O tzʼel qnikʼe tiʼj qa at nim xjal at jun kyokslabʼil, moqa kynimbʼil, in che tzalaj tuʼn kyyolin kyiʼj xnaqʼtzbʼil ateʼkux toj Tyol Dios. Ojtzqiʼn quʼne qa teyele te junjun xjal tzaqpiʼn taʼ tuʼn tjaw tjyoʼn alkye xnaqʼtzbʼil kʼokel qeʼ tkʼuʼj tiʼj, tuʼntzunju, mintiʼ in che ok q-obligarine qe xjal tuʼn tok qeʼ kykʼuʼj tiʼj tqanil in xi qqʼamaʼne kye xjal.

 Qa ma qo yoline tiʼj xnaqʼtzbʼil at toklen tukʼil okslabʼil, in nok tilil quʼne tuʼn tjapun nabʼil in tzaj tqʼamaʼn Tyol Dios: «Chebʼa kymanxe kye ex atwit kychi tuj kywitze» iktzun tten in kubʼ qyekʼune qa nim toklen xjal toj qwitze (1 Pedro 3:15). Ojtzqiʼn quʼne qa ateʼ junjun xjal kʼelel kyikʼen tqanil qʼiʼn quʼne (Mateo 10:14). Noqtzun tuʼnj, il tiʼj tuʼn qyoline kyukʼil xjal tuʼn tel qnikʼe tiʼj alkye kyxim at. Ax ikx, jaku chʼexpaj tten kyanqʼibʼil teyele te junjun xjal.

 Jun techel, qa at jun xjal mintiʼ ambʼil tiʼj tuʼn tyolin qukʼile toj jun qʼij, noqtzun tuʼnj, toj juntl qʼij, jakulo yolin qukʼile. Ax ikx, atlo maj jaku che ok weʼ xjal twitz junjun nya bʼaʼn aju jaku tzʼonin kyiʼj tuʼn kyjyon onbʼil toj Tyol Dios. Tuʼntzunju, in nok tilil quʼne tuʼn qyoline jun maj ex juntl maj kyukʼil xjal.