanawoopihaka. Apostolu Paulu ukati waavaraawe nteko weemisiyonaariyu, imaara cinci ahottittha paketi ankenlyaawe.—2 Akor. 11:25.