“Yehowa wanyi, too ne dîba kayi dindi ne bua kudila ndomba diambuluisha, kadi wewe kuyi uteleja? Too ne dîba kayi dindi ne bua kulomba diambuluisha bua malu a tshikisu, kadi wewe kuyi wenza bualu?” (Habakuka 1:2, 3) Aa mmêyi a Habakuka, muntu muimpe uvua Yehowa wanyisha. Dilomba diende divuaku dileja ne: kavua ne ditabuja anyi? Nansha kakese! Nzambi wakajadikila Habakuka ne: ukavua musungule tshikondo tshivuaye ne bua kujikija makenga.​—Habakuka 2:2, 3.

Wewe ukenga anyi muntu mukuabu uudi munange ukenga, mbipepele bua kuamba ne: Nzambi udi ujanguluka ne malu, uvua ne bua kuikala ukadi mumane kujikija makenga. Kadi Bible udi utujadikila ne: “Yehowa kena ne lujoko pa bidi bitangila mulayi wende, bu mudi bamue bantu bamona bobu lujoko to, kadi udi nenu lutulu, bualu ki mmusue bua muntu nansha umue abutudibue, kadi mmusue bua bonso bafike ku dinyingalala bua mpekatu yabu.”​—2 Petelo 3:9.

Mmu katupa kîpi emu! Yezu wakaleja ne: tshipungu kampanda tshia bantu tshivua ne bua kumona malu kampanda mashilashilangane avua ne bua kuikala tshimanyinu tshia matuku a ku nshidikilu wa “ndongoluelu wa malu”. (Matayi 24:3-42) Dikumbana dia mêyi a buprofete avua Yezu muambe bua matuku etu aa didi dileja ne: Nzambi ukadi pa kuela dîyi mu malu a bantu. *

Kadi mmunyi muajikija Nzambi makenga onso? Pavua Yezu pa buloba, wakaleja bukole bua Nzambi bua kuambuluisha bantu mu makenga abu. Tukonkononayi bimue bilejilu bia bualu ebu.

Bikumina: Pavua Yezu ne bayidi bende mu buatu mu mbuu wa Galela, tshipepele tshikole tshiakajinga kuinyisha buatu buabu. Kadi Yezu wakaleja ne: yeye ne Tatuende badi ne bukole bua kutumina bintu bifuka dîyi. (Kolosayi 1:15, 16) Yezu wakamba anu ne: “Shiii! Puwa!” Ntshinyi tshiakenzeka? “Tshipepele tshiakabatama, ne ditalala dia dikema kubueladi.”​—Mâko 4:35-39.

Masama: Yezu uvua mumanyike bikole bua muvuaye wondopa mpofo, balema, bena biseki, bena nsudi, anyi bavua ne masama makuabu kayi onso. “Wakondopa bonso bavua basama.”​—Matayi 4:23, 24; 8:16; 11:2-5.

Biyole bia nzala: Yezu wakenza mudimu ne bukole buvuabu bamupeshe kudi Tatuende bua kuvudija biakudia bivua bikese. Bible udi wamba ne: pavuaye uyisha, wakadisha bantu binunu ne binunu misangu ibidi.​—Matayi 14:14-21; 15:32-38.

Lufu: Bishima bisatu bia dibisha bantu ku lufu bidibu bafunde mu Bible bivua Yezu muenze bidi bileja patoke ne: Yehowa udi ne bukole bua kumbusha lufu. Umue wa ku bantu bavuaye mubishe ku lufu uvua mufue kukavua matuku anayi.​—Mâko 5:35-42; Luka 7:11-16; Yone 11:3-44.