1. Mmushindu kayi uvua Paulo mudimuije bena Kristo bela manyi?

MUPOSTOLO Paulo wakadimuija bena Kristo ba mu bidimu lukama bia kumpala wamba ne: “Lekelayi kuikala nufumbibua kudi ndongoluelu wa malu eu.” (Lomo 12:2) Bena Kristo balume ne bakaji aba bakavua badilambule kudi Nzambi ne bedibue manyi a nyuma muimpe. Kadi bua tshinyi uvua mubadimuije mushindu eu?​—Lomo 1:7.

2-3. Mmunyi mudi Satana uteta bua kutumbusha kudi Yehowa? Kadi mmunyi mutudi mua kujomona malu mabi akadi ‘mele miji bikole menemene’ munda muetu?

² Bivua bitatshisha Paulo mu meji bualu ngenyi mibi ya mu ndongoluelu wa Satana ikavua inyanga bena Kristo bakuabu. (Ef. 4:17-19) Bualu ebu budi mua kufikila yonso wa kutudi. Bu mudi Satana, nzambi wa ndongoluelu wa malu eu, ukeba ne muende muonso bua kutumbusha kudi Yehowa, udi ututeta ne mayele mashilashilangane. Tshilejilu, udi mua kubuelela pa dijinga ditudi mua kuikala nadi dia kulua bantu banene anyi dia kuenda lumu. Mushindu udibu batukoleshe, bilele bia kuetu, ne tulasa tutudi balonge, mmalu adiye kabidi mua kutufikisha nawu ku diela meji mudiye musue.

³ Kudiku mushindu wa kujomona malu akadi ‘mele miji bikole menemene’ mu lungenyi luetu anyi? (2 Kol. 10:4) Paulo udi wandamuna ne: “Tudi tutonkola ngelelu ya meji ne tshintu tshionso  tshitumbuke tshidibu bajula bua kuluisha dimanya dia Nzambi, ne tudi tukuata meji onso bua atumikile Kristo.” (2 Kol. 10:5) Eyowa, Yehowa udi mua kutuambuluisha bua kumbusha meji mabi atudi mua kuikala nawu. Anu mudi kunua bintu kampanda mua kutekesha lulengu lua mulungu, Dîyi dia Nzambi didi mua kutuambuluisha bua kutekesha lulengu ludi nalu ngelelu wa meji mubi wa bena panu.

4. Mmalu kayi avua ba bungi ba kutudi ne bua kushintulula pavuabu bitabe bulelela?

⁴ Anji vuluka malu auvua ne bua kushintulula pauvua muitabe bulelela ne muangate dipangadika dia kuenzela Yehowa mudimu. Bua ba bungi ba kutudi, bivua bikengela kulekela malu mabi. (1 Kol. 6:9-11) Tudi ne dianyisha dia bungi kudi Yehowa bua muvuaye mutuambuluishe bua kulekela malu mabi au!

5. Mmalu kayi abidi adi mu Lomo 12:2 atudi ne bua kuenza?

⁵ Kadi katuedi meji ne: nkujike to. Nansha mutuvua balekele kuenza mpekatu ituvua tuenza kumpala kua kubatijibua, tudi ne bua kutungunuka ne kudienzeja bua kuepuka tshintu kayi tshionso tshidi mua kutupingaja ku malu mabi au. Tshia kuenza ntshinyi? Paulo udi wamba ne: “Lekelayi kuikala nufumbibua kudi ndongoluelu wa malu eu, kadi nushintuluke pa kukudimuna meji enu.” (Lomo 12:2) Nunku tudi ne bua kuenza malu abidi. Bua kumpala, tudi ne bua ‘kulekela kuikala kufumbibua’ kudi bena panu anyi katuyi tubalekela batunyanga. Buibidi, tudi ne bua ‘kushintuluka’ pa kukudimuna meji etu.

6. Mêyi a Yezu adi mu Matayi 12:43-45 adi atuleja bualu kayi bua mushinga?

⁶ Paulo kavua wakula bua dishintuluka dia pamutu pamutu to. Uvua wakula bua dishintuluka dia tshitudi menemene munda muetu. (Tangila kazubu ka “ Udi mushintuluke anyi udi mudivuije bu muntu mukuabu?”) Tudi ne bua kukudimuna meji etu, mbuena kuamba ne: mushindu utudi tuela meji, utudi tudiumvua, ne majinga etu. Nunku tuetu bonso tudi ne bua kudiebeja ne: ‘Mashintuluka andi ngenza bua kuidikija Kristo nga  pamutu pamutu anyi? Peshi ndi ngenda nshintulula muoyo wanyi ne meji anyi menemene?’ Yezu wakaleja mu Matayi 12:43-45 tshidi tshikengela kuenza. (Bala.) Mêyi a Yezu aa adi aleja bualu bua mushinga ebu: Kabiena bikengela anu kumbusha ngenyi mibi to; mbimpe kupingaja meji a kudi Nzambi pa muaba wayi.

7. Mmunyi mutudi mua kushintulula tshitudi munda?

⁷ Kudiku mushindu wa kushintulula tshitudi munda muetu menemene anyi? Dîyi dia Nzambi didi diamba ne: “Nudi ne bua kutungunuka ne kuvuijibua bapiabapia mu ngelelu wa meji udi ulombola meji enu, ne nudi ne bua kuvuala bumuntu bupiabupia buvua bufukibue bilondeshile disua dia Nzambi mu buakane ne lulamatu bia bushuwa.” (Ef. 4:23, 24) Eyowa, kudi mushindu wa kushintulula tshitudi munda muetu, kadi ki mbipepele to. Katuena anu ne bua kukandamena majinga mabi ne kulekela malu mabi to. Tudi ne bua kushintulula “ngelelu wa meji udi ulombola meji” etu. Bidi bilomba kushintulula majinga etu, bikadilu bietu, ne malu adi atusaka bua kuenza malu kampanda. Dishintuluka edi kadiena ne ndekelu to.

8-9. Mmushindu kayi udi bualu buvua buenzekele muanetu kampanda buleja mushinga wa kushintulula tshitudi munda muetu?

⁸ Tuangate tshilejilu tshia muanetu wa balume kampanda uvua ne tshikisu kumpala. Uvua kanuayi ne munange kuluangana bikole. Kadi wakalekela malu mabi aa, kufikaye ne ku dibatijibua, biobi kufila bumanyishi buimpe muaba uvuaye musombele. Kadi dilolo kampanda panshi pamane kufiika, matuku makese yeye mumane kubatijibua, wakapeta diteta divuaye kayi mutekemene. Tatu mukuabu uvua mukuatshike wakalua kumuluisha kuende. Muanetu eu wakanji kubenga kuluangana. Kadi pavua tatu au muakule bibi bua Yehowa, wakumvua tshiji tshikole, kupangaye mua kudikanda, yeye kututa tatu au. Bua tshinyi uvua muenze nanku? Nansha muvua dilonga diende dia Bible dimuambuluishe bua kukandamena dijinga diende dia kuluangana, kavua muanji kushintulula ngelelu wa meji uvua ulombola meji ende to. Mu mêyi makuabu, kavua muanji kushintulula tshivuaye munda menemene to.

⁹ Kadi muanetu eu kakatshioka to. (Nsu. 24:16) Bakulu bakamuambuluisha, kutungunukaye ne kuya kumpala, ndekelu wa bionso kuluaye mukulu. Pashishe dilolo kampanda, ku Nzubu wa Bukalenge, wakapeta diteta dia muomumue ne divuaye mupete bidimu bia bungi kumpala. Tatu mukuabu uvua mukuatshike uvua ukeba kututa mukulu nende mukuabu. Muanetu eu wakenza tshinyi? Wakayukila ne tatu au ne dîyi dimpe ne kanemu konso, kumueleshishaye meji, kumutuyishaye tshilunji, ne kumuambuluishaye bua apingane kuende. Bua tshinyi muanetu eu kavua mufiike munda musangu eu? Ukavua mushintulule ngelelu wa meji uvua ulombola meji ende. Ukavua mushintulule tshivuaye munda menemene, mulue muntu wa ditalala, muena budipuekeshi; ne bualu ebu buakatumbishisha Yehowa!

10. Ntshinyi tshitudi ne bua kuenza bua kushintulula tshitudi munda?

¹⁰ Mashintuluka aa kaatu enzeka dimue dimue, anyi kaatu adiluila to. Bidi mua kutulomba bua ‘kudienzeja ne muoyo umue’ munkatshi mua bidimu bia bungi. (2 Pet. 1:5) Kaena enzeka anu bualu tukadi benzele Yehowa mudimu bidimu bia bungi to. Tudi ne bua kudienzeja bikole bua kushintulula tshitudi munda. Kudi malu manene adi mua kutuambuluisha bua kushintuluka. Tukonkonone amue a kudiwu.

11. Mmushindu kayi udi disambila dituambuluisha bua kushintulula ngelelu wa meji udi ulombola meji etu?

¹¹ Bualu bunene bua kumpala butudi ne bua kuenza nkusambila. Mbimpe tuikale tusambila  anu muvua mufundi wa misambu musambile ne: “Fuka muoyo mukezuke munda muanyi, Nzambi wanyi, teka nyuma mupiamupia munda muanyi, eu udi mushindame.” (Mis. 51:10) Tudi ne bua kuanji kuitaba ne: bidi bikengela kushintulula ngelelu wa meji udi ulombola meji etu, pashishe kusambila Yehowa bua atuambuluishe. Ntshinyi tshidi tshitujadikila ne: Yehowa neatuambuluishe bua kushintuluka? Bualu buvuaye mulaye bena Isalele ba mu matuku a Yehezekele bavua ne mutu mukole budi mua kutukolesha ku muoyo. Wakamba ne: “Meme nembapeshe muoyo mujima, ne nengele nyuma mupiamupia munda muabu . . . ne nembapeshe muoyo wa musunyi, [mmumue ne: udi witaba buludiki bua Nzambi].” (Yeh. 11:19; dim.) Yehowa uvua ne muoyo wa kuambuluisha bena Isalele abu bua bashintuluke, ne udi ne muoyo wa kutuambuluisha petu.

12-13. (a) Bilondeshile Misambu 119:59, tudi ne bua kuelangana meji a tshinyi? (b) Nnkonko kayi iudi ne bua kudiela?

¹² Bualu bunene buibidi butudi ne bua kuenza nkuelangana meji. Patudi tubala Bible dituku dionso ne lubatshi, tudi ne bua kuangata dîba dia kuelangana meji a ngenyi ne malu atudi ne bua kushintulula. (Bala Misambu 119:59; Eb. 4:12; Yak. 1:25) Tudi ne bua kujingulula meji onso atudi mua kuikala nawu adi ngenyi ya bena panu minyange. Bidi bikengela tuitabe butekete butudi nabu ne pashishe tudienzeje bikole bua kubujikija.

¹³ Tshilejilu, diebeja ne: ‘Ntu ne dialakana nansha dikese peshi mukawu anyi?’ (1 Pet. 2:1) ‘Ntu nditambisha bua muaba undi mukolele, bua tulasa tundi mulonge, peshi bua makuta andi nawu anyi?’ (Nsu. 16:5) ‘Ntu mpepeja bantu badi kabayi ne bintu bu bianyi anyi? Ntu mpepeja bantu ba bisamba bikuabu anyi?’ (Yak. 2:2-4) ‘Ntu munange bintu bia mu bulongolodi bua Satana bikole anyi?’ (1 Yone 2:15-17) ‘Ntu munange dijikija lutetuku didi ne malu a masandi ne a tshikisu anyi?’ (Mis. 97:10; 101:3; Amo. 5:15) Mushindu uwandamuna nkonko eyi udi mua kukuleja malu audi ne bua kudienzeja bua kushintulula. Tuetu bafike ku dishintulula meji adi mua kuikala ‘mele miji bikole menemene’ mu muoyo wetu, netusankishe Tatu wetu wa mu diulu.​—Mis. 19:14.

14. Bua tshinyi kusungula balunda bimpe kudi ne mushinga wa bungi?

¹⁴ Bualu bunene buisatu butudi ne bua kuenza nkusungula balunda bimpe. Nansha basue anyi katuyi basue, balunda betu badi mua kuenza bua tulue bantu bimpe anyi bantu babi. (Nsu. 13:20) Patudi ku mudimu anyi mu tulasa, tudi mua kuikala munkatshi mua bantu badi kabayi mua kutuambuluisha bua kuikala ne meji a Nzambi. Kadi tudi mua kupeta balunda bimpe menemene mu bisangilu bietu bia bena Kristo. Muomu emu ke mudibu mua kutukankamija anyi kutusonsola bua kutufikisha “ku dinanga ne ku bienzedi bimpe.”​—Eb. 10:24, 25, dim.

15-16. Leja mudi Satana ukeba kunyanga meji etu.

¹⁵ Kadi katupu muoyo ne: Satana mmudisuike bua kunyanga lungenyi luetu to. Mmumanye ne: bulelela bua mu Dîyi dia Nzambi budi butuambuluisha bua kuikala ne ngelelu wa meji muimpe. Ke bualu udi ukeba kushintulula ngelelu wetu wa meji ne kutushiya mu dielakana ku diambuluisha dia ngelelu ya meji mishilashilangane.

¹⁶ Satana utshidi anu wela lukonko lua buena luvuaye muele Eva mu budimi bua Edene lua ne: “Nzambi uvua muambe bulelela ne: . . . ?” (Gen. 3:1) Mu buloba budi ku bukokeshi bua Satana ebu, bantu batu batamba kutuela nkonko idi mua kutupetesha dielakana bu mudi: ‘Mu bulelela, Nzambi mmubenge disangila dia bantu ba mubidi umue peshi disela bakaji ba bungi anyi? Mu bulelela, Nzambi ki mmusue nuenze difesto dia Nowele, dia bunane, peshi dia mifikilu ya diledibua  anyi? Mu bulelela, Nzambi webe mmusue ne: ubenge bua kabakuedi mashi anyi? Mu bulelela, Nzambi wetu wa dinanga eu udi mua kukulomba bua kubenga kulamakanangana ne balunda anyi ne balela bebe badibu bipate mu tshisumbu anyi?’

17. Ntshinyi tshitudi mua kuenza padibu batuela nkonko idi ijula dielakana bua malu atudi tuitabuja? Bilondeshile Kolosayi 2:6, 7, tuetu benze nanku, netuikale mushindu kayi?

¹⁷ Bidi bikengela tuikale batuishibue bua malu atudi tuitabuja. Tuetu katuyi bakebe mandamuna a nkonko minene idi itangila malu atudi tuitabuja, tudi mua kupeta dielakana dia bungi. Dielakana edi didi mua kulua kunyanga meji etu ne kutekesha ditabuja dietu. Nunku tshia kuenza ntshinyi? Dîyi dia Nzambi didi ditulomba bua kushintulula meji etu bua tudijadikile tuetu nkayetu “disua dia Nzambi didi dimpe, didi dianyishibue ne didi dipuangane.” (Lomo 12:2) Tuetu ne tshibidilu tshia kudilongela, tudi mua kudijadikila ne: malu atudi balonge mu Bible mmalelela. Netutuishibue kabidi menemene ne: mikenji ya Yehowa mmimpe. Dîba adi, anu bu mutshi udi ne miji mikole, netuele miji bikole, tushala “bajalame mu ditabuja.”​—Bala Kolosayi 2:6, 7.

18. Ntshinyi tshiatuambuluisha bua kutekesha lulengu lua meji a bena panu?

¹⁸ Kakuena muntu udi mua kukujalamija mu ditabuja to, anu wewe nkayebe. Ke bualu kayi tungunuka ne kuvuijibua mupiamupia mu ngelelu wa meji udi ulombola meji ebe. Ikala usambila bikole, ulomba Yehowa bua akuambuluishe ne nyuma wende. Ikala welangana meji bikole, utungunuka ne kukonkonona meji ebe ne malu adi akusaka bua kuenza malu kampanda. Keba balunda bimpe badi mua kukuambuluisha bua kushintulula ngelelu webe wa meji. Wewe wenza malu aa, neutekeshe lulengu lua meji a bena panu ne neufike ku ditonkola “ngelelu ya meji ne tshintu tshionso tshitumbuke tshidibu bajula bua kuluisha dimanya dia Nzambi.”​—2 Kol. 10:5.