Bākankamene Pakubulwa Moyo

KUKANKAMANA pakubulwa moyo pa kusapula kekupēlangapo nyeke. O mwanda mutumibwa Polo wānene amba kyaba kimo nandi wākankamene pakubulwa moyo na kulwa “bulwi bwa ntanda ne ntanda.” (1 Tesalonika 2:2) Le kulwa “bulwi” pa kusapula kudi na kafwila-midimo? Eyo, kekudipo myanda mikatakata isaka kusekununwa pano, inoko tufwaninwe kuyuka amba bantu ba Leza basangalanga divule mwanda bakankamananga pakubulwa moyo. Ivwana bifwa bimobimo.

Kana-kakaji ka myaka mwanda, ketwa dya bu Tara, kadi kateja na katentekeji mwadimu wabo wadi ufundija mu kalasa amba pa Divita II dya Ntanda, mukutwa yense wa mu komponi ka masusu ka Bayuda wādi unenwe kuvwala Luñenyenye lwa Davida lwa musombelo wa mandyano lwa kumuyukila’po. Papo Tara ubila munda, ukimba kwisamba. Pano uvulukanga’mba: “Nalombela pampikwa kupūta ku meso.” Kupwa waela munwe mūlu, wanena’mba Batumoni ba Yehova nabo bādi mu oa makomponi, kadi bādi bavwala kayukeno katyilakana ka mafinko asatu. Mwadimu wasangala mpata, wamufwija’ko. Bino binenwa bya Tara byasebele dishinda dya kwiya kwisamba mīsambo mikwabo na mwadimu. Mwenda mafuku, Tara walombola kalasa katuntulu bande wa video La Fermeté des Témoins de Jéhovah face à la persécution nazie.

Mu Guinée, mu Afrika wa Kupona, Irène, nsongwakaji musapudi wakubulwa kubatyijibwa, wadi usaka kwendelela mu mwingilo wandi. Mishonele wadi wifunda nandi Bible wamukankamika amba shilula kuponeja mapepala, Kiteba kya Mulami ne Amkeni! ku balunda nobe ba ku masomo. Irène wadi wikaka mwanda balunda nandi bana ba masomo kebadipo betabija kusapwilwa. Ino pa kukankamikwa na mishonele, Irène wasumininwa kulumba bidi’nka mwanā masomo wadi umweka bu mwine ushikilwe kusapwilwa. Bine, Irène watulumukile pa kumona uno mwana-mukaji witabija musapu, waitabija ne mapepala mene. Bana ba masomo bakwabo nabo monka na monka. Mu mwine kweji’o, Irène waponeje mapepala mavule kupita buvule bwa onso aaponeje mu myeji itano kunyuma.

Mu Trinité, mukulumpe umo wadi wikaka kwenda kukamona mukulumpe wa masomo kukamulombola mvubu ya Amkeni! mu myanda ya bya masomo. Inoko wakankamene pakubulwa moyo. Unena’mba: “Nalombele kumeso kwa kutwela mu lupango. Bine, nkyadipo nanga amba mukulumpe wa masomo ukokeja kusangala bininge uno muswelo.” Waitabije dipepala Amkeni! dyadi dinena’mba “Quel espoir pour les jeunes ?” kadi waitabija ne kukengidija’dyo pa kufundija mu tulasa. Tamba papo, ke mutambule mapepala 40 esambila pa myanda mishileshile.

Nkasampe Vaughn wadi nyeke umona amba busapudi i bukomo. “Nadi ñivwana bumvu, bikasala byami byadi bipampa byanga, kadi nadi nena bukidibukidi—nkyadipo mbwanya kunena na mutyima mutūke.” Ino pano ke mwingidi wa kitatyi kyonso. Nansha pano padi mwingidi wa kitatyi kyonso, kunena na bukankamane ke mwandapo upēla. Difuku dimo, pa kupwa kujokoloka mu kwenda kukimba kaji, wasakile kusapwila muntu mu kudiye, “kyo kintu kimo kete kiyampe kyamwekele mu dyodya difuku dyamupityile bibi.” Ino waumvwana moyo pa kumona mumwekelo wa bukelenge wadi umweka yewa nsunga mpeta wa byandi wadi mu kudiye wa munshimunshi. Ino ku mfulo wekankamika pakubulwa moyo mwa kwisambila na mwana-mulume mutame’wa wadi ulondakene nandi. Moyo waalamuka ke mīsambo milampe. “A nkasampe, udi na myanda milumbuluke mpata,” ye nsunga unena, kupwa wamwipangula amba, “Le abe mwine wi mufunde teoloji’ni?” Vaughn kishima-tentu amba, “Mhm, ndi Kamoni wa Yehova.” Nsunga wamungamunga’tu, amba: “O mwanda mwine.”

Bano Batumoni bonso—ne bakwabo kebabadika—basangelanga kukankamana kobakankamananga pakubulwa moyo pa kusapula. Lelo nobe ukakankamana pakubulwa moyo?

[Kifwatulo pa paje 17]

Tara

[Kifwatulo pa paje 17]

Vaughn