Mmisangu bungi kayi iukadi mudiambile mêyi aa anyi muambila bantu bakuabu pauvua mubulule tshiena-bualu tshipitshipia tshia mu tshibejibeji etshi? Bimfuanyi bimpe ne foto bidi bilengeja bimpe mbienza bua tshipatshila kampanda. Mbintu bidi bilongesha bidi bituambuluisha bua kuela meji ne kumvua malu bimpe. Bidi mua kutuambuluisha nangananga patudi tulongolola dilonga dia Tshibumba tshia Nsentedi anyi tuandamuna.

Tshilejilu, bidi bituambuluisha bua kumanya bua tshinyi mbasungule tshimfuanyi kampanda ku ntuadijilu kua tshiena-bualu ne tshiena-bualu tshionso tshia kulonga. Tshidi tshileja tshinyi? Mmunyi muditshi tshipetangana ne tshiena-bualu anyi ne mvese wa nshindamenu? Ku diambuluisha dia tshimfuanyi etshi ne dia bimfuanyi bikuabu, ela meji bua mudibi bipetangana ne tubiena-bualu tudibu bakonkonona ne mudibi bipetangana ne nsombelu webe.

Mulombodi wa Tshibumba tshia Nsentedi neambile bantu bua kumvuija tshimfuanyi tshionso, bua kuleja muditshi tshipetangana ne dilongesha anyi bua kuleja muditshi tshibatangila. Imue misangu, kutu mêyi adi alamakaja tshimfuanyi ne tshikoso kampanda. Misangu mikuabu, mulombodi udi mua kusungula tshikoso tshidi mua kuikala tshiakanyine bua kukonkonona tshimfuanyi ne tshimfuanyi tshionso. Mu mushindu eu, nebiambuluishe bantu bonso bua kumvua bimpe malu avuabu balongolole bua kuambuluisha mubadi bua kumvua malongesha adi mu Dîyi dia Nzambi.

Muanetu wa balume kampanda udi wamba ne: “Pantu mbala tshiena-bualu kampanda tshimpe, bimfuanyi bitu bitshilengeja.”