Na tata xipji o tsʼitr’i ke kja edyi 7 kjɇɇ: “Mi jingua ma dya pje mi bʼꞹbʼꞹ, E Mizhokjimi o dyⱥtrʼⱥ ne xoñijomꞹ ñe texe kʼo bʼꞹbʼꞹba. Xo go dyⱥtrʼⱥ ne zana, ne jyarꞹ, ñe yo seje”. Kʼe tsʼitrʼi bo ngijñi na tsʼinrrajme, kjanꞹ go dyønꞹ: “Tata... ¿kjo go dyⱥtrʼⱥ e Diosima?”.

“—Kʼe tata bo nrrꞹrꞹ —. Dya kjo go dyⱥtrʼⱥ, nrreze mi jingua a mi bʼꞹbʼꞹ.” Nu kʼo kjaa kʼꞹ o meya kʼe tsʼitrʼi. Ma o kjogꞹ yo kjɇɇ mazi mi nee ro mba̱ra̱ ja ga kjaa e Diosi. Nu kʼo  dya mi kjapꞹ nda na kjuana ke dya kjo go dyⱥtrʼⱥ e Mizhokjimi. “¿Ja ga kjayo? —Kjijñitsʼɇ—. Texe yo kjaa, bʼꞹbʼꞹ kjo go dyⱥtrʼⱥyo,” ngekʼua me øntsjɇ: E Diosi, ¿kjo go dyⱥtrʼⱥma?.

¿Pje mama ne Biblia? Chjenjui kʼo bo mama kʼe tata ke kja ro manji. E Moisés go xipji e Jehová: “Ma dya bʼe mi bʼꞹbʼꞹ yo trʼeje o gui dyⱥtrʼkʼe ne xoñijomꞹ ñe yo juajma  ke pje nrre unꞹji, ndizima ñe texe​ yo paa ngetsʼkʼe e Diosi” (Salmo 90:1, 2). Kʼe profeta Isaías xo bo mama: “¿Kjo dya i̱ pa̱rge? ¿Kjo dya bi dyⱥrⱥ? Ke e Diosi Jehová ke dya tu̱u̱, nge kʼꞹ o dyⱥtrʼⱥ texe kʼo bʼꞹbʼꞹ kja nee xoñijomꞹ” (Isaías 40:​28, Reina-Valera, 1960). Ñe e Judas bo dyøpjꞹ ke Mizhokjimi “bʼꞹbʼꞹ texe yo paa” (Judas 25).

Kja yo versículo jitsʼiji ke e Diosi nge na “Mizhokjimi ke dya ra nguarꞹ rga manda”, xo akjanꞹ bo mama e apóstol Pablo (1 Timoteo 1:17). Nujyo nee ra mama ke e Diosi a mi bʼꞹbʼꞹ i ra bʼꞹbʼꞹ texe yo paa, dya ra ndu̱u̱ [Apocalipsis] 1:8). E Mizhokjimi dya bo mbꞹrꞹ ro bʼꞹbʼꞹ ñe dya ra nguarꞹ, ngextrjo e Tsʼita jensʼe je ga kjanꞹ.

¿Pjekja me na sʼezhi ra meyaji pje nee ra mamayo? Nangeje yo ntee dya søø ra minkʼøji na punkju kjɇɇ nzakja e aJehová, ngekʼua dya ri pezheji yo kjɇɇ nzakja angeze. Kʼo ri pezhgøji mil kjɇɇ, nu kʼo e Mizhokjimi kjapꞹtrjo dʼa paa, nange angeze a me mezhe ke a mi bʼꞹbʼꞹ (2 Pedro 3:8). Nzakja yo  tʼansa mintjoji 50 paa. Nujyo, ¿søø ra mba̱ra̱ji ja ga kjaa yo  70 u 80  kjɇɇ yo ri minkʼøji? ¡Iyo, dya søji! Nutsʼkʼøji ri chjenkjøji nzakja yo tʼansa ajmi e Jehová. In pjeñeji dya nrra pa̱ra̱ nzakja e Diosi (Isaías 40:22;55:  8,  9). Ngekʼua, dya søø ra pa̱ra̱ji na punkjꞹ nzakja angeze, nange dya ri minkøji na punkjꞹ kjɇɇ.

Zø dya søø ra meyaji ja ga kjaa ke e Mizhokjimi bʼꞹbʼꞹ texe yo paa, je akjakʼua. Ma ro bʼꞹbʼꞹ kʼꞹ ro dyⱥtrʼⱥ e Diosi, nge kʼꞹ ro dyⱥtrʼⱥ texema. Kja ne Biblia mama ke e Jehová nge kʼꞹ o dyⱥtrʼⱥ texe yo bʼꞹbʼꞹ (Apocalipsis 4:11). Ri pa̱rgøji ke ma e Mizhokjimi dya bʼe pje mi ⱥtrʼⱥ, dya pje mi bʼꞹbʼꞹ (Génesis 1:1,2). ¿Ja ba mbꞹrꞹ texema? Kʼꞹ o dyⱥtrʼⱥ nrrexe a mi bʼꞹbʼꞹ ndizi mi jingua. Ngekʼua Mizhokjimi mi bʼꞹbʼꞹtsʼɇ, ma dya bʼe mi bʼꞹbʼꞹ o trʼii ñe yo anxe (Job 38:​4, 7; Colosenses 1:15). Ri unꞹji nguenda ke ma e Yose dya bʼe pje mi ⱥtrʼⱥ, mi bʼꞹntsʼɇje. Dya kjo go dyⱥtrʼⱥ angeze nange dya kjo mi bʼꞹbʼꞹ ngextrjo angeze.

Kʼꞹ ri bʼunkʼøjidya ñe ne xoñijomꞹ, ixi ñetse ke bʼꞹbʼꞹ na Diosi ke ra bʼꞹbʼꞹ texe yo paa. Kʼꞹ  kjapꞹ ra ñʼomꞹ texe yo bʼꞹbʼꞹ ajensʼe, nge e Jehová, xo nge angeze ke a mi bʼꞹbʼꞹ ma dya kjo bʼe pje mi ka̱ra̱. Ñe nge angeze ke kjapꞹ ra minji (Job 33:4).