Bible utu ushintulula bantu

TSHIVUA tshisake muntu mukuabu bua kupingana mu malu a mu tshitendelelu avuabu bamulongeshe ku buana akavuaye mulekele ntshinyi? Mmunyi muvua nsongalume mukuabu mupetele disanka kudi muntu uvua muangate muaba wa tatuende? Londesha malu adi bantu aba bamba.

“Ngakajinga bua kupingana kudi Yehowa.”​—ELIE KHALIL

MULELA MU: 1976

DITUNGA DIABU: CHYPRE

TSHIVUAYE: MUANA MUJIMINE

KALE: Bavua bandelele mu ditunga dia Chypre, kadi ngakakolela mu Australie. Baledi banyi mBantemu ba Yehowa, bakenza muabu muonso bua meme kunanga Yehowa ne Bible Dîyi diende. Kadi pamvua ne bidimu dikumi ne pa mutu, ngakatuadija buntomboji. Mvua mpatuka mu nzubu butuku ngenda mbembela bua kuya kupetangana ne bena mulongo nanyi. Tuakiba mashinyi ne kubuelakana mu bimue bimvundu bia bungi.

Kumpala, mvua ngenza malu au mu musokoko, ntshina bua kubenga kunyingalaja baledi banyi. Kadi mu bungi bua matuku, ngakalekela buôwa abu. Ngakadia bulunda ne bantu bakulumpe bikole kundi bavua kabayi banange Yehowa to. Bantu abu bakavua bansaka kubi. Ndekelu wa bionso, meme kuambila baledi banyi ne: tshiena musue kuikala kabidi mu tshitendelelu tshienu atshi to. Bakateta bua kungambuluisha ne lutulu, kadi ngakabenga bionso bivuabu benza; biakabatonda bikole.

Meme mumane kumbuka kumbelu, ngakatuadija kunua bintu bia lulengu, nnua ne mpanyisha diamba bikole. Nkavua ngenda bundumba, ntshishila mu nganda. Meme kulua kabidi muena biji bia lukasa. Muntu yeye muambe anyi muenze bualu bumvua tshiyi musue, mvua mfiika munda bikole, ntandisha bantu ne mbatuta. Misangu ya bungi, mvua ngenza malu onso avuabu bandongeshe ne: muena Kristo kena mua kuenza to.

MUSHINDU UDI BIBLE MUNSHINTULULE: Ngakalua mulunda wa pa muoyo wa munu wa diamba uvua mufuishe tatuende patshivuaye muana. Tuvua ne tshibidilu tshia kushala tuyukila mundankulu. Dimue dituku, kundondelaye malu ende ne kanyinganyinga kavuaye naku bua lufu lua tatuende. Bu mumvua mulonge ku buana ne: bafue nebabishibue, ngakatuadija kumulondela malu a Yezu, muvuaye mubishe bantu ne mudiye mulaye bua kubisha kabidi bantu mu matuku atshilualua. (Yone 5:28, 29) Ngakamuambila ne: “Elabi meji bu wewe mua kumonangana kabidi ne papa webe, tuetu bonso tudi mua kupeta muoyo wa kashidi pa buloba bukudimuna Mparadizu.” Malu aa akamulenga ku muoyo bikole.

Matuku makuabu, mulunda wanyi eu uvua ulua ne bimue biena-bualu bu mudi tshia matuku  a ku nshikidilu anyi tshia dilongesha dia Busatu bunsantu. Mvua mmubadila mu Bible wende mvese ya bungi ivua ileja bulelela budi butangile Yehowa Nzambi, Yezu ne matuku a ku nshikidilu. (Yone 14:28; 2 Timote 3:1-5) Pamvua ngenda muambila malu a Yehowa, meji anyi avua enda apingana kudi Yehowa.

Ntete ya bulelela bua mu Bible ivua baledi banyi baditatshishe bua kunkuna mu muoyo, ivua kayiyi mitoloke, yakatuadija kutoloka ku kakese ku kakese. Tshilejilu, patuvua mu fete ne balunda banyi tunua diamba, mvua imue misangu ntuadija diakamue kuela meji bua Yehowa. Balunda banyi ba bungi bavua bamba muvuabu banange Nzambi kadi malu avuabu benza aleja bia tshianana. Bu mumvua tshiyi musue kuikala bu bobu, ngakajingulula tshivua tshikengela kuenza. Ngakajinga bua kupingana kudi Yehowa.

Bushuwa, mbitekete bua kuamba kadi bikole bua kuenza. Bivua bitekete bua meme kushintuluka mu amue malu; ngakalekela kunua diamba kakuyi lutatu. Meme kulekela kabidi balunda banyi ba kale, kutuadija kulonga Bible ne mukulu muena Kristo.

Kadi bivua bikole bua meme kushintuluka mu malu makuabu. Bivua bitamba kunkolela bua kukanda tshiji. Imue misangu, mvua nganji kudikanda, katupa ndua mpingana anu muanyi ne kale. Mvua ngumvua bibi bikole pamvua mpingana amu ku malu amvua mbenga. Bu muvuabi bintekeshe mu mikolo, meme kuleja mukulu uvua undongesha Bible bualu ebu. Muvuaye ne lutulu ne muena malu mimpe, wakankankamija bikole. Dituku dikuabu, yeye kumbadisha tshiena-bualu tshia mu Tshibumba tshia Nsentedi tshivua tshileja mushinga wa dinanukila. * Tuetu kuyikila bua malu andi ne bua kuenza pandi ne tshiji. Ku kakese ku kakese, bu mumvua munsambile Yehowa bikole ne muikale ne malu onso a mu tshiena-bualu atshi mu mutu, biakangambuluisha bua meme kutuadija kukanda tshiji. Ndekelu wa bionso, meme kutambula, kulua Ntemu wa Yehowa mu ngondo muinayi wa 2000. Bushuwa, baledi banyi bakansaka bikole.

MASANKA ANGAKAPETA: Ndi ne ditalala mu mutshima wanyi ne kondo ka muoyo kimpe mpindieu, mumanye ne: tshitshiena nyanga kabidi mubidi wanyi ne diamba ne bundumba to. Malu onso andi ngenza bu mudi mudimu, kubuela mu bisangilu bia bena Kristo, kujikija lutetuku mu mushindu kampanda, ndi mbienza ne disanka dia bungi. Ndi ngangata muoyo ne mushinga.

Ndi ngela Yehowa tuasakidila bua mudiye mumpeshe baledi bavua kabayi balekela bua kungambuluisha. Ndi kabidi mvuluka mêyi a Yezu adi mu Yone 6:44 adi amba ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’ Ndi ne disanka dia bungi bua kumona mundi mukokeshe bua kupingana kudi Yehowa bualu nyeye ke udi munkoke.

 “Mvua njinga panyi bua ngikale ne tatu.”​—MARCO ANTONIO ALVAREZ SOTO

MULELA MU: 1977

DITUNGA DIABU: CHILI

TSHIVUAYE: MUENA MU TSHISUMBU TSHIA BIMBI BA MIZIKE YA DEATH-METAL

KALE: Bavua bankoleshe kudi mamuanyi mu Punta Arenas, tshimenga tshimpe tshidi mu katupa ka buloba ka mu Magellan pabuipi ne ku Sud kua Amérique wa ku Sud. Baledi banyi bakabengangana pamvua ne bidimu bitanu, meme kudimona bu muana mulekelela. Mvua njinga panyi bua ngikale ne tatu.

Mamu uvua mulonge Bible ne Bantemu ba Yehowa, uvua uya nanyi mu bisangilu bia bena Kristo ku Nzubu wa Bukalenge. Kadi tshivua musue kuya mu bisangilu to. Misangu ya bungi, mvua ngenda nkandamana mu njila. Pangakakumbaja bidimu 13, ngakalekela kubuela mu bisangilu.

Mu tshikondo atshi, ngakalua kunanga mizike bikole, meme kulua kumona ne: mvua ne tshipedi tshia kuimba. Pangakakumbaja bidimu 15, mvua ngimba mizike ya heavy-metal ne ya death-metal mu fete, mu nganda ne mu konsere. Kusomba ne batungimba bavua bamanye kuimba bikole kuakanjula dijinga dia kudifila bikole mu dilonga malu a mizike. Ngakatuadija kualongela mu tshilongelu tshia muaba umvua musombele. Pamvua ne bidimu 20, meme kuya mu tshimenga tshikulu tshia Santiago bua kubandisha dimanya dianyi dia mizike. Mvua kabidi ntungunuka anu ne kuimba mu tshisumbu tshia bena mizike ya heavy-metal ne ya death-metal.

Mu matuku onso au, mvua anu ndiumvua ne: ndi mupangile tshintu kampanda. Bua kukepesha meji au, mvua nansha mua kukuatshika maluvu anyi kunua diamba ne batungimba nanyi, bamvua mona bu bena mu dîku dietu. Mvua ne luidi lua ntomboji, luidi elu luvua lumuenekela nansha kuisu kuanyi. Mvua mvuala bilamba bifike, ndepesha muedi ne ndepesha nsuki yamba kufika too ne tshimonu.

Njila ne njila, mvua anu ne lungenyi lua kuluangana ne mvua anu mpeta bilumbu ne bampulushi. Umue musangu pamvua mukuatshike, ngakabunda tshisumbu tshia basumbishi ba diamba bavua batuyobola ne balunda banyi. Bobu kungela mututu, kunkonyangaja ne mbanga.

Kadi anu balunda bamvua nsomba nabu ke bakanyingalaja bikole. Dimue dituku, meme kumanya ne: mulunda wanyi wa pa muoyo ukavua pende upatuka ne nsongakaji umvua mpatuka nende, pine apu balunda banyi bonso bamanye bualu ebu kadi bansokoka. Biakanyingalaja be.

Ngakapingana mu Punta Arenas, meme kubanga kulongesha bantu mizike ne mvua kabidi ngimba kidare. Meme kutungunuka kabidi ne kuimba ne kukuata misambu ne bimbi ba mizike ya heavy-metal ne ya death-metal. Meme kupetangana ne Sussan, nsongakaji mukuabu muimpe kumona ungakabanjija. Panyima pa matuku, Sussan kumona ne: mamuende uvua witaba dilongesha dia Busatu bunsantu dimvua meme tshiyi ngitaba. Yeye kunkonka ne: “Kadi, bulelela buepi?” Meme kumuleja muvua dilongesha dia Busatu bunsantu dia dishima, kadi tshivua mumanye mua kumujadikila bualu ebu ne Bible to. Kadi mvua mumanye bavua mua kumulejabu. Ngakamuambila ne: Bantemu ba Yehowa badi mua kumuleja bulelela bua mu Bible. Pashishe meme kusambila Yehowa bua angambuluishe, bualu bumvua tshiyi muenze kukadi bidimu bia bungi.

Matuku makese pashishe, meme kumona muntu muenze bu umvua mumanye, meme kumukonka ni uvua Ntemu wa Yehowa. Nansha muvuaye umueneke bu uvua untshina bua mushindu umvua, wakangandamuna bimpe nkonko  imvua mumuele ivua itangila bisangilu ku Nzubu wa Bukalenge. Mvua mutuishibue ne: Yehowa muandamune disambila dianyi bu mumvua mupetangane ne muntu eu. Meme kuya ku Nzubu wa Bukalenge, kusombela mu mulongo wa ndekelu bua muntu kammanyi to. Kadi ba bungi bakatuadija kuvuluka ne: mvua mbuela mu bisangilu pantshivua muana. Bakangakidila, kungupukilabu ne muoyo umue, meme kudiumvua mu ditalala dia dikema. Bienze anu bu ne: mvua mupingane kumbelu. Pangakamona muntu uvua mundongeshe Bible ku buana, ngakamulomba bua kundongeshaye kabidi.

MUSHINDU UDI BIBLE MUNSHINTULULE: Dimue dituku, ngakabala Nsumuinu 27:11 udi wamba ne: ‘Muananyi wikale ne meji, usankishe mutshima wanyi.’ Meme kukema bikole pamvua ngela meji mudi muntu wetu eu mua kusankisha mutshima wa Mufuki wa bionso. Ngakamona ne: Yehowa mmuangate muaba wa tatu umvua nkeba kuonso eku.

Mvua musue kusankisha Tatu wanyi wa mu diulu ne kuenza disua diende, kadi nkavua mupika wa maluvu ne diamba bidimu bia bungi. Ngakalua kumvua dilongesha dia Yezu didi mu Matayo 6:24 dia ne: ‘Muntu kena mumanye mua kukuatshila bamfumu babidi mudimu.’ Bu mumvua nditatshisha bikole bua kushintuluka, mêyi adi mu 1 Kolinto 15:33 a ne: “Malunda mabi adi anyanga malu makane a bantu,” akandenga bikole. Meme kumona ne: meme nya anu miaba imvua nya ne nsomba ne balunda banyi ba kale, tshivua mua kulekela bikadilu bibi to. Mubelu wa mu Bible uvua mumvuike bimpe, mvua ne bua kuenza muanyi muonso bua kulekela malu avua mua kundenduisha.​—Matayo 5:30.

Bu mumvua munange mizike ya heavy-metal bikole, kulekela kuyimba ne kuyumvua ke bualu buvua buntatshishe bikole. Kadi balunda banyi ba mu tshisumbu bakangambuluisha, meme kufika anu kudibilekela. Ngakalekela kabidi kukuatshika maluvu ne kunua diamba. Meme kukosa nsuki, kukosa muedi, kulekela ne divuala bilamba bifike. Pangakambila Sussan ne: ndi musue kukosa nsuki, wakajinga kumanya tshintu nkenza ku Nzubu wa Bukalenge. Kungambilaye ne: “Tuyaye nebe bua nya kumona tshitu tshienzekaku.” Yeye kusanka bikole bua malu avuaye mumone, matuku makese kutuadijaye pende kulonga Bible. Ndekelu wa bionso, tuakaselangana ne Sussan. Tuetu kutambula, kulua Bantemu ba Yehowa mu 2008. Tudi ne disanka bua mutudi badisangishe ne mamu bua kuenzela Yehowa mudimu.

MASANKA ANGAKAPETA: Ndi mupanduke ku masanka a dishima a mu bulongolodi ebu ne ku malunda mabi. Ntshidi anu munange mizike, kadi mpindieu ntu nsungula idi mimpe. Ntu ngambuluisha bena mu dîku dianyi ne bantu bakuabu, nangananga bansonga ne dimanya dianyi adi. Ndi musue kubambuluisha bua bamone ne: malu a bungi a mu bulongolodi ebu adi mua kumueneka bu mimpe, kadi ku ndekelu adi bu “bintu bia kuela ku diala.”​—Filipoi 3:8.

Ngakapeta balunda bimpe ba kueyemena mu tshisumbu tshia bena Kristo mudi dinanga ne ditalala. Tshia mushinga ntshia ne: bu mundi musemena pabuipi ne Yehowa, ndi mufike ku dipeta Tatu.

[Mêyi adi kuinshi]

[Lungenyi lunene lua mu dibeji 13]

“Ndi mukokeshe bua kupingana kudi Yehowa bualu nyeye ke udi munkoke”