TSHIENA-BUALU TSHIA KULONGA 41
Mua kulonga Bible ne muntu kumufikisha ne ku dibatijibua—Tshitupa 1
“Bidi bimueneka patoke munudi mukanda wa Kristo utudi tuetu bena mudimu bafunde.”—2 KOL. 3:3.
MUSAMBU WA 78 “Tudi tulongesha Dîyi dia Nzambi”
KADIOSHA *
Bena mu tshisumbu tshijima batu ne disanka diyila ne panshi patubu bamona mulongi wa Bible uvuabu bambuluishe bua kunanga Yehowa ubatijibua. (Tangila tshikoso 1)
1. Mmunyi mudi 2 Kolinto 3:1-3 utuambuluisha bua kumvua diakalenga ditudi nadi dia kulonga Bible ne bantu kubafikisha ne ku batismo? (Tangila tshimfuanyi tshia pa tshizubu.)
UTU umvua bishi pautu umona mulongi wa Bible wa mu tshisumbu tshienu ubatijibua? Utu umvua disanka dia bungi be! (Mat. 28:19) Biobi bikale ne: wewe ke uvua ulonga nende, newikale ne disanka diyila ne panshi paudi umumona ubatijibua! (1 Tes. 2:19, 20) Bayidi bapiabapia badi babatijibua badi “mikanda [mimpe] ya kudianyisha nayi,” ki nganu bua badi balonge nabu to, kadi kabidi bua tshisumbu tshijima.—Bala 2 Kolinto 3:1-3.
2. a) Ndukonko kayi lua mushinga lutudi ne bua kukonkonona? Bua tshinyi? b) Ndîba kayi diudi mua kuamba ne: ndi ne dilonga dia Bible? (Tangila dimanyisha dia kuinshi.)
2 Bidi bienza disanka bua kumona ne: padibu benze makumi bua bidimu binayi bishale ebi, bungi bua balongi ba Bible * butuvua tufila mu luapolo ngondo yonso pa buloba bujima buvua butue ku miliyo 10. Anu bua bidimu abi kabidi makumi menza adi aleja ne: bantu bapite pa binunu 280 bavua babatijibue tshidimu tshionso balue Bantemu ba Yehowa ne bayidi bapiabapia ba Yezu Kristo. Ntshinyi tshitudi mua kuenza bua kuambuluisha bantu ba bungi badi mu miliyo ne miliyo ya balongi ba Bible aba bua kubatijibua? Bu mutshidi Yehowa ne lutulu ushila bantu dîba ne mpunga bua kuluabu bayidi ba Kristo, tudi basue kuenza tshionso tshitudi mua kuenza bua kubambuluisha bua bafike ku batismo ne lukasa luonso. Dîba didi dishale ndikese menemene!—1 Kol. 7:29a; 1 Pet. 4:7.
3. Ntshinyi tshituakonkonona mu tshiena-bualu etshi bua dilombola dia malonga a Bible?
3 Bu mudi divuija bantu bayidi ne mushinga wa bungi lelu, Kasumbu kaludiki nkebeje filiale mishilashilangane tshitudi mua kuenza bua balongi betu ba Bible ba bungi bafike ku dibatijibua. Mu tshiena-bualu etshi ne mu tshialonda, netumone mudi tshilejilu tshia bana betu bapiluke aba mua kutulongesha: bampanda-njila, bamisionere, ne batangidi ba bijengu. * (Nsu. 11:14; 15:22) Biena-bualu ebi nebileje tshidi balongeshi ba Bible ne balongi babu mua kuenza bua kubotesha dilonga bua diye kumpala. Mu etshi netumone malu atanu adi mulongi yonso ne bua kuenza bua kuya anu mutangile ku batismo.
IKALAYI NULONGA LUMINGU LUONSO
Lomba mulongi ni kudi muaba unudi mua kusomba bua kutungunuka ne dilonga Bible (Tangila tshikoso 4-6)
4. Ntshinyi tshitudi ne bua kumanya bua mulongi udi musue bua bamulongeshila anu kuulu?
4 Bana betu ba bungi batu balonga Bible ne bantu ku mbanza yabu bimanyine anu kuulu. Nansha mudi kuenza nunku kuambuluisha bua kujula muntu nyota ya malu a mu Bible, dilonga dia mushindu eu ditu ditamba kuenzeka anu mu tshikoso, ne kaditu nansha dienzeka lumingu luonso to. Bua kujula muntu nyota ya bungi, bana betu bakuabu batu balomba muntu udi musue kulonga au nimero yende ya telefone ne pashishe bamubikila anyi bamufundila mesaje bua kumuambila bualu kampanda bua mu Bible kumpala kua kuluabu kabidi. Badi mua kushala bayukila nunku ngondo ne ngondo kadi kabayi bafika ku dibotesha dilonga dia Bible didi diya kumpala to. Mulongi yeye musue bua bamulongeshila anu kuulu, kayi witaba bua basombele panshi kakufika ku didilambula ne ku dibatijibua to.
5. Bilondeshile Luka 14:27-33, ntshinyi tshivua Yezu muleje tshidi mua kutuambuluisha mu mudimu wa divuija bantu bayidi?
5 Musangu mukuabu Yezu wakafila tshilejilu bua kuleja tshidi muntu ne bua kuenza yeye musue kulua muyidi wende. Wakakula bua muntu udi musue kuibaka tshibumba ne bua mukalenge udi musue kuya ku mvita. Yezu wakamba ne: muibaki wa tshibumba udi ne bua ‘kuanji kusomba, kubadika bungi bua makuta adiye ne bua kutula’ bua kumona ni udi mua kutshijikija, kuambaye kabidi ne: mukalenge udi ne bua “kuanji kusomba, kukeba lungenyi” bua kumona bikale basalayi bende mua kukumbaja tshidiye musue kuenza. (Bala Luka 14:27-33.) Bia muomumue, Yezu uvua mumanye ne: muntu udi musue kulua muyidi wende udi ne bua kukonkonona bimpe menemene tshidiye ne bua kuenza bua kumulonda. Ke bualu kayi bidi bikengela tukankamije balongi betu ba Bible bua tuikale tulonga nabu lumingu luonso. Mmunyi mutudi mua kuenza nanku?
6. Tuetu basue bua balongi betu ba Bible baye kumpala, tudi mua kuenza tshinyi?
6 Udi mua kuanji kulepesha dîba ndambu, nansha munutu nulonga bimanyine kuulu. Pamuapa udi mua kubala mvese ibidi pamutu pa kubala anu umue musangu wonso uudi ulonga nende. Padiye wibidila, umulombe ni kudi muaba unudi mua kusomba ne kutungunuka ne dilonga. Tshiakuambilaye netshikuleje bikalaye wangata dilonga dia Bible ne mushinga. Pashishe, bua kumuambuluisha bua aye kumpala lukasa, udi nansha mua kumulomba ni udi mua kuitaba bua kulonga misangu ibidi ku lumingu. Pa kumbusha dilonga musangu umue anyi ibidi ku lumingu, bidi bikengela kuenza bualu bukuabu kabidi.
IKALA WANJI UDILONGOLOLA
Ikala udilongolola bimpe kumpala kua nuenu kulonga, ne muleja mua kudilongolola (Tangila tshikoso 7-9)
7. Mmunyi mudi mulongeshi mua kudilongolola bimpe dîba dionso didiye uya kulongesha?
7 Bu muudi mulongeshi, ikala udilongolola bimpe dîba dionso diudi ujinga bua kuya kulongesha muntu Bible. Bua kudilongolola, anji bala biudi uya kumulongesha ne bala mvese. Manya malu manene adimu bimpe. Konkonona tshiena-bualu tshia dilonga, tubiena-bualu, nkonko ya binualonga, mvese idibu bafunde ne: “bala”, bimfuanyi, ne utangile filme yonso udi mua kukuambuluisha bua kumvuija tshitupa tshinudi nulonga atshi bimpe. Pashishe, dianjila kuela meji a muudi mua kulongesha mulongi webe malu au mu mushindu mupepele udi umvuika bimpe, muikale nende mu lungenyi, bua aumvue bipepele ne aatumikile.—Neh. 8:8; Nsu. 15:28a.
8. Ntshinyi tshidi mêyi a mupostolo Paulo adi mu Kolosayi 1:9, 10 atulongesha bua disambila bua balongi betu?
8 Paudi udilongolola, ikala kabidi usambila bua mulongi webe au ne bua majinga ende. Lomba Yehowa akuambuluishe bua ulongeshe malu adi afumina mu Bible mu mushindu walenga muoyo wende. (Bala Kolosayi 1:9, 10.) Dianjila kuela meji bua bualu buonso budi mua kutatshisha mulongi bua kumvua anyi kumukolela bua kuitaba. Ikala muvuluke ne: tshipatshila tshiebe ntshia kumuambuluisha bua aye mutangile ku batismo.
9. Mmunyi mudi mulongeshi mua kuambuluisha mulongi wende mua kudilongolola? Umvuija.
9 Tudi batekemene ne: mulongi yeye ulonga Bible pa tshibidilu, nebimuambuluishe bua kuleja dianyisha bua tshidi Yehowa ne Yezu benze ne neikale ne dijinga dia kulonga malu a bungi. (Mat. 5:3, 6) Bua dilonga kuambuluishadi mulongi bimpe menemene, bidi bikengela atume meji ende ku bidiye ulonga. Bua yeye kuenza nanku, mumvuija ne: bidi bikengela ikale udianjila kudilongolola kumpala kua nuenu kulua kulonga; mmumue ne: udianjila kubala binualua kulonga ne welangana meji a mudiye mua kubitumikila. Mmunyi muudi mua kuleja mulongi mua kudilongolola? Longolola nende dilonga pamue bua amone mutubu benza. * Mumvuija mudiye mua kupeta mandamuna ku nkonko ya dilonga buludiludi, ne muleje mudi kuela mishonyi anu pa miaku anyi pa biambilu binene mua kumuambuluisha bua kuvuluka mandamuna. Pashishe umuambile ikale wandamuna mu ende mêyi. Padiye wandamuna mu ende mêyi, nebikuambuluishe bua kumanya bikalaye umvua bidiye ulonga bimpe. Kudi kabidi bualu bukuabu buudi mua kukankamija mulongi webe bua kuenza.
MULONGESHA MUA KUYUKILA NE YEHOWA DITUKU DIONSO
Longesha mulongi webe wa Bible mua kuyukila ne Yehowa (Tangila tshikoso 10-11)
10. Bua tshinyi kubala Bible dituku dionso kudi ne mushinga? Bidi bikengela mulongi enze tshinyi bua dibala dia Bible dimuambuluishe bikole?
10 Pa kumbusha dilonga ne mulongeshi dituku dionso, mulongi yeye udienzela amue malu dituku dionso nebiambuluishe bikole. Bidi bikengela ikale uyukila ne Yehowa. Mushindu kayi? Mpadiye umuteleja ne umusambila. Udi uteleja Nzambi padiye ubala Bible dituku dionso. (Yosh. 1:8; Mis. 1:1-3) Muleja mua kulonda programe wa dibala dia Bible udiye mua kupatula mu dibeji udi mu site wetu wa jw.org. * Mukankamija ikale welangana meji a tshidi Bible umulongesha bua Yehowa ne mudiye mua kutumikila yeye muine bidiye ulonga abi. Wewe muenze nunku, apu dibala dia Bible nedimuambuluishe bikole.—Bien. 17:11; Yak. 1:25.
11. Mmunyi mudi mulongi mua kumanya mushindu muimpe wa kusambila? Bua tshinyi mbimpe ikale usambila Yehowa pa tshibidilu?
11 Kankamija mulongi webe bua ikale usambila Yehowa dituku dionso bua kuyukila nende. Ikala usambila ne muoyo mujima kumpala kua nuenu kutuadija kulonga ne panudi nujikija, utela mulongi webe mu disambila yeye muteleje. Padiye umvua muudi usambila, neamanye pende ne: udi ne bua kusambila ne muoyo mujima ne kusambila Yehowa mu dîna dia Yezu Kristo. (Mat. 6:9; Yone 15:16) Anji elabi meji muikala dibala Bible dituku dionso (diteleja Yehowa) ne disambila (diyukila ne Yehowa) mua kuambuluisha mulongi webe bua kusemena pabuipi menemene ne Nzambi! (Yak. 4:8) Mulongi webe yeye wenza malu aa, neapete tshintu tshikuabu tshidi mua kumufikisha ku didilambula ne ku dibatijibua.
MULEJA MUA KUDIA BULUNDA NE YEHOWA
12. Leja mudi mulongeshi mua kuambuluisha mulongi bua kudia bulunda ne Yehowa.
12 Malu adi mulongi ulonga mu dilonga dia Bible adi ne bua kulenga meji ende kulenga kabidi ne muoyo wende bua atumikile bidiye ulonga. Yezu uvua ulongesha bantu malu a bungi, ne bavua basue ikale ubalongesha. Kadi bantu bavua bamulonda bualu uvua kabidi ulenga mioyo yabu. (Luka 24:15, 27, 32) Mbimpe bua mulongi webe amone ne: Yehowa mmuntu mulelela udiye mua kudia nende bulunda ne amumone bu Tatuende, Nzambi wende, ne Mulunda wende. (Mis. 25:4, 5) Panudi nulonga, koka ntema ya mulongi ku ngikadilu mimpe ya Nzambi. (Ekes. 34:5, 6; 1 Pet. 5:6, 7) Ikala wenza nanku mu dilonga dionso dinudi nulonga nende. Muambuluisha bua ikale umona mudi Yehowa ne ngikadilu mimpe bu mudi dinanga, bulenga, ne diditeka pa muaba wa bakuabu. Yezu wakamba ne: “Mukenji mutambe bunene ne wa kumpala” ngua “kunanga Yehowa Nzambi webe.” (Mat. 22:37, 38) Ambuluisha mulongi webe bua anange Yehowa bikole.
13. Fila tshilejilu tshia mua kuambuluisha mulongi bua ende umanya ngikadilu mimpe ya Yehowa.
13 Mu miyuki iudi uyukila ne mulongi webe, ikala umuambila bua tshinyi wewe udi munange Yehowa. Bidi mua kumuambuluisha bua kumona ne: bidi bikengela adie bulunda bua nsungansunga ne Yehowa ne alonge mua kumumanya. (Mis. 73:28) Tshilejilu, mu mukanda unudi nulonga au mudiku tshiambilu kampanda anyi mvese udi wakula bua dinanga dia Yehowa, meji ende, buakane buende, anyi bukole buende udi mukulenge ku muoyo anyi? Leja mulongi webe bualu abu, ne umuambile ne: bualu abu mbumue bua ku malu adi akusaka bua kunanga Tatu webe wa mu diulu. Kudi bualu bukuabu budi bukengela bua mulongi yonso wa Bible enze bua kuyaye too ne ku batismo.
MUKANKAMIJA IKALE UBUELA MU BISANGILU
Kankamija mulongi bua ikale ubuela mu bisangilu anu panutshidi nutuadijilaku dilonga! (Tangila tshikoso 14-15)
14. Ntshinyi tshidi Ebelu 10:24, 25 utuambila bua bisangilu tshidi mua kuambuluisha mulongi bua kuya kumpala?
14 Tuetu bonso tutu basue bua balongi betu ba Bible baye too ne ku batismo. Mushindu umue muimpe wa kubambuluisha nkubakankamija bua bikale babuela mu bisangilu. Balongeshi bapiluke badi bamba ne: balongi batu batuadija kubuela mu bisangilu musangu umue batu baya kumpala lubilu lua dikema. (Mis. 111:1) Balongeshi bakuabu batu bambila balongi ne: dilonga dia Bible didi dibambuluisha bua kumanya tshitupa tshia malu atu Bible ulongesha, tshitupa tshikuabu tshidi tshishale nebatshilongele mu bisangilu. Bala Ebelu 10:24, 25 ne mulongi webe ne umuleje buimpe bua kubuela mu bisangilu. Muelela filme wa Tshitu tshienzeka ku Nzubu wa Bukalenge ntshinyi? * Umuambuluishe bua adisuike bua kuikala kubuela bisangilu bionso.
15. Ntshinyi tshitudi mua kuenza bua kukankamija mulongi bua ikale ubuela mu bisangilu pa tshibidilu?
15 Kadi ntshinyi tshiudi mua kuenza mulongi webe yeye kayi muanji kubuela mu bisangilu anyi kayi ubibuela pa tshibidilu? Muambila bualu kampanda buudi mulonge mu bisangilu matuku adi panshi aa, umuambila nabu ne disanka dionso. Ke tshidi mua kutamba kumusaka bua kuya mu bisangilu pamutu pa kumuambila anu tshianana bua aluamu. Mupesha tshiende Tshibumba tshia Nsentedi anyi mabeji a Nsombelu ne mudimu wetu wa buena Kristo binudi nuenda nulonga mu bisangilu. Muleja binualonga mu bisangilu bialonda, ne muebeja akuambile tshidi tshitamba kumusankisha. Malu amona mulongi webe padiye ubuela mu bisangilu bua musangu wa kumpala neikale mapite makuabu onso akadiye mumone mu bitendelelu bikuabu bikadiye mubuele kule ne kule. (1 Kol. 14:24, 25) Neapetanganamu ne bantu badi tshilejilu tshimpe tshidiye mua kuidikija ne bamuambuluisha bua kuya too ne ku batismo.
16. Bua wewe kufikisha mulongi uudi ulonga nende ku batismo, bidi bikengela kuenza tshinyi? Ntshinyi tshituamona mu tshiena-bualu tshidi tshilonda?
16 Mmunyi mutudi mua kulongesha bantu Bible kubafikisha too ne ku batismo? Tudi mua kuambuluisha mulongi yonso bua kikadi uteka bilele mu bualu bua dilonga to. Tudi tuenza nanku patudi tumukankamija bua ikale ulonga lumingu luonso ne udilongolola kumpala kua yeye kulonga. Tudi basue kabidi kumukankamija bua ikale uyukila ne Yehowa dituku dionso ne adie nende bulunda bua nsungansunga. Tudi basue kumujula dijinga dia kuikala kubuela mu bisangilu. (Tangila kazubu ka ne: “ Bua mulongi kuya too ne ku batismo bidi bikengela . . .”) Kadi anu mutuamona mu tshiena-bualu tshidi tshilonda, kudi malu makuabu atanu adi balongeshi ba Bible mua kuenza bua kufikisha balongi babu ku batismo.
MUSAMBU WA 76 Mmunyi muutu umvua?
^ tshik. 5 Kulongesha muntu bualu kampanda kudi kumvuija kumuleja mua kuela meji, mua kumvua, anyi mua kuenza malu mu mushindu mukuabu. Mvese wetu wa tshidimu tshia 2020 wa Matayi 28:19 udi utuvuluija ne: kulonga Bible ne bantu ne kubalongesha mua kulua bayidi ba Yezu Kristo babatijibue kudi ne mushinga. Mu tshiena-bualu etshi ne mu tshialonda, netumone mutudi mua kuenza mudimu wa mushinga mukole eu bimpe.
^ tshik. 2 DIUMVUIJA: Wewe uyukila ne muntu malu a mu Bible pa tshibidilu ne ulonga nende mukanda wetu kampanda, udi ulombola dilonga dia Bible. Wewe muleje muntu mutu dilonga dienzeka, pashishe mulonge nende misangu ibidi ne mumone ne: dilonga adi neditungunuke, udi mua kufunda dilonga dia Bible adi mu luapolo.
^ tshik. 3 Biena-bualu ebi bidi kabidi ne ngenyi ya mu biena-bualu bia mu tshitupa tshia ne: “Tulombolayi malonga a Bible mimpe” bivua bipatuka mu Mudimu wetu wa Bukalenge wa ngondo wa 7/2004 too ne ku 5/2005.
^ tshik. 9 Tangila filme wa minite inayi wa Tulongeshe balongi ba Bible mua kudilongolola. Ndaku mu JW Library®, buela mu MULTIMÉDIA > NOS RÉUNIONS ET NOTRE MINISTÈRE > DEVENONS PLUS HABILES.
^ tshik. 10 Buela mu LA BIBLE ET VOUS > OUTILS D’ÉTUDE DE LA BIBLE. (Mu Mfualansa)
^ tshik. 14 Buela mu MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
