Mushindu utu bena mu Kasumbu Kaludiki benza mudimu

KASUMBU kaludiki ka Bantemu ba Yehowa nkenza ne bena Kristo bela manyi badi badifile bua kuenzela Nzambi mudimu. Badi baleja mpala wa bena mu kasumbu ka mupika wa lulamatu ne wa budimu badi ne mudimu wa kufila malongesha a mu Bible adi bu biakudia ne kulombola mudimu wa buambi pa buloba bujima.​—Mat. 24:14, 45-47.

Bena mu Kasumbu Kaludiki batu badisangisha ku lumingu luonso, nangananga mu Disatu. Bisangilu ebi bidi bibambuluisha bua kuenza mudimu mu buobumue. (Mus. 133:1) Bena mu kasumbu aka batu kabidi benza mudimu mu tusumbu tukuabu. Kasumbu ne kasumbu kadi katangila malu kampanda adi ambuluisha mu mudimu wa kuyisha lumu luimpe bu mudibi bileja kuinshi eku.

▪ KASUMBU KA BALOMBODI: Kasumbu aka nkenza ne bantu badi balombola tusumbu tuonso tudi mu Kasumbu Kaludiki; kadi kabidi ne mufundi udi pende wa mu Kasumbu Kaludiki. Kasumbu ka balombodi kadi katangila bua tusumbu tuonso tuenza mudimu mudibi bikengela. Kadi kabidi kakeba tshia kuenza padi ntatu ikuata Bantemu ba Yehowa pa buloba bujima anyi padibu babakengesha peshi padi malu makuabu abatulukila.

▪ KASUMBU KADI KATANGILA BENA KU BETELE: Mudimu wa bana betu badi mu kasumbu aka ngua kulongolola malu adi akengela bua kuambuluisha bena mu mêku a Betele ya pa buloba bujima bua bikale ne makanda a mubidi ne bakole mu ditabuja. Koku kasumbu aka ke kadi kasungula ne kabikila bantu ku Betele ne katangila midimu ikalabu ne bua kuenza.

▪ KASUMBU KADI KATANGILA DIPATULA DIA MIKANDA: Kasumbu aka kadi katangila mudimu wa kupatula mikanda ne kuyituma miaba mishilangane. Kadi katangila bintu bionso bidi Bantemu ba Yehowa benza nabi mudimu. Koku ke kadi katangila mushindu udibu bakuata mudimu ne makuta adibu bafila bua mudimu wa Bukalenge pa buloba bujima.

▪ KASUMBU KADI KATANGILA MUDIMU: Bena mu kasumbu aka badi batangila mudimu wa kuyisha ne malu a mu bisumbu, a bampanda-njila, a bakulu ne bantangidi bena ngendu. Kadi kalongolola malu adi ne bua kupatuka mu Mudimu wetu wa Bukalenge ne katu kabikila balongi ba mu kalasa ka Gilada ne ba mu ka dilongesha mudimu ne pashishe kabatuma miaba idibu ne bua kuenzela mudimu.

▪ KASUMBU KADI KATANGILA DILONGESHA: Kasumbu aka kadi katangila malu atudi tulonga mu mpuilu, mu mpungilu ne mu bisangilu bia tshisumbu. Koku ke katu kalongolola malu adi bena mu mêku a Betele balonga ne malu a tulasa tushilangane bu mudi ka Gilada, ka bampanda-njila ne malu a dikuata bande ne dipatula dia video.

▪ KASUMBU KADI KATANGILA DIFUNDA: Kasumbu aka kadi ne mudimu wa kulombola difunda dia malongesha etu mu mikanda ne kuyabanyina bana betu ne bantu bakuabu. Bena mu kasumbu aka ke badi bandamuna nkonko ya malu a mu Bible ne balongolola drama ne miyuki. Badi kabidi balombola mudimu wa dikudimuna mikanda pa buloba bujima.

Mupostolo Paulo wakafuanyikija tshisumbu tshia bena Kristo bela manyi ne mubidi wa muntu ne wakaleja mudi bena mu tshisumbu bonso bikale ne mushinga. Wakaleja kabidi mudibu ne bua kukuatshishangana, kunangangana ne kuenza mudimu udi Nzambi mubapeshe pamue. (Lomo 12:4, 5; 1 Kol. 12:12-31) Yezu Kristo udi mutu wa tshisumbu, udi upesha benamu bintu bidi bikengela bua kulongolola mudimu ne kuwenza mu buobumue ne kulonga malu a mu Bible. (Ef. 4:15, 16; Kolos. 2:19) Mushindu eu ke udi Yehowa ulombola bena mu Kasumbu Kaludiki bua kuenza mudimu ne nyuma wende.