Kyaso Kikomo Kadi Kija Mafuku

PANOPANO, mukimbi umo watompele kwifunda mwijijanga kyaso kya boba bafwidilwe baswe babo. Watumine bipangujo ku bambutwile babala-banga bafwidilwe bana mu bitatyi bishileshile. Ino ke bambutwilepo bonso balondolwele. Mbutwile umo witwa bu Vladimir, wafwidilwe mwana myaka itano kunyuma, walombwele amba ukikomenwanga kwisambila pa wandi mwana. *

Kyaso kija bininge uno muswelo kikalanga divule dine na bambutwile bafwidilwe bana. Myaka dikumi ibapite’po tamba William ufwilwa mwana wandi wa myaka 18 walobele mu mema. William ulemba’mba: “Kyaso kya kujimina kwandi kikinsansanga ne dyalelo, kadi kekikampupo’nka ne byonkafwa.” Ke myaka itano tamba Lucy ufwilwa mwana wandi na misongo ya mu kitulumukila, usoneka’mba: “Paadi ukifwafwafwa, nadi nanga’mba, ‘Ke bya binepo.’ Nadi mona’mba i kilotwa kibi kyonalota, ino wami mwana usa kulanguka’tu panō. Mwenda mafuku namona’mba i mufwe bine, mwanda kajokelepo ku njibo. Mwanami i mufwe pano kepadi myaka itano, ino kitatyi ne kitatyi pongikalanga bunka, mudilanga’nka kumudila.”

Mwanda waka bambutwile badi mu madilo pamo bwa ba Vladimir, William, ne Lucy, bekalanga na kyaso kikomo kadi kija nenki? Tubandaulei bidi buluji bumo.

Mwanda Waka Kudi Bushiyena Buvule Namino?

Pabutulwanga mwana mu kisaka bambutwile baloelelwanga mpata kupita mobaloelelwanga bantu bonso. Kusela mwana, kumubandila palēle, nansha kumumona usepa, byonso bino bibaletelanga nsangaji ne kunengelelwa kashā. Bambutwile ba buswe basenswe bininge babo bana. Bebafundijanga kwikala na mwikadilo muyampe ne bulēme. (1 Tesalonika 2:7, 11) Penda palonda bana bibalongela bambutwile, bambutwile betembanga’bo ne kwanza kwibalangila bivule.

Bambutwile ba kilelo bengilanga bininge mwanda wa kulama lutundu lwabo. Kyaba kyonso babikanga padi kalupeto ne bituntwa mwanda wa kukakwasha babo bana pobakekala nabo na bisaka byabo. (2 Kodinda 12:14) Malango, kitatyi, bukomo, ne lupeto bijimija bambutwile mu muswelo utulumuja bitutonona tunene amba—bambutwile balelanga bana mwanda wa bekale bōmi, ke mwandapo wa  bafwe. O mwanda shi mwana wafu, mwingilo wa kumulela keufikilepo padi pasakwa, ne byadi bilanga bambutwile padi mwana bibavutakana. Buswe bukatampe ne kisanso kya bambutwile na mwana kibatyibika, kidi enka bwa kyasansanibwa na kilubumbu kya mabwe, ke lufu kadi. Kifuko kyadi’po wabo mwana mu mityima yabo kibashala pululu. Bambutwile bemvwananga bushiyena bukata kebupu bukidi.

Bible nandi witabije amba bambutwile badi mu madilo bekalanga na kyaso kikatampe kadi kija. Bible unena pa kushintulula byātene mukulutuba Yakoba kitatyi kyaāivwene amba mwana wandi Yosefa waipaibwa, amba: “Ebiya Yakoba wasana bivwalwa byandi, wavwala kikolwa mu kifuka kyandi kadila wandi mwana mafuku mangi mangi. Penepo bāna bandi bonsololo ne bana-balume ne bana-bakaji, bataluka ke bamusenge, ino aye wapela kusengibwa amba: Mwanda nkatūkanga ku kalunganyembo [nansha kibundu] ne kudila kudi wami mwana.” Myaka pa kupita’po, Yakoba wādi ukidila wandi mwana, waādi ulanga amba i mufwe. (Ngalwilo 37:34, 35; 42:36-38) Kimfwa kikwabo kya mu Bible i kya Naomi, mwana-mukaji wa kikōkeji wāfwidilwe bana bonso babidi. Mutyima pa kumusansa’o bininge, wāsaka ne kushinta dijina dyandi dya bu Naomi ko kunena’mba “Kuloelelwa kwami” dikale ke Mala, ko kunena’mba “bululu.”—Luta 1:3-5, 20, 21.

Inoko, Bible aye i musekunune bivule kupita’ko’tu kwitabija njia itananga bambutwile. Kadi ulombolanga mupāninanga Yehova bukomo ku boba badi mu njia. Mu kishinte kilonda’ko tusa kubandaula miswelo imoimo Leza yaseñanga boba badila.

[Kunshi kwa dyani]