Udi muvuluke anyi?
Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:
Mmushindu kayi utudi mua kujima mudilu udi kubenga kulama ludimi mua kutemesha?
Tudi ne bua kukonkonona mutshima wetu. Pamutu pa kuakula bibi bua muanetu kampanda, tudi ne bua kukonkonona tshidi tshitusaka bua kuikala ne lungenyi lua mushindu eu. Tudiku mua kuakula bibi bua muanetu, bua bantu bamubipishe ne batumone tuetu bu bantu bimpe anyi? Kuakula bibi kudi kabidi mua kunyanga malu bikole.—15/8, dibeji dia 21.
Mmushindu kayi utu Nzambi ubuikidila bantu badi banyingalala mibi yabu ne uyipua muoyo?
Yehowa udi wamba bua bantu badiye wanyisha ne: ‘Tshiena mvuluka malu mabi abu kabidi.’ (Yel. 31:34) Yehowa udi mua kubuikidila bantu mibi ku diambuluisha dia mulambu udi upikula. Padi Nzambi wenza nunku, udi uyipua muoyo mu mushindu wa ne: kakuvuluka kabidi mibi ayi bua kunyoka bantu bavua beyenze to.—1/10, dibeji dia 32.
Mmalu kayi ikala mua kuenzeka kumpala kua dituku dia Yehowa kulua?
Nebele lubila lua ne: “Ditalala, ne kakuena bualu bua kutshina!” Matunga nealuishe Babilone munene ne neamubutule. Nebele bantu ba Nzambi mvita. Mvita ya Armagedone neyenzeke ne pashishe nebele Satana ne bademon bende mu tshina tshidi katshiyi ne ndekelu.—15/9, dibeji 4.
Kubenga kumanya dituku dialua nshikidilu kudi kutuambuluisha mushindu kayi?
Kubenga kumanya dituku ne dîba dijalame kudi kutuambuluisha bua kuleja malu adi mu muoyo wetu. Kudi kutupetesha mpunga wa kusankisha mutshima wa Nzambi. Kudi kutusaka bua kudipangisha amue malu ne kutuambuluisha bua kueyemena Nzambi ne Dîyi diende ne muoyo mujima. Kudi kabidi kuenza bua ntatu itudi tupeta lelu ituambuluishe bua kuindila dituku adi.—15/9, dibeji dia 24-25.
Mmunyi mumbusha Nzambi malu mabi adi makenga makebele bantu?
Mu katupa kîpi emu, Nzambi neajadike bulongolodi bupiabupia muikalabu mua kusomba anu kudi bantu bavua banange bantu nabu ne Nzambi. (2 Pet. 3:13) Bu muikala Yezu Mukalenge wa Bukalenge bua Nzambi, neumbushe malu mabi onso. (Yesh. 33:24; Buak. 21:4)—1/10, dibeji dia 7.
“Mitoto muanda mutekete” idi mu tshianza tshia balume tshia Yezu idibu batele mu Buakabuluibua 1:16, 20 idi ileja banganyi?
Idi ileja bakulu bela manyi badi mu bisumbu ne mu tshibunyi idi ileja bakulu bonso.—15/10, dibeji dia 14.
Ngimue mvese kayi ya mu Bible idi mua kutuambuluisha bua kumanya lungenyi lua Nzambi mu tshilumbu tshia dinua makanya?
Nzambi mmusue bua tuangate muoyo ne mushinga. (Dut. 5:17) Mmutekemene bua tumunange ne tunange bantu netu. (Mâko 12:28-31) Mmusue bua tuepuke bikadilu bibi. (2 Kol. 7:1)—1/10, dibeji dia 15.
Mmunyi muvua Yezu muleje budipuekeshi bua buena budibu bakuile mu Yeshaya 50:4, 5?
Mvese eyi idi ileja muvua eu udi ne “ludimu lua badi bayila” kayi ne bua ‘kukoma nyima.’ Yezu wakaleja budipuekeshi pavuaye uteleja bimpe malu avua Tatuende umulongesha. Yezu uvua ujinga ne muoyo mujima ne musue bua Yehowa amulongeshe, uvua utangila ne ntema yonso muvua Nzambi uleja bantu bena mibi budipuekeshi ne luse.—15/11, dibeji dia 11.
Tuetu bikale ne bulenga, budi mua kutuambuluisha mushindu kayi?
Tuetu tuleja bantu netu bulenga, tudi tumanya Nzambi bimpe ne bidi bitupesha disanka. (1 Yone 4:7; Mat. 5:7, 8) Yehowa udi kabidi wangata ne mushinga mushindu utudi tuleja bantu bakuabu bulenga. (Nsu. 19:17)—1/10, dibeji dia 20.
