Njikijilu wa Kalasa ka Gilada ka 126

Mmushindu wa kuikala misionere muimpe

MU DIA lumingu dia 14 ngondo 3 tshidimu tshia 2009, tshisumbu tshinene tshia bantu tshiakasangila ne disanka mu nzubu ya tulasa tua Watchtower ku Patterson, mu tshimenga tshia New York. Dituku adi ke divuabu bapesha balongi ba mu kalasa ka 126 ka Gilada ka ba misionere mapoloma abu. Balongi bavua bajikije aba bavua badiakaje bua kuenza mudimu wabu wa kuyisha lumu luimpe lua Bukalenge bua Nzambi mu matunga 22.​—Matayo 24:14.

Balongi aba bavua balonge ngondo 5 malu a mu Bible bua kumanyabu mua kuikala bamisionere bimpe. Dituku dia difila mapoloma adi divua diabu dia ndekelu dia kutelejaku mibelu ya meji ya bobu bonso pamue pa mushindu wa kukumbajabu mudimu wabu bilenga.

Muanetu Anthony Morris uvua ulombola tshisangilu tshia difila dia mapoloma (wa mu kasumbu kadi kaludika midimu ya Bantemu ba Yehowa pa buloba bujima) wakaleja mudi Kalasa ka Gilada katuadije kulongesha bamisionere katshia ku tshidimu tshia 1943. Kubangila anu ku tshikondo atshi, balongi badi bajikija mu tshilongelu atshi badi benza mudimu wa dikema mu diyisha dia Bukalenge bua Nzambi pa buloba bujima.

Ngamba-malu wakaleja ne: nansha muvua Bafundi ne Bafalese bapepeja bapostolo ba Yezu bu bantu bavua ‘kabayi bamanye mikanda, bantu ba patupu,’ baluishi babu aba bakitaba muvua bapostolo ne dikima bua muvuabu ne Yezu. (Bienzedi 4:13) Malongesha avua balongi bapete mmabapeshe mushindu wa kuikalabu ne dikima.

Muanetu Robert Ciranko (udi muambuluishi wa mu Komite wa bafundi wa Kasumbu Kaludiki) wakenza muyuki udi ne tshiena-bualu tshia ne: “Kanulondi tshidi mpala.” Wakaleja ne: balongi ne bapetangane ne bantu ba mishindu yonso ne ba nkoleshilu ne bibidilu bia bungi. Kadi kubalongesha kakuakutatshisha balongi bikalabu ne mmuenenu wa malu bu wa Yehowa to. Bilondeshile tshidi mu Bienzedi 10:34 mu tshiena-Greke badi bamba ne: “Nzambi katu ulonda tshidi mpala to,” mbuena kuamba ne: katu wanyisha mpala kampanda kumpala kua mukuabu nansha. Tuambe bimpe ne: ‘Nzambi kena ne kansungasunga.’ (Bienzedi 10:35) Muanetu Ciranko wakamba ne: “Kuikala ne mmuenenu wa buena wa Yehowa mu miaba yanutumabu ne kumona muntu yonso bu muntu udi Nzambi mua kuanyisha, nekunuambuluishe bua kuikala bamisionere bimpe.”

“Nudi bapete binudi nabi dijinga”

Muanetu Samuel Herd wa mu Kasumbu Kaludiki wakatuadija muyuki wende wamba ne: “Bamue bantu batu bamba mudi kamelu kabi kuisu, pabi, bua ngendu ya mu tshipela kuoku ke kadi kakumbane.” Bia muomumue bamisionere bapiabapia badi ne bionso bidibu nabi dijinga bua kupatula bipeta bilenga miaba idibu babatuma. Kudi malu 5 ikala mua kubambuluisha.

1. Kunanga Yehowa. (Matayo 22:37, 38) Balongi bakadi baleje mudibu basue kuenzela Yehowa mudimu.

2. Nuikale ne dimanya dia Dîyi dia Nzambi. Kamelu kadi kalamina bidishi bia mubidi mu mafuta a mu katontomena kaku. Nansha nanku, kakena kalekela bua kudia ne kashala keyemena anu bintu bidiku kadibutshile to. Bia muomumue bua bamisionere, kabena ne bua kueyemena anu malu avuabu balonge pavuabu mu kalasa ka Gilada to, kadi badi ne bua kutungunuka ne kulonga Bible bua kuikala bashindame mu nyuma.

3. Kunanga bantu. (Matayo 22:39) Balongi badi bumvuila bantu luse.

4. Kuikala ne meji a kudifila ku budisuile. (Musambu 110:3) Padi bukole bua misionere bujika, Yehowa udi mupesha bukuabu bua bungi.​—Yeshaya 40:29.

5. Bukole bua mu bunsonga. Amu bu mutu kamelu kambula bujitu kenda nabu mu tshipela,  misionere pende neambule bujitu bua bena Kristo nende badi ne lutatu mu mudimu wa Yehowa. Mudimu eu udi ulomba bukole bua bungi, kadi bamisionere badi ne bukole bua mu bunsonga buabu.

Miyuki mikuabu ya dituku adi

Muanetu Michael Burnett udi mulongeshi wa Gilada, wakamba ne: Bimuma bia Amande bivua mu bintu bimpe bivua Yakoba mutumine mukalenge wa mu Ejipitu. (Genese 43:11) Amande idi ne bidishi bimpe bia mubidi mu kazubu kakese. Mu ngumvuilu wa mu tshimfuanyi, balongi mbadie Amande ya mu nyuma pavuabu balonga. Munkatshi mua malongesha a mushinga avuabu bapete mudi dianyisha bua bionso bidi Yehowa utupesha ne kulonga mua kunanga muaba udibu babatuma.

Mark Noumair udi pende mulongeshi, wakumvuija ne: Dîyi dia Nzambi didi anu bu mufuku wa “meji.” (Yobo 28:18) Tudi ne bua kukangula mufuku au ne kuenza mudimu ne bidimu. Bikala mudimu wenu wa bumisionere kauyi bu munuvua nuwelela meji, nudi mua kuela meji ku nsombelu wa mupostolo Paulo. Bayidi ba Yezu bakamutuma kuabu, ne yeye kushindamenaku bua bidimu 9 pavuaye wenza mudimu. Pamutu pa kuela meji ne: bu mudiye ‘lupanza lusungula’ udi ne bua kuyisha munga muaba, Paulo wakenza mudimu muaba wonso uvuaye usanganyibua. (Bienzedi 9:15, 28-30) Kutumikila malu adi Yehowa utusunguila kudi mua kututatshisha. Mukuabu muntu wakitaba tshivua Yehowa musungule n’Yonatane. Bu muvuaye mumanye ne: Yehowa mmusungule Davidi, ke bualu kayi wakatua ku tshiende.

Mu muyuki mukuabu uvua wamba ne: “Basadidi ba Nzambi badi bakula ne dikima,” balongi bavua benza manaya a muvua malu menzeke dîba divuabu bayisha. Ba bungi ba kudibu bakatuadija kulongesha bantu Bible. Muyuki wakalonda uvua wamba ne: “Bakaja kudi bulongolodi bua Yehowa,” uvua muimanyine pa diela bamisionere 3 ba matuku a bungi nkonko. Yonso wa kudibu wakumvuija muvuaye mulonge bua kuenza mudimu pamue ne bulongolodi bua Nzambi.

“Ikala misionere wa disanka”

Muanetu Gerrit Lösch, (wa mu Kasumbu Kaludiki), wakenza muyuki wa nshindamenu wa dituku adi uvua wamba ne: “Ikala misionere wa disanka.” Uvua muleje ne: midimu ya bungi idi bantu bangata bu bilele kayena ilua ne disanka dia bushuwa to. (Nsumuinu 14:13; Muambi 2:10, 11) Kadi disanka dia kashidi didi difumina ku dienza dia disua dia Nzambi nansha mutubi kabiyi bipepele misangu yonso. Kulonga kalasa ka Gilada mmudimu mukole kadi udi upetesha disanka dia bungi.

Kudi malu a bungi adi apetesha bena Kristo balelela disanka. Badi batendelela Nzambi wa disanka. (Musambu 33:12; 1 Timote 1:11) Badi mu mparadizu wa mu nyuma ne Bible udi ulaya ne: mu matuku makese emu nebabuele mu mparadizu. Muoyo wabu udi ne tshipatshila tshia kuenzela Yehowa mudimu ne kumutumbisha. Kapita apu, Yehowa ne Yezu mbabanange.

Wakamba kabidi ne: “Wewe mmulonge bua kusanka ne biudi nabi, newikale misionere wa disanka.” Kunanga bakuabu ne kudingisha kudibu mbualu bukuabu budi mua kufikisha muntu ku dikala ne disanka. Nunku nulengulule ntupakanyi ya bakuabu pamutu pa kuyasa ku tshituta. Nuenzele bantu bakuabu bimpe, nuambuluishe badi batekete ne nulondelangane malu adi akolesha. (Musambu 41:1, 2; Bienzedi 20:35) Disanka didi dilua kabidi padi muntu udifila bikole mu kuyisha.​—Luka 11:28.

 Muanetu Lösch wakajikija ne: “Nuye kumpala bu munudi bamisionere ba disanka, bikale ne nkatshinkatshi mu diela bilele kadi eku badifile mu disadila Yehowa Nzambi wa disanka ne nusankisha bantu bakuabu.”

Kunyima kua muanetu Anthony Morris mumane kuela balongi mioyo ya mu matunga a bungi, wakabapesha mapoloma abu. Pashishe, mulongi umue kubalaye mukanda wa kuela nawu Kasumbu Kaludiki tusakidila mu dîna dia balongi bonso ba kalasa ka 126. Mu mukanda amu balongi bavua baleje dianyisha bua dibuela diabu mu Kalasa ka Gilada.

Bua kujikija, mulombodi wakamona ne: mushindu udi “manungu ne mijilu” bilamakaja mubidi mmufuanangane ne mushindu udi “mupika wa lulamatu ne wa budimu” mulongolole malu bua kuenzekawu bua kudisha bantu ba Yehowa. (Kolosai 2:18, 19; Matayo 24:45) Bikala balongi ba Gilada aba mua kuenza mudimu bimpe ku bulombodi bua bantu badibu bateke kudi Nzambi, nebakokeshe bua kukumbaja mudimu wabu bimpe.​—2 Timote 4:5.

[Kazubu mu dibeji 31]

MALU ADI ATANGILA BALONGI

Bungi bua matunga adibu bafumine: 6

Bungi bua matunga adibu babatume: 22

Bungi bua balongi: 56

Bungi bua bena dibaka: 28

Muayene wa bidimu: 32,8

Muayene wa bidimu mu bulelela: 17,9

Muayene wa bidimu mu mudimu wa bumpanda-njila: 13,5

MATUNGA ADIBU BATUME BALONGI

Balongi aba nebikale ne bua kuya kuenza mudimu mu matunga adi alonda aa: Afrique du Sud, Bénin, Bolivie, Bulgarie, Burkina Faso, Cameroun, Costa Rica, Ghana, Guatémala, Honduras, Kenya, Libéria, Madagascar, Mozambique, Nicaragua, Ouganda, Panama, Paraguay, Pérou, Roumanie, Sierra Leone ne Togo.

[Tshimfuanyi mu dibeji 32]

Njikijilu wa Kalasa ka Gilada ka 126

Mbabale milongo kutuadijila kumpala kuya panyima, ne mbafunde mêna kutuadijila ku dia bakaji kuya ku dia balume mu mulongo wonso.

1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. 2) Manzanares, A.; Bouvier, E.; Peddle, J.; Mason, H.; Braz, J. 3) Lee, J.; Forte, A.; Boucher, T.; Marsh, A.; Leighton, S.; Glover, M. 4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. 5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. 6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. 7) Boucher, M.; Coil, K.; Marsh, C.; Guzmán, J.; Jones, W.; Kambach, J. 8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. 9) Braz, D.; Van Campen, D.; Morales, A.; De Simone, M.; Becker, M.; Peddle, D.