Lelo Ubwanya Kwifwenya Kudi Leza Wakubulwa Kumweka?

Padi ukokeja kwiipangula’mba: ‘Mbwanya kuningisha namani kipwano kya mpwaninine na muntu onkimone?’ Kino kimweka bu kipangujo kiluji. Ino langa’po bidi:

LELO kumona kudi na mvubu pa kusaka kutamija buswe ne kipwano kya nyeke? Mwene bintu byampikwa kumwena nabyo bidi na mvubu pamo na ya bintu byotumona, pakwabo bipite’nka ne kupita? I amo! O mwanda bantu bamo batamijanga kipwano kya mpwaninine na bakwabo na kwitumina mikanda kyaba ne kyaba​—mikanda yampikwa budimbidimbi ilombola bintu byobasaka ne byobashikilwe, bitungo, misoñanya, mizaulo, ne ngikadilo ya bumuntu bwabo.

Bampofu nabo babingijanga uno mwanda, amba kumona ke kintupo kimo kete kisakibwa pa kuningisha bulunda bwa kasheshe na kalembwe na muntu mukwabo. Tala kifwa kya ba Edward ne Gwen, ba mulume ne mukaji besonge, abo bonso bampofu. * Edward wētene na Gwen ku masomo a bampofu kobādi bafunda, abo bonso papo ke batame. Edward wāsangela ngikadilo ya Gwen, nakampata mwanda kādipo na budimbidimbi mu mīsambo ne mu mwiendelejo wandi, kadi wādi na ngikadilo yandi miyampe ku kaji. Gwen nandi papo muswe Edward; aye mwine unena’mba “wādi na ngikadilo yonso yobāmfundije amba yo ngikadilo ya mvubu.” Ponka’po bāshilula kwinangila, kupwa kwa myaka isatu besonga.

“Shi mushikete pamo na muntu mukwabo,” ye Edward unena, “bupofu kebukemukankajapo kuningisha kipwano kyenu. Shako, kemubwanyapo kwimona na meso, inoko malango keakomenwangapo kumona.” Pano ke papite myaka 57 kasha besonga, ino bakidi beswe buswe bwabinebine. Abo bene bashintulula amba lufungulo lwibatwele ku kuningisha kipwano kyabo kya kutendelwa lwimanine pa bintu biná: (1) kujingulula ngikadilo ya mukwetu, (2) kulanguluka’po ne kusangela mine ngikadilo’ya, (3) kwisamba nyeke mīsambo milumbuluke, ne (4) kulongela bintu pa kimo.

Ino myanda iná idi na kamweno mu kipwano kyo-kyonso kilumbuluke, mu bulunda, mu busongi, ne kupityidila, idi na mvubu mu kipwano kya bantu na Leza.

[Kunshi kwa dyani]