TSHIENA-BUALU TSHINENE | YEZU UDI UTUSUNGILA KU TSHINYI?
Tudi dijinga ne kusungidibua
Muntu udi muledibue kudi mukaji udi ne matuku makese a muoyo wende ne udi muule tente ne ntatu. Udi umena bu tshilongo ne udi ufubidila, udi upita lubilu bu mundidimbi ne kena ushalaku.’—Yobo 14:1, 2.
Katshia ku kale, bantu batu anu bela meji bua muvuabi mua kuikala bimpe bu bantu mua kushala anu bansonga ne makanda a mubidi mimpe bua kashidi. Bia dibungama, tudi anu tufua. Mêyi adi kuulu eku mamba kudi Yobo kukadi bidimu bipite pa binunu bisatu adi anu malelela too ne lelu.
Pa buloba bujima bantu bonso badi ne dijinga dikole dia kushala ne muoyo kashidi. Bible udi utuambila ne: Nzambi uvua muteke mu muoyo wa bantu dijinga dia kuikala ne muoyo wa tshiendelele. (Muambi 3:11) Bu mudibi nanku, udi wela meji ne: Nzambi wa dinanga uvua mua kuteka mu mioyo ya bantu dijinga divuaye kayi mua kukumbaja anyi? Wewe muandamune ne: tòo, udi muambilamu. Dîyi dia Nzambi didi dibikila lufu ne: muena lukuna, didi dilaya ne: ‘nebalujimije.’—1 Kolinto 15:26.
Kakuyi mpata, lufu mmuena lukuna. Muntu wetu wa meji eu kena mua kulunanga to. Patu njiwu imueneka, tutu tutupika, tusokoma peshi tunyema. Patudi tusama, tutu tukeba bua kumvua bimpe. Tutu tuenza tshionso tshidi tshikengedibua bua kuepuka tshintu tshidi mua kutukebela lufu.
Kudiku bualu kampanda budi butusaka bua kuitaba ne: muena lukuna wa kale eu neajimijibue anyi? Bushuwa budiku. Yehowa Nzambi, Mufuki wa bintu bionso, kavua mufuke bantu bua bikale ne muoyo anu bua bidimu bikese pashishe bafua to. Lufu lua bantu kaluvua mu malu avuaye mulongolole katshia ku ntuadijilu to. Uvua musue bua bantu bashale ne muoyo kashidi pa buloba, ne malu adiye ulongolola utu uakumbaja.—Yeshaya 55:11.
Kadi, mmushindu kayi wajikijabu lufu? Katshia mu bikondo bia kale, bantu batu anu batata bua kujikija tshilumbu tshia lufu, kadi kabayi anu bakumbana to. Too ne lelu, batshidi anu benda bakeba mua kulujikija. Bena malu a sianse mbenze bisalu ne amue manga adi majikije amue masama. Bavua benze makebulula mu mibidi ya bantu ne ya nyama. Mu miaba ya bungi, bantu ndambu badi benza bidimu bia bungi kupita mu bidimu lukama bishala ebi. Nansha nanku, lufu ludi anuku. Anu mudi Bible wamba ne: ‘Bionso nebiandamuke dimfuenkenya dia buloba.’—Muambi 3:20.
Lumu luimpe ludi ne: katuena ne bua kueyemena mamanya a bantu bua kujikija tshilumbu tshia bidimu ne bidimu etshi to. Yehowa Nzambi ukadi mutulongoluele mushindu wa kusungidibua ku lufu, ne muntu wenza bualu bua mushinga ebu n’Yezu Kristo.
