Bandemona I Bantapañanyi!
Satana ne bandemona i babi nyeke ne bakasusu. Mu kitatyi kya kunyuma Satana wāipaile luombe ne bengidi ba Yoba muntu wabinebine. Ebiya wāipaya bāna dikumi ba Yoba na kutetula “kivula kikatampe” kyātyumwīne njibo yobādimo. Kupwa, Satana wāmeneja Yoba “mpusu isansa nakampata sū! Kushilwila ku kinyantyilo kya kulu kwandi, kutūla ne ku nsongo ya mutwe wandi.”—Yoba 1:7-19; 2:7.
Mu mafuku a Yesu, bandemona bāpele bantu bamo-bamo bumāma ne bupofu. (Mateo 9:32, 33; 12:22) Bāsuswile muntu umo na kumutakika eketakanye bilonda aye mwine na mabwe. (Mako 5:5) Kadi batunwine songwalume umo wāshilula kwela ñanji, kwitola panshi, ne “kumufulubija pakatampe.”—Luka 9:42.
Mu mafuku a kala, bandemona bādi babeleka bantu ne kwibatola panshi benda bebulula ne kwikanika
Kufikija ne dyalelo, Satana ne bandemona i bantapañanyi pamo ka na pakala. Eyo, mwingilo wabo wa bukalabale imwilundileko bininge tamba kasha bapangwa mūlu. Myanda ipita kujokoloka ntanda yonso ileta bukamoni bwa muswelo obasusula bantu. Baponenejanga bantu bamobamo mu misongo. Bakwabo bebasusulanga bufuku, na kwibonakenya tulo nansha na kwibaloteja bilotwa bya luzakalo lukatampe. Bakwabo bebonakanyanga mu myanda itala buladi. Bakwabo nabo bebatonwenanga ku bulubi, ku kutapañana, nansha ku kwiyoa.
Dyalelo bandemona batonwenanga bantu bamobamo ku bukalabale; basusulanga bakwabo bufuku, na kwibaloteja bilotwa bya luzakalo lukatampe
Lintina, mwikadi umo wa mu Suriname, ufumika’mba ndemona umo, nansha mushipiditu umbi, wāipaile bantu 16 ba mu kyandi kisaka ne kumususula muñeni ne kungitu umbula bwa myaka 18. Wisambila pa byāmufikile’mba bandemona “basepelelanga kususula bantu bobasaka kwipaya, kufikija ka ne ku lufu.”
Ino Yehova udi na bukomo bwa kukinga bengidi bandi ku bulwi bwibalwa Satana.—Nkindi 18:10.
Tala'po Bidi ne Bino:
BIPANGUJO BYA MU BIBLE BILONDOLWELWE
Lelo Dyabola Ye Ulengeja Masusu Onso?
Bible ulombolanga kwine kutambile masusu a muzo wa muntu.
