“Pano ke padi myaka, ketwadipo tulanga’mba tubwanya kwikala na mabuku mu bingidilwa bya busendwe.” Le witabije bino binenwa? Bibadilwa mu binenwa bikankamika byanenene tutu Geoffrey Jackson mu Mapya #6 a Kitango Kyendeji. Wabwejeje’ko amba: “Padi enka ne pano twiipangulanga motwadi ba kūminina kino kipupo pa kubulwa bingidilwa pamo bwa JW Library. Yehova wituteakanyanga mu bula bwa myaka mwa kwiteakenya ku bintu pamo bwa bino.”

 Le Yehova wituteakanyanga namani? Le i bika byalongelwe pa kutūla’ko mpangiko ya JW Library, ne i bika bisakibwa pa kwiilama ne kwiilumbulula?

 Mu Kweji 5, 2013, Kitango Kyendeji kyanenene banabetu batala mpangiko ya MEPS, bilo ya ku kité kya ntanda yonso, balupule’ko mpangiko idi’mo Bible wa Bwalamuni bwa Ntanda Mipya bujadikwe. Paul Willies wingilanga na bano banabetu batala Mpangiko ya MEPS wanenene amba, “kufika ne pano ketwalupwile mpangiko ya mu telefone mu kibīko nansha kimo kya mampangiko. Inoko twakongakenye kisumpi, twaleka kwingila mingilo mityemitye, ne kwingidila pamo na mabilo makwabo mwanda wa kulonga ino mpangiko ne myanda idi’mo. Twadi tulombela kyaba kyonso, kadi na bukwashi bwa Yehova, ino mpangiko yalupwilwe ku kupwila kwa pa mwaka myeji itano pa kupita’po!”

 Makambakano makwabo adi a kwalamuna ino mpangiko ke kibīko kidi’mo mabuku mavule kadi mu ndimi mivule. Dya mu Kweji 1, 2015, mabuku etu mapya mavule a mu Angele adi keadi mu ino mpangiko, kadi myeji isamba’tu pa kupita’po, bantu badi babwanya kutentula ano mampangiko mu ndimi mikwabo tutwa na tutwa.

 Tamba pene’pa, banabetu balumbululanga ino mpangiko mu miswelo mivule, babweja’mo mavideo, kukongakenya’mo mabuku ne minjiki yonso ya ku kupwila kwa pa kipwilo mu kifuko kimo, ne kukwasha bantu batwele mu Mabuku a kunyemena’ko kupityila ku mavese a mu Bible.

 Bingidilwa bya busendwe midiyo 8 bitwelanga mu JW Library difuku ne difuku, ne bingidilwa midiyo 15 bitwelanga’mo kweji ne kweji! Le i bika bifwaninwe kulongwa pa kusaka ino mpangiko ingile nyeke biyampe mu bino bingidilwa bya busendwe? Tutu Willies unena’mba: “Mpangiko ya mu telefone ke yapwididile. Twingilanga kitatyi kyonso mwanda wa kubweja’mo mabuku mapya ne kwiilumbulula ipēle kwingidija. Mampangiko a busunga a myanda ya mu bya busendwe byoashintanga kyaba kyonso, netu tufwaninwe kushinta mpangiko kitatyi kyonso mwanda wa kwiikwatañanya na ano mampangiko. Penda pavudila’ko mabuku ne myanda mikwatwe ku mawi mu JW Library, tufwaninwe kulama, ne kulumbulula mpangiko idi munda.” Mu ndimi yonso, pano mu JW Library mudi kintu kya mabuku 200 000, myanda ne mavideo makwatwe ku mawi 600 000 ne kupita!

 Pa kukwatakanya nyeke ino mpangiko, kusakilwa bingidilwa bivule bya olodinatele. Kufwaninwe ne kupotwa malisanse mavule. Lisanse’tu imo ilomba kintu kya madolala 10 000 mwaka ne mwaka. Ne kadi, Mpangiko ya MEPS ilomba kintu kya madolala 1 500 mwaka ne mwaka mu bingidilwa bya busendwe bya bampunga, mwanda wa kuyuka shi bikendelela kwingila biyampe mu maolodinatele mapya, matabulete, ne matelefone.

 Pa mwanda wa JW Library pano tulupulanga lupeto lutyetye pa kutampa, kūbaka ne kutuma mabuku. Kimfwa, langulukila pa kabuku Tubandaulei Bisonekwa Difuku ne Difuku. Twatampile kintu kya mabuku midiyo 12 a Tubandaulei Bisonekwa mu 2013. Ino mu 2020, twatampile’tu tubuku kintu kya midiyo itano, nansha byokwebwejeje kintu kya basapudi 700 000 ne kupita ntanda yonso. Mwanda waka kwaikele kuno kushinta? Mwanda pano batutu ne bakaka bavule batañanga kisonekwa kya difuku mu JW Library. a

 Kadi mpangiko ya JW Library ikwashanga boba beingidija mu miswelo mivule. Geneviève ushikatanga mu Kanada, umwene amba wifundanga difuku ne difuku pa mwanda wa ino mpangiko. Unena’mba, “na bubine, shi kwadi amba nenwe kukongakanya mabuku onsakilwa pa kwifunda, nkilangapo amba nadi wa kwifunda lubanga ne lubanga. Ino na ino mpangiko, ntekunanga’tu tabulete yami ne kumona’mo kintu kyonso kyonsakilwa. Kwifunda kitatyi ne kitatyi uno muswelo, kuningejanga lwitabijo lwami ne kunkwasha ntame bininge ku mushipiditu.”

 Nakampata ino mpangiko i mikwashe bininge mu kitatyi kya kipupo kya COVID-19. Charlyn wa mu États-Unis, unena’mba: “Pa mwanda wa kipupo kya COVID-19 kidi ntanda yonso, nkikimonengapo mabuku etu mapya matampe pano kepadi mwaka umo ne kupita. Ino betupanga byonso byotusakilwa pa kukomeja lwitabijo kupityila ku JW Library, o mwanda mfwijanga’ko Yehova pa ino mpangiko ya buswe.”

 Bantu bavule beivwananga na mweivwanine Faye ushikatanga mu Filipine. Unena’mba: “Ñingidijanga ino mpangiko mikatampe mwanda wa kwikala nyeke pabwipi na Yehova. Ye kintu kibajinji kyontañanga’mo lubanga. Ye kyongivwananga’mo shi ñingila mingilo ya njibo. Ye kyoñingidijanga ku kupwila. Ye kyoñingidijanga pa kuteakanya kifundwa kyami kya Bible. Ntalanga’mo mavideo ponso pondi na kyaba. Ntañanga’mo bishinte ne Bible kitatyi kyontengēle ku mulongo. Bine i kya ku bitupu.”

 Kadi ino mpangiko idi na kamweno mu busapudi. Kimfwa, pa kusapula, kaka umo wa mu Kamerune usakanga kwingidija kisonekwa kyaamwene kaka mukwabo wingidija mayenga matyetye kunyuma. Inoko, wadi ukomenwa kusokola pokidi. Aye mwine ushintulula’mba: “Na bya dyese, nadi mvuluka musemwa umo udi’mo. Napūtula mpangiko, natwela mu Bible, kupwa nakimba’mo musemwa’wa. Na pano kala nasokola kisonekwa. Na kwingidija ino mpangiko, mbwanya kusokola bisonekwa bivule byonkendi mwilwe.”

 Byabuntu byenu bya na buswe byomutuma mu miswelo ilombwelwe mu donate.jw.org i bitukwashe tulupwile batutu ne bakaka ba ntanda yonso mpangiko ya JW Library, kwiilama ne kwiilumbulula. Mubafwai’ko ne mushipiditu wenu wa buntu.

1. 1 Kweji 10, 2013—Kulupulwa kwa mpangiko idi na Bwalamuni bwa Ntanda Mipya bujadikwe

2. 15 Kweji 1, 2015—Mubaelwa mabuku makwabo a Angele, kupwa ke mu ndimi mikwabo tutwa na tutwa

3. 1 Kweji 11, 2015—Kubweja’mo bya kupenta bilembwa

4. Kweji 5, 2016—Kubwejibwa’mo ka kipindi kupwila

5. Kweji 5, 2017—Kubwejibwa’mo kwa pa kulemba

6. Kweji 12, 2017—Kubwejibwa’mo kwa bya kukwasha Mwifundi wa Bible

7. Kweji 3, 2019—Muswelo wa kutentula myanda mikwatwe ku mawi, mavideo a pa stream, ne muswelo wa kutwela mu Mabuku a Bukimbi a kunyemena’ko

8. Kweji 1, 2021—Kubwejibwa’mo kwa myanda ya mu dibuku Ikala Mūmi Nyeke!