Leviticus 21:1-24
21 Jehova chuan Mosia hnênah: “Arona fapa puithiamte chu bia la, an hnênah, ‘Tu mah a mite zînga mitthi avângin a intibawlhhlawh tûr a ni lo.
2 Mahse, a thisen zawmpui a nu te, a pa te, a fa te, a unaupate avâng chuan a intibawlhhlawh thei ang a,
3 a bul hnaia awm a unaunu nula thianghlim, pasal la nei lo avâng pawhin a intibawlhhlawh thei ang.
4 Amaherawhchu, a mite zînga tu emaw nupui avâng erawh chuan a intibawlhhlawhin a intibawrhbâng tûr a ni lo.
5 Puithiamte chuan an lû an ziat kawlh tûr a ni lo va, an bek hmul an ziat tûr a ni lo va, an taksa an zai tûr a ni hek lo.
6 An Pathian tân an thianghlim tûr a ni a, an Pathian hming an tibawrhbâng tûr a ni lo. Jehova hnêna meia thilhlan, an Pathian chhang* hlântute an nih avângin an thianghlim tûr a ni.
7 Puithiamte chu an Pathian tâna an thianghlim avângin nawhchizuar te, nula thianghlim lo te, pasal ṭhen tawhte chu nupuiah an nei tûr a ni lo.
8 I Pathian chhang hlântute an nih avângin anni chu i tithianghlim tûr a ni. Kei Jehova, a tithianghlimtu che hi ka thianghlim avângin anni pawh i tân an thianghlim tûr a ni.
9 “‘Puithiam fanuin nawhchi zuara a intihbawrhbân chuan a pa a tibawrhbâng a ni a, hâl hlum tûr a ni.
10 “‘A unaute zînga puithiam lalber, puithiam thawmhnawte ha tûra hriak thiha nemngheh tawha chu a sam enkawl lovin a awm tûr a ni lo va, a thawmhnawte a pawt thlêr tûr a ni hek lo.
11 Mitthi ruang rêng rêng a hnaih tûr a ni lo va, a nu emaw, a pa emaw avâng pawhin a intibawlhhlawh tûr a ni lo.
12 Inpumpêkna chhinchhiahna atân a Pathianin hriak a thih tawh avângin, hmun thianghlim aṭang chuan a kal chhuak tûr a ni lo va, a Pathian hmun thianghlim chu a tibawrhbâng tûr a ni hek lo. Kei hi Jehova ka ni.
13 “‘Nupui atân nula thianghlim chauh a nei tûr a ni.
14 Hmeithai te, pasal ṭhen tawh te, nula thianghlim lo te, nawhchizuarte chu nupuiah a nei tûr a ni lo va, a mite zînga nula thianghlim chauh nupuiah a nei tûr a ni.
15 A mite zînga a thlahte chu a tibawrhbâng tûr a ni lo, kei Jehova hi amah tithianghlimtu ka ni si a,’ tiin sawi rawh,” a ti a.
16 Jehova vêk chuan Mosia hnênah:
17 “Arona chu, ‘In chhuan lo la awm tûr thlengin in thlahte zînga piangsual tu mahin a Pathian chhang a rawn hlân tûr a ni lo.
18 Chutianga hlân thei lo piangsualte chu: mitdel te, ke bai te, hmai hmêlhem te, kut emaw, kê emaw inchen lo te,
19 kut emaw, ke emaw tliak te,
20 zâng kûl te, mi tê te, mit chiangkuang lo te, vun natna avânga bawl nei te, ringworm nei te, tilmu kehte an ni.
21 Puithiam Arona thlah piansualna nei rêng rêngin Jehova hnêna meia thilhlan a hlân tûr a ni lo va. Piansualna a neih avângin a Pathian chhang a rawn hlân tûr a ni hek lo.
22 Thil thianghlim leh thil thianghlim berte aṭangin a Pathian chhang erawh chu a ei thei ang a.
23 Amaherawhchu, piansualna a neih avângin puanzâr hnaihah leh maichâmah a lo kal tûr a ni lo. Ka hmun thianghlim a tibawrhbâng tûr a ni lo, kei Jehova hi anmahni tithianghlimtu ka ni si a,’ tiin hrilh rawh,” a ti a.
24 Tichuan, Mosia’n Arona leh a fapate leh Israel mi zawng zawng hnênah chûng thute chu a sawi ta a.
Footnote-te
^ A nih loh leh, “ei tûr.” Hei hian inthawina a kâwk.
