Itabija Kyomwene

“Muntu walakana Leza i yewa ulanga’mba kebibwanikapo kuyuka bubinebine mu myanda itala Leza ne būmi bwa kumeso ifundija Bipwilo bya Bwine Kidishitu ne bipwilo bikwabo. Nansha shi bikabwanika, ino kebibwanikapo kala ano mafuku nansha namani.”—FILOZOFE BERTRAND RUSSELL, 1953.

MWINE wāshilwile kulupula mulangwe wa “kwalakana Leza” i mwifundi wa banyema witwa dya bu Thomas Huxley. Huxley wābutwilwe mu 1825, wāikele’ko mu myaka ya ba Charles Darwin kadi wādi witabije bufundiji bwa kwalamuka kwa bintu. Mu 1863, Huxley waāndikile amba kamwenepo bukamoni nansha bumo bulombola’mba kudi Leza “wituswele ne kwituta mutyima na mulangila Bene Kidishitu.”

Dyalelo bantu bavule betabijanga milangwe ya bano bantu bankomokomo banena’mba ketubwanyapo kwitabija kintu kyoketumwenepo na meso. Babwanya kunena’mba kwitabija muntu nansha kintu kyampikwa bukamoni bulombola’mba kidi’ko i kwikala kitabija-vidingi.

Lelo Bible usaka twitabije Leza kitabijetabije? Mhm, ke amopo. Bible ulombola’mba kwitabija myanda yampikwa bukamoni kampanda i kwikala kitabija-vidingi—bine i bulembakane. Bible unena’mba: “Mwendalale witabija binenwa byonso: Ino muntu mukosoke aye utadija biyampe matabula andi.”—Nkindi 14:15.

Ino le kwitabija Leza nako le? Lelo bine kudi bukamoni bulombola’mba Leza udi’ko, nansha amba wituswele ne kwituta mutyima?

Ngikadila ya Leza I Mimweke Padi Tō

Polo mulembi wa Bible wēsambile ku meso a kibumbo kya Bene Atene bafunde amba Leza “wapangile ntanda ne byonso bidi monka.” Polo wālombola bemvwaniki bandi ba lupata amba Leza utele bantu mutyima ne amba, na bubine, “kadipo ne kulampe kwine na bātwe bonso, mhm.”—Bilongwa 17:24-27.

Mwanda waka Polo wādi ukulupile bine amba Leza udi’ko ne amba utele bantu bandi bapangile mutyima? Polo wālombwele bubinga bumo paālembēle banababo Bene Kidishitu ba mu kibundi kya Loma. Wānene pa bitala Leza amba: “Byobya byandi byampikwa kumweka, ku kupanga kwa panopantanda i bimwekelele’tu, padi tō, pa kuyūkanibwa pa bintu bipangibwe, ke bukomo bwandi bwa nyeke, ne bu-Leza bwandi kadi; ponkapo abo ne mwakwikañenya mwabulwa.”—Loma 1:20.

Mapaje alonda’ko alombola ngikadila isatu ya Leza mimwekelele’tu padi tō mu bintu byapangile. Pobandaula bino bimfwa, wiipangule bidi amba, ‘Le kufunda ino ngikadila ya Leza kukankwasha muswelo’ka?’

[Bushintuludi pa paje 3]

Bible kasakepo twitabije Leza kitabijetabije