“Umui na hahediba taumui ai boma lao.” (Heb. 5:12) Mani a laloa! Iehova​—iunives ai Hahediba Tauna hereadaena​—na ita e noidamu Ia sivaraina na ma haida baita hadibalaidia totona! Iehova sivaraina momokanina baita hahedibalaia​—ruma bese ai, o kongrigeisin ai, o haroro ḡaukara ai​—na hahenamo hereadaena bona maduna mai metauna. To una ḡaukara baita karaia namonamo diba, a?

Haere na aposetolo Paulo ese Timoteo e tore henia herevadia lalodia ai baita duahiamu, eto: “Buka Helaḡa iduahina, haroro, hahediba, ba goadalai.” Paulo ma eto: “Unu ba kara toma, bena sibomu ba hahemauri, bona bae kamonai henimu taudia danu ba hamauridia.” (1 Tim. 4:13, 16) Oibe, taunimanima ihamauridia sivaraina ba harorolaia na namo. Una dainai, ḡau badana na emu duahiduahi bona hahediba daladia ba hanamo. Ina buklet ese baine durumu unu ba kara toma helaoreana. Buklet ena kaha haida mani aita herevalai.

Iehova mo sibona na hahediba tauna hereadaena. (Iobu 36:22) Ena be ina buklet ese baine durumu emu duahiduahi bona hahediba daladia ba hanamo totona, to ba helalotao danu, eda sivarai ihalasina tauna na Iehova bona ia ese taunimanima e veridia maimu. (Ioa. 6:44) Una dainai, lauma helaḡa iabina totona ba ḡuriḡuri loulou. Dirava ena Hereva ba ḡaukaralaia momo. Sibomu emu lalohadai basio gwaurai, to hanaihanai haida ba durudia Iehova ese ḡau ta e mamiamu bona e lalohadailaiamu dalana bae itaia totona. Kamonai taudia ba durudia mai kudoudia idoidiai ida Iehova bae lalokau henia bada totona.

Dirava ese e noimu mai anina bada sivaraina na taunimanima ba hadibalaidia totona. Ai na asia daradaramu, badina ‘Dirava ese e henimu goadana’ ai ba tabekau neganai, una ḡaukara na ba karaia namonamo diba.​—1 Pet. 4:11.

Ai na umui ida a ḡaukara heboumu,

Iehova Ena Witnes Edia Gavanin Bodi