Tshiena-bualu etshi tshidi tshijula nkonko iukadi pamuapa mudiele ne tshileja muaba uudi mua kupetela mandamuna mu Bible webe. Bantemu ba Yehowa nebikale ne disanka dia kuyukila nebe pa mandamuna aa.

1. Batismo wa bena Kristo udi umvuija tshinyi?

Batismo mmushindu wa kulomba Nzambi bua tuetu kuikala nende mu malanda mimpe. Nunku, muena Kristo kena mua kutambula patshidiye muana wa pambidi to, kadi mpakadiye mukumbane bua kulonga malu a Nzambi ne kulua muyidi wa Yezu. (Bienzedi 8:12; 1 Petelo 3:21) Tudi tulua bayidi ba Yezu patudi tulonga ne tuenza malu adiye mutulombe.​—Bala Matayo 28:19, 20.

Mu matuku a bapostolo ba Yezu, bantu ba bungi bakatuadija kulonga malu a Nzambi ne a Yezu kabayi bajingakana. Tshilejilu, pakalonga muntu mukuabu ne: lufu lua Yezu luvua lunzuluile bantu njila wa lupandu, wakalua diakamue muyidi wende. Lelu, bantu bimpe ba bungi mbasungule bua kulua bayidi ba Yezu.​—Bala Bienzedi 8:26-31, 35-38.

2. Yezu wakatambula bua tshinyi?

Yezu uvua ne bidimu bitue ku 30 pakamuina Yone mubatiji mu musulu wa Yadene. Batismo wa Yezu uvua uleja dipangadika divuaye muangate dia kuenza disua dia Nzambi. (Ebelu 10:7) Bua kukumbaja disua edi uvua kabidi ne bua kufila muoyo wende bu mulambu bua mibi ya bantu. Nansha pavua Yezu mu diulu kumpala kua kuluaye pa buloba, uvua anu munange ne utumikila Tatuende Yehowa.​—Bala Mâko 1:9-11; Yone 8:29; 17:5.

  3. Muena Kristo udi ne bua kutambula bua tshinyi?

Nsombelu wetu mmushilangane ne wa Yezu, bualu tudi balela mu mibi. Kadi muoyo wa Yezu uvuaye mufile bu mulambu mmutuambuluishe bua kuikala mu malanda mimpe ne Nzambi. (Lomo 5:10, 12; 12:1, 2) Tudi mpindieu ne mushindu wa kuikala bena mu dîku diende. (2 Kolinto 6:18) Tudi tupeta diakalenga edi mushindu kayi? Tudi tudilambula kudi Yehowa, patudi tuenza disambila pa nkayetu, tuditshipa bua kuenza disua diende matuku etu onso a muoyo. Tuetu bamane kudilambula, tudi ne bua kutambula batismo bua kuleja bantu bonso mutuvua badilambule.​—Bala Matayo 16:24; 1 Petelo 4:2.

4. Mmunyi muudi mua kudilongolola bua kutambula batismo?

Bantemu ba Yehowa badi balonga Bible ne muntu yonso udi musue kusemena pabuipi ne Nzambi. Kulonga Bible ne kubuela mu bisangilu bia bena Kristo nekukuambuluishe bua kunanga Nzambi bikole ne kukolesha ditabuja diebe. Nekukuambuluishe kabidi bua kuikala ne meji ne bibidilu bimpe. Wewe mukoleshe dinanga, ditabuja ne ngikadilu mikuabu idi isankisha Nzambi nebikuambuluishe bua kukumbaja mutshipu webe wa kuenzela Yehowa mudimu bua kashidi.​—Bala Yone 17:3; Ebelu 10:24, 25.

Bua kumanya malu makuabu, bala nshapita wa 18 wa mukanda wa Bible utu ulongesha tshinyi menemene?, mupatula kudi Bantemu ba Yehowa.