“A ro nee ro xørgø nu Biblia, pe ri unkø nguenrra ke nge na libro kʼꞹ me na nojo” (E Briana, kʼꞹ ɇdyi 15 kjɇɇ).

 ¿Xo kjogꞹtsʼꞹge akjanu? Nudyama nujna artículo nge pa nutsʼkʼe.

•  ¿Pjenga me ni mubi ke ra xørꞹji ne Biblia?

•  Ja me rgi xørꞹ ne Biblia

•  Nujyo mama yo dyaja trʼii

 ¿Kjo gi nrrijeme ri xørꞹ ne Biblia? Zø bʼꞹma ja̱a̱. Bʼꞹma ri tsjinkʼe ke nu Biblia nge nzakja dʼa libro ke pɇsʼi na punkjꞹ página ko yo tsʼikiletra i dya pje kuatrʼꞹ. ¡Dya chjenjui nzakja nu televisión ñe yo video!

 Tsjijñige a kjaba: ma ri chøtrʼkʼe dʼa cofre kʼꞹ ya mezhe na punkjꞹ kjɇɇ, kʼꞹ kiʼi kʼo me ni mubi, ¿bʼemi ke dabadiji gi nee ri xøsʼꞹ?

 Nu Biblia chjetrjui kʼe cofre. Nudyanu ri chøtrʼkʼe na punkjꞹ perlas ke ri pa̱ra̱ na punkjꞹ kʼꞹ ra mbøxkʼꞹge nzakja:

•   Ri juajnꞹ pje ri tsjaa.

•   Ri joge na joo ko yo in tata.

•   Ri chøtrʼkʼe jobi kʼo na joo.

•   Ma dya joo gi søø (ri pɇsʼi estrés).

 ¿Pjenga dʼa libro ke bʼꞹbʼꞹ nrreze mi jingua søø ra mbøxkꞹgøji? Dʼa razo ngeje ke “texe yo tʼopjꞹ [ngeje o] pjeñe Mizhokjimi” (2 Timoteo 3:16). Nudyayo nee ra mama ke texe yo jñaa kʼo me na joo ke ri tøtrʼkøji kja na Biblia je ni ñeje kʼa bʼꞹbʼꞹ ajensʼe kʼꞹ me ni mubi.

 Dʼaja ngeje ke ri xørge nrreze nu ja pjꞹrꞹ hasta ke ri kjuatꞹ. Nudyayo søø ra mbøxkʼꞹge ngekʼua ri pa̱rge ja me rga kjaa yo jñaa kʼo ba e̱je̱ kja ne Biblia. Søø ri tsjageyo, ra nuji yeje ejemplo:

•    Søø ri xørge yo 66 libro kʼua ja nzi ga ñeje, nrreze nu Génesis hasta nu Revelación (Apocalipsis).

•    Søø ri xørge nu Biblia kʼua ja nzi gua kjogꞹ nrrexe kʼꞹ o tsʼaa.

 Søø ri tsjage nujyo: Kja nu sección 4-A de nu folleto folleto Guía para el estudio de la Palabra de Dios ri ñuge dʼa lista kʼua ja ba kjogꞹ yo me ni mubi kja o zakʼꞹ e Jesús kja nu xoñijomꞹ.

 Kʼꞹ na yeje nge ke ri juankje kʼo peskʼꞹ ra nuu nzakja nu nrrumꞹ kʼꞹ gi pɇsʼi ke. Nzakja dʼa ejemplo:

•   ¿Ri ñee kjo kʼꞹ ri jogebi ke na kjuana kʼꞹ bʼemi søø ra mbøxkʼꞹ?Nudyama søø ri xørge nu kʼo o kjogꞹ e David ñe e Jonathan. (1 Samuel, yo capítulo 18 jesta kja nu 20) Trjꞹrꞹge yo trʼonꞹ ko ba e̱je̱ kja ne skuama “Cómo encontrar amigos de verdad” ngekʼua ri pjechkʼe ja ga kjaa yo o kjogꞹ.

•   ¿Me ri ñepkʼe ko texe i zɇzhi ri sechkʼe yayo tentaciones? Søø ri xørge yo o kjogꞹ e José ñe ri ñuge ja gua sɇchi angeze ma o kjogꞹ na tentación. (Génesis, nu capítulo 39) Trjꞹrꞹge yo trʼonꞹ kʼo ba e̱je̱ kja ne skuama “Cómo resistir las tentaciones​” ñe “Acusado falsamente“ kʼꞹ ra jitsʼkʼe kʼꞹ søø ri tsjage.

•   ¿Gi nee ri pa̱rge ja rga søø ra mbøxkʼꞹ ma ri dyøtkʼe e Yose? Xørge nu kʼo o kjogꞹ e Nehemías. (Nehemías, nu capítulo 2). Trjꞹrꞹge yo trʼonꞹ kʼo ba e̱je̱ kja ne skuama “Jehová contestó su oración” nu ja søø ri pjechkʼe yo lecciones yo me ni mubi.

 Søø ri tsjage nujyo: Ma gi ñee ri xørꞹ ne Biblia jyonkʼe kʼua ja søø ri bʼꞹntsjɇ, akjanu søø ri tsjijñi na joo texe kʼo ri xørꞹ.

 Nu na jñii kʼꞹ søø ri tsjaa nge ke ri juankje dʼa relato o dʼa salmo, xørꞹge nudyakʼua tsjijñi na joo ja rga søø ra mbøxkʼꞹ. Ma a bi xørge tsjage yo trʼonꞹ nzakjanu:

•    ¿Pjenga e Jehová o nee ke ro dyꞹsʼꞹji yo jñayo kja ne Biblia?

•    ¿Pje jitsʼkø ja ga kjaa e Jehová ñe ja ga tsjapꞹ texe yo ⱥtrʼⱥ?

•    ¿Ja rga søø ra mbøxkʼꞹ i vidagø yo kja ro kjuarꞹ ro xørꞹ?

 Søø ri tsjage nujyo: Ñupkʼe dʼa meta. Søø ri opjꞹ jingua ri pjꞹrꞹ ri xørꞹge ne Biblia ma ri usage nu “Programa de lectura de la Biblia” nudyanu søø ri chøtrʼkʼe kja in sitiogøjme de Internet.