Tudi ne bua kutshina dilua dia Kristo anyi?

MMUNYI muudi umona dilua dia Yezu Kristo? Utu udimona bu bualu buatuadila bantu kabutu, dikenga anyi dinyoka anyi? Peshi udi muditekemene bua dijikije ntatu yonso itudi nayi? Tudi ne bua kutshina dilua dia Kristo anyi? Peshi tudi ne bua kuikala baditekemene?

Bible udi wamba bua dilua dia Kristo ne: ‘Tangilayi, yeye udi ulua ne matutu; ne dîsu dionso nedimumone, ne bisamba bionso bia pa buloba nebidile muadi bua bualu buende.’ (Buakabuluibua 1:7) Dilua edi didi ditangila dimueneka dia Yezu mu matuku atshilualua bua kufuta bantu bakane ne kunyoka bantu babi.

Mupostolo Yone uvua yeye mutekemene dilua dia Kristo pamutu pa kuditshina. Kunyima kua Yone mumane kupeta tshikena kumona tshia dilua edi ne malu ikaladi mua kuenza pa buloba, wakasambila ne muoyo mujima ne: ‘Lua, Mukalenge Yezu.’ (Buakabuluibua 22:20) Kadi bua tshinyi ‘bisamba bionso bia pa buloba bidi bidila muadi bua bualu buende’? Mmushindu kayi wikala ‘dîsu dionso’ mua kumumona? Dilua dia Kristo nedikumbaje malu kayi? Mmunyi mudi ditekemena dia dilua edi mua kutuambuluisha lelu? Tshiena-bualu tshidi tshilonda netshiandamune nkonko eyi.