Rom Khuaa Mite Hnêna Lehkhathawn 13:1-14
13 Mi tinin thuneitute thu âwih rawh se, Pathian phalna lovin thuneitu tu mah an awm si lo; tûna thuneitu awm mêkte hi Pathianin an awmna hmun tûr ṭheuhva a dahte an ni.
2 Chuvângin, tu pawh thuneitu dodâl chuan Pathian ruahmanna a dodâl a ni; chutianga dodâltute chuan anmahni chungah rorêlna an thlentîr ang.
3 Rorêltute hi thil ṭha titute tân chuan hlauhawm an ni lo va, thil ṭha lo titute tân erawh chuan hlauhawm an ni. A nih leh, thuneitu hlau lova awm i duh em? Thil ṭha ti zawm zêl la; tichuan, a fak i hlawh ang.
4 Ani chu i ṭhatna tûra Pathian rawngbâwltu a ni si a. Nimahsela, thil ṭha lo i tih chuan hlau rawh, chhan awm lovin ngûnhnâm chu a keng si lo. Ani chu Pathian rawngbâwltu, thil ṭha lo titute chunga Pathian thinurna phuba latu* a ni.
5 Chuvângin, chu thinurna pumpelh tûr chauh ni lovin, i chhia leh ṭha hriatna i vawn reng theih nân an thu i âwih tûr a ni.
6 Chumi avâng chuan chhiahte pawh in chawi ṭhîn alâwm; anni chu vântlâng tâna rawngbâwl tûra Pathian chhiahhlawhte an ni si a.
7 Mi zawng zawng hnênah pêk tûr apiang pe rawh u; chhiah chawina tûra hnênah chuan chhiah chawi ula, lei man pêkna tûra hnênah chuan lei man pe ula, hlauh tûra chu hlau ula, chawimawi tûra chu chawimawi rawh u.
8 Inhmangaih tawnna chauh lo chu tu ma eng mah ba suh u; a mihringpui hmangaihtu apiang chuan dân a zawh famkim tawh a ni.
9 Dânin, “I uirê tûr a ni lo, tual i that tûr a ni lo, rûk i ru tûr a ni lo, i awt tûr a ni lo,” a tih leh thupêk dang la awm rêng rêngte chu: “Nangmah i inhmangaih angin i vêngte pawh i hmangaih tûr a ni,” tih thu hian a khai khâwm vek si a.
10 Hmangaihna neitu chuan a vêngte chungah thil sual a ti ngai lo; chuvângin, hmangaihna hi dân zawh famkimna a ni.
11 Eng hunah nge kan awm tih in hriat avâng leh muhîl thawh harh a hun tawh tih in hriat avângin chu chu ti rawh u. Tûnah chuan ringtu kan nih tirh lai ai khân kan chhandamna a hnai tawh zâwk si a.
12 Zân hi a ral lek lek tawh a, khua a vâr dâwn ta. Chuvângin, thima thiltihte chu hlîpin, êng râlthuamin i inthuam ang u.
13 Hlimhlawp bâwlnate leh zu ruihnate awm lovin, nungchang bawlhhlawhnate leh tîmna nei lova thil sual tihnate* awm lovin, innghirnghona leh îtsîkna awm lovin, chhûna awm angin mawi takin i awm ang u.
14 Tin, Lalpa Isua Krista entawn tûr siam chu zui ula, in tisa châknate tih puitlin dân tûr ngaihtuah suh u.
