MUTWE WA MWANDA WA PA KIBALU | LELO TUSAKILWA LEZA?

Le I Kika Kyaipangwilwa Kino Kipangujo?

Tutanga pa tabulo wa misapu upungile bantu batunanga kwikala’ko kwa Leza amba: “Le udi biyampe pakubulwa Leza? Midiyo ne midiyo ya bantu ilañanga uno muswelo.” Balañanga’mba kebasakilwapo Leza.

Pakwabo kadi, bavule banenanga’mba bakulupile mudi Leza bakwatanga butyibi wita’mba kadi’kopo ne kudi kwine. Salvatore Fisichella, eveke mukatampe wa Katolika, wesambīle pa bantu ba kyabo kipwilo amba: “Bantu betutala dyalelo kebabwanyapo padi kuyuka’mba twi bene Kidishitu mwanda wa mwiendelejo wetu udi pamo bwa wa bantu bampikwa kwitabija.”

Bamo kebekalangapo ne na kitatyi kine kya kulangulukila padi Leza. Bamumonanga bu udi kulampe bininge nansha amba kabwanyapo kulonga kintu nansha kimo mu būmi bwabo. Bano bantu bakimbanga Leza enka mu kitatyi kya makambakano nansha kyobasakilwa kintu kampanda​—divule dine pamo bwa aye mwingidi wabo.

Bantu bakwabo kebamwenepo bufundiji bwa bipwilo na bulēme bukatampe, bakomenwa’nka kwingidija byobya bifundija kipwilo kyabo. Tulete’tu bidi kimfwa kimo, bene Katolika 76 pa katwa ba mu Alemanye betabije’mba, i biyampe ba mwana-mulume ne mwana-mukaji kushikatyila pamo kumeso kwa kwisonga​—mulangwe mwishile na bufundiji bwa kipwilo kyabo ne bwa Bible. (1 Kodinda 6:18; Bahebelu 13:4) Na bubine, ke enkapo bene Katolika bamonanga’mba bantu balamete ku kyabo kipwilo kebengidijangapo byobya byobakulupile mu būmi bwabo. Bendeji ba bipwilo bivule batompolanga’mba, bantu ba byabo bipwilo kebeshidilepo na “bantu batuna kwikala’ko kwa Leza.”

Bino bimfwa bilengejanga bantu beipangule amba: Le bine tusakilwa Leza? Kino kipangujo ke kyenipo. Kyāipangwilwe dibajinji mu mukanda mubajinji wa mu Bible. Pa kutana malondololo a kino kipangujo, tubandaulei bidi myanda mivule isambīlwe’po mu mukanda wa mu Bible wa Ngalwilo.